KUANDU ita lee jornál, haree televizaun, ka rona rádiu, buat sira-neʼe konta beibeik kona-ba krime, funu, no terrorizmu! Hanoin kona-ba Ita rasik nia problema sira. Karik Ita laran-triste tanba moras ka Ita-nia família ida mate. Dala ruma Ita sente hanesan ema diʼak ida naran Job, nia hatete katak nia “mout iha terus boot nia laran”.—Jó (Ayub) 10:15.

Husu Ita-nia an:

• Maromak hakarak haʼu no ema seluk atu moris hanesan neʼe ka lae?

• Husi neʼebé mak haʼu bele hetan ajuda atu rezolve haʼu-nia problema sira?

• Iha esperansa katak loron ida ita sei hetan dame iha mundu neʼe ka lae?

Bíblia fó resposta ba pergunta hirak-neʼe, no halo ita sente kmaan.

“Nia sei hamaran sira-nia matan-been hotu husi sira-nia matan, no mate sei la iha tan, no ema sei la tanis tan ka laran-susar ka laran-triste.”—Apokalipse 21:4

“Ema ain-kudeʼik sei laʼo hanesan bibi-rusa.”—Isaías (Yesaya) 35:6; Mateus 11:5

“Ema matan-delek sira-nia matan sei loke.”—Isaías (Yesaya) 35:5; Mateus 21:14

 “Ema hotu neʼebé iha rate laran sei . . . sai husi rate.”—João 5:28, 29

“La iha ema neʼebé hela iha rai sei dehan: ‘Haʼu moras.’”—Isaías (Yesaya) 33:24; Apokalipse 22:2

“Sei iha hahán barak iha rai.”—Salmo (Mazmur) 72:16

Labele hanoin katak buat neʼebé Ita foin lee mak mehi deʼit. Maromak promete duni atu halo buat hirak-neʼe, no Bíblia esplika oinsá Nia sei halo nuneʼe.

Maibé Bíblia esplika buat seluk tan. Bíblia mós esplika oinsá Ita bele hetan moris neʼebé kontente ohin loron. Hanoin toʼok kona-ba Ita-nia problema sira. Karik osan la iha, problema iha família laran, moras, ka ema ruma mate. Bíblia bele ajuda ita hasoru problema ohin loron nian, no mós halo ita sente kmaan tanba hatán pergunta sira hanesan tuirmai neʼe:

• Tansá mak ita iha terus?

• Oinsá mak ita bele hasoru susar loron-loron nian?

• Oinsá mak ita bele halo ita-nia moris família nian kontente liu?

• Saida mak akontese kuandu ita mate?

• Loron ida ita bele hasoru fali ita-nia família no belun neʼebé mate ona ka lae?

• Oinsá mak ita bele fiar katak Maromak sei kumpre ninia promesa sira ba futuru?

 Tanba Ita lee daudaun livru neʼe hatudu katak Ita hakarak hatene saida mak Bíblia hanorin. Livru ida-neʼe sei ajuda Ita. Haree katak parágrafu ida-idak iha mós pergunta iha pájina nia kraik. Ema rihun ba rihun neʼebé estuda Bíblia ho Testemuña ba Jeová gosta atu uza dalan pergunta ho resposta. Ami hein katak Ita mós sei gosta. Ami mós hein katak Ita sei simu Maromak nia bensaun nuʼudar Ita aprende ho laran-kontente saida mak Bíblia loloos hanorin!