Tukikazia sana jinsi wengine walivyo tofauti na sisi, huenda tukaona tofauti hizo kuwa udhaifu au mapungufu. Kwa sababu ya tofauti hizo, tunaweza kuanza kuwaona wengine kuwa duni. Tunapositawisha mtazamo huo mbaya, inaweza kuwa vigumu kuwaonyesha wengine huruma. Kutokuwa na huruma kunaweza kuwa dalili ya tatizo kubwa zaidi, yaani, ubaguzi.

“Shangilieni na wale wanaoshangilia; lieni na wale wanaolia.”—WAROMA 12:15.

Kanuni hiyo inamaanisha nini? Kwa maneno machache, kanuni hii inamaanisha, uwe na huruma. Kuwa na huruma ni kujiweka katika hali ya mtu mwingine na kuhisi jinsi anavyohisi.

Tunapomhurumia mtu tunatambua kwamba hakuna tofauti kati yetu na yeye. Anaweza kuhisi kama tunavyohisi na akatenda kama tunavyotenda. Sifa ya huruma inatusaidia kuwaona watu wote kuwa ni ndugu zetu hata iwe wanatokea wapi. Kadiri tunavyotambua kwamba wengine hawana tofauti na sisi, ndivyo mtazamo wetu kuwaelekea unavyokuwa bora zaidi.

Sifa ya huruma itatusaidia kuwaheshimu wengine. Wakati fulani, Anne-Marie kutoka Senegal aliwadharau maskini. Anaeleza jinsi sifa ya huruma ilivyomsaidia. Anasema hivi: “Nilipoona watu hao wakiteseka, nilijiuliza ‘Mimi ningehisije ikiwa ningekuwa na hali kama yao?’ Nilitambua kwamba mimi si bora kuliko wao kwa sababu sina jambo lolote linalofanya niwe bora.” Tukijitahidi kujua hali ngumu ambazo wengine wanapitia, itakuwa rahisi kuwahurumia badala ya kuwakosoa.

Ikiwa una mtazamo usiofaa kuelekea watu fulani, jaribu kuwazia mambo ambayo hautofautiani nao. Kwa mfano, fikiria jinsi wanavyohisi

• wanapokula chakula pamoja na familia yao

• wanapotimiza malengo fulani

• wanapotumia muda pamoja na rafiki zao, au

• wanaposikiliza muziki mzuri wanaoupenda

Jaribu kujiweka katika hali yao. Kisha jiulize:

• ‘Ningetendaje ikiwa mtu fulani angefanya nihisi sina thamani yoyote?’

• ‘Ningehisije ikiwa watu wengine wangenihukumu hata kabla ya kunijua vizuri?’

• ‘Ikiwa ningezaliwa katika jamii hiyo, ningependa watu wengine wanitendeaje?’