KAPÍTULU 37

Haʼu presiza hetan batizmu ka lae?

Marka fraze tuirmai loos ka sala:

Ema Kristaun tenke hetan batizmu.

□ Loos

□ Sala

Razaun importante liu atu hetan batizmu mak atu ajuda Ita la monu ba sala.

□ Loos

□ Sala

Batizmu loke dalan ba Ita atu hetan salvasaun.

□ Loos

□ Sala

Se Ita la hetan batizmu, neʼe katak Ita la presiza hatán ba Maromak kuandu Ita halo sala.

□ Loos

□ Sala

Se Ita-nia kolega sira hetan batizmu, neʼe katak Ita mós prontu ona atu hetan batizmu.

□ Loos

□ Sala

SE ITA halo tuir Maromak nia prinsípiu sira, haburas relasaun diʼak ho Maromak, no fó sai ba ema seluk kona-ba Ita-nia fiar, entaun normál se Ita hakarak atu hetan batizmu. Maibé oinsá mak Ita bele hatene katak Ita prontu ona atu hetan batizmu? Atu buka-hatene resposta ba pergunta neʼe, mai ita koʼalia hamutuk kona-ba fraze loos ka sala neʼebé temi iha leten.

● Ema Kristaun tenke hetan batizmu.

Loos. Jesus haruka ninia dixípulu sira atu hetan batizmu. (Mateus 28:19, 20) No loloos, Jesus rasik mós hetan batizmu. Atu bele banati-tuir Jesus nia ezemplu, Ita presiza hetan batizmu bainhira Ita maduru ona atu bele halo desizaun kona-ba batizmu no Ita hakarak tebes atu hetan batizmu.

● Razaun importante liu atu hetan batizmu mak atu ajuda Ita la monu ba sala.

Sala. Bainhira Ita hetan batizmu, Ita hatudu ba ema seluk katak Ita dedika an ona ba Jeová. Ita-nia dedikasaun la hanesan ho asina kontratu neʼebé bandu Ita atu labele halo buat oioin neʼebé Ita hakarak atu halo. Maibé Ita dedika Ita-nia moris ba Jeová tanba Ita hakarak atu moris tuir ninia prinsípiu sira.

● Batizmu loke dalan ba Ita atu hetan salvasaun.

Loos. Bíblia hatete katak batizmu mak hakat importante ida atu bele hetan salvasaun. (1 Pedro 3:​21) Maibé hetan batizmu la garantia katak Ita sei hetan salvasaun. Ita hetan batizmu laʼós tanba Ita hakarak atu hetan salvasaun. Maibé Ita hetan batizmu tanba Ita hadomi Jeová no hakarak atu serbí nia ho laran tomak ba nafatin.​—Marcos 12:29, 30.

● Se Ita la hetan batizmu, neʼe katak Ita la presiza hatán ba Maromak kuandu Ita halo sala.

Sala. Tiago 4:​17 hatete, “se ema ida hatene oinsá atu halo buat neʼebé loos maibé la halo, nia halo ona sala” maski nia batizmu ona ka seidauk batizmu. Entaun, se Ita hatene ona buat neʼebé loos no Ita maduru ona atu halo desizaun sériu kona-ba Ita-nia moris, karik neʼe mak tempu atu koʼalia hamutuk ho Ita-nia inan-aman ka maluk Kristaun neʼebé maduru kona-ba hetan batizmu. Se Ita halo nuneʼe, Ita bele aprende hakat sira neʼebé ita presiza halo atu bele laʼo ba oin no hetan batizmu.

● Se Ita-nia kolega sira hetan batizmu, neʼe katak Ita mós prontu ona atu hetan batizmu

Sala. Desizaun atu hetan batizmu tenke mai husi Ita-nia laran rasik. (Salmo 110:3) Ita presiza hetan batizmu só deʼit se Ita komprende ho didiʼak sai Testemuña ba Jeová katak sá no se Ita fiar katak Ita prontu ona atu kaer responsabilidade neʼe.​—Eclesiastes 5:4, 5.

Batizmu troka Ita-nia moris

Batizmu mak desizaun importante neʼebé troka Ita-nia moris no lori bensaun barak. Iha tempu neʼebé hanesan, hetan batizmu mak responsabilidade boot, tanba Ita presiza kumpre dedikasaun neʼebé Ita halo ona ba Jeová.

Ita rasik prontu ona atu dedika Ita-nia moris ba Jeová ka lae? Se nuneʼe, Ita bele sente kontente. Ita iha priviléjiu furak atu bele serbí Jeová ho laran tomak no halaʼo moris neʼebé hatudu katak Ita hakarak duni serbí Jeová.​—Mateus 22:36, 37.

ESKRITURA

“Fó imi-nia isin nuʼudar sakrifísiu neʼebé moris, santu no Maromak simu, katak halo serbisu sagradu ho imi-nia kbiit atu hanoin.”​—Roma 12:1.

SUJESTAUN

Ho Ita-nia inan-aman nia ajuda, buka irmaun ka irmán ida iha kongregasaun neʼebé bele ajuda Ita atu laʼo ba oin hodi hetan batizmu.​—Apóstolu 16:1-3.

HATENE KA LAE . . . ?

Batizmu mak parte importante tebes husi “marka” atu bele hetan salvasaun.​—Ezequiel 9:4-6.

HALO PLANU

Atu bele laʼo ba oin no hetan batizmu, haʼu sei hakaʼas an liután komprende Bíblia nia hanorin sira hanesan tuirmai: ․․․․․

Buat neʼebé haʼu hakarak husu ba haʼu-nia inan-aman kona-ba tópiku neʼe mak ․․․․․

ITA HANOIN OINSÁ?

● Tanbasá batizmu mak hakat ida neʼebé importante?

● Saida deʼit mak book joven ida atu foti desizaun kona-ba hetan batizmu ho ansi?

● Tanbasá mak joven ida la hatudu matenek hodi dada an atu dedika ninia an no hetan batizmu?

[Liafuan]

“Hodi hetan batizmu, neʼe ajuda haʼu atu halo desizaun neʼebé matenek no la halo buat neʼebé bele lori rezultadu aat.”​—Holly

[Kaixa/​Dezeñu]

Pergunta sira neʼebé baibain ema husu kona-ba batizmu

Batizmu reprezenta saida? Bainhira Ita tama ba bee laran no sai fali, neʼe hatudu katak Ita para atu halaʼo moris neʼebé hanoin an deʼit, neʼe hanesan Ita-nia hahalok tuan sira mate ona no agora Ita moris fali atu halo Maromak nia hakarak.

Dedika Ita-nia moris ba Jeová katak sá? Neʼe katak Ita entrega Ita-nia moris ba Maromak no Ita promete ba Maromak atu tau uluk ninia hakarak iha Ita-nia moris. (Mateus 16:24) Ita tenke dedika Ita-nia moris ba Jeová liuhusi halo orasaun ba Jeová tempu balu antes Ita hetan batizmu.

Saida mak Ita presiza halo antes atu hetan batizmu? Ita presiza moris tuir Maromak nia Liafuan no Ita fó-hatene ba ema seluk kona-ba Ita-nia fiar. Ita presiza haburas Ita-nia relasaun diʼak ho Maromak liuhusi halo orasaun no estuda Bíblia. Ita presiza serbí Jeová tanba Ita rasik mak hili atu halo nuneʼe, laʼós tanba ema seluk mak obriga.

Ita presiza tinan hira mak foin bele hetan batizmu? Ita-nia idade laʼós buat neʼebé importante. Maski nuneʼe, Ita presiza maduru ona iha Ita-nia emosaun no mós hanoin atu bele komprende signifikadu husi Ita-nia dedikasaun.

Oinsá se Ita hakarak atu hetan batizmu, maibé Ita-nia inan-aman hanoin katak diʼak liu atu hein? Karik Ita-nia inan-aman hakarak Ita atu hetan esperiénsia liután kona-ba moris Kristaun. Hafolin sira-nia konsellu no uza tempu atu haburas Ita-nia relasaun diʼak ho Jeová.​—1 Samuel 2:26.

[Kaixa]

Atividade ba joven sira

Ita hakarak atu hetan batizmu ka lae?

Buka-hatene oinsá Ita laʼo ba oin hodi hanoin kona-ba pergunta no fraze iha kraik. Antes hakerek Ita-nia resposta, diʼak atu lee mós eskritura sira neʼebé hakerek iha neʼe.

Saida deʼit mak Ita halo atu hatudu katak Ita tau fiar ba Jeová?​—Salmo 71:5. ․․․․․

Oinsá Ita hatudu katak Ita treinu didiʼak Ita-nia kbiit atu tetu didiʼak hodi hatene buat neʼebé loos no sala?​—Ebreu 5:14. ․․․․․

Ita halo orasaun beibeik ka lae? ․․․․․

Ita-nia orasaun espesífiku toʼo oinsá no Ita-nia orasaun hatudu saida kona-ba Ita-nia domin ba Jeová?​—Salmo 17:6. ․․․․․

Hakerek iha kraik buat neʼebé Ita hakarak kumpre kona-ba halo orasaun. ․․․․․

Ita halaʼo estuda Bíblia beibeik ka lae?​—Josué 1:8. ․․․․․

Ita estuda kona-ba saida deʼit bainhira Ita estuda mesak? ․․․․․

Hakerek iha kraik buat neʼebé Ita hakarak kumpre kona-ba Ita-nia estuda Bíblia mesak. ․․․․․

Ita haklaken ho didiʼak ka lae? (Porezemplu: Ita bele esplika Bíblia nia hanorin báziku sira ka lae? Ita vizita fali ema sira neʼebé interese ka lae? Ita hakaʼas an atu komesa dirije estuda Bíblia ho ema ka lae?)

□ Sin □ Lae

Ita nafatin bá haklaken maski Ita-nia inan-aman la bá ka lae?​—Apóstolu 5:42.

□ Sin □ Lae

Hakerek iha kraik buat neʼebé Ita hakarak kumpre kona-ba Ita-nia serbisu haklaken.​—2 Timóteo 2:15. ․․․․․

Ita badinas atu tuir beibeik reuniaun ka ita tuir dala ruma deʼit?​—Ebreu 10:25. ․․․․․

Saida deʼit mak Ita halo atu hola parte iha reuniaun sira? ․․․․․

Ita nafatin tuir reuniaun sira maski Ita-nia inan-aman la tuir ka lae (se Ita-nia inan-aman fó lisensa ba Ita atu tuir)?

□ Sin □ Lae

Ita gosta tebes atu halo Maromak nia hakarak ka lae?​—Salmo 40:8.

□ Sin □ Lae

Ita bele ka lae hakerek ezemplu espesífiku kona-ba oinsá Ita tahan bainhira Ita-nia kolega eskola obriga Ita atu halo sala?​—Roma 12:2. ․․․․․

Ita planu atu halo saida deʼit hodi Ita-nia domin ba Jeová metin nafatin?​—Judas 20, 21. ․․․․․

Ita sei kontinua serbí Jeová maski Ita-nia inan-aman no kolega sira para atu serbí Jeová ka lae?​—Mateus 10:36, 37.

□ Sin □ Lae

[Dezeñu]

Hanesan desizaun atu kaben, batizmu mak hakat ida neʼebé bele troka Ita-nia moris, tan neʼe Ita presiza hanoin didiʼak antes ita foti desizaun neʼe