1. Ita bele hetan informasaun kona-ba futuru iha neʼebé?

KUANDU Ita haree notísias iha televizaun ka rona notísias iha rádiu, Ita hanoin ka lae, kona-ba problema sira neʼebé mosu daudaun? Dezastre sira mosu derrepente deʼit, no ema ida la bele hatene loos saida mak sei mosu iha loron tuirmai. (Tiago 4:14) Maibé, Maromak Jeová hatene saida mak sei akontese iha futuru. (Isaías [Yesaya] 46:10) Iha tempu uluk kedas ninia Liafuan, Bíblia, fó-hatene nanis buat aat neʼebé sei akontese iha ita-nia tempu. Maibé laʼós neʼe deʼit, Bíblia mós fó-hatene nanis kona-ba buat diʼak neʼebé sei akontese iha futuru neʼebé besik ona atu mai.

2, 3. Jesus nia dixípulu balu husu saida? Jesus hatán saida?

² Kuandu Jesus Kristu iha mundu, nia koʼalia kona-ba Maromak nia Ukun, governu neʼebé sei halakon buat aat hotu no halo mundu tomak sai jardín furak. (Lucas 4:43) Ema neʼebé rona Jesus, hakarak  hatene bainhira mak Ukun neʼe sei toʼo mai. Tuir loloos, Jesus nia dixípulu balu husu nia: “Sinál saida mak sei hatudu katak Ita toʼo ona mai no katak mundu neʼe atu hotu?” (Mateus 24:3) Jesus hatán hodi dehan katak Maromak Jeová deʼit mak hatene loron ida-neʼebé mak mundu aat neʼe sei lakon. (Mateus 24:36) Maski nuneʼe, Jesus fó-hatene ba ninia dixípulu sira kona-ba saida mak sei akontese iha mundu antes Ukun neʼe sei lori dame ba ema hotu iha mundu. Liafuan neʼebé nia koʼalia nanis mak akontese agora daudaun!

³ Antes ita koʼalia kona-ba buat sira neʼebé hatudu katak ita agora moris iha tempu neʼebé “mundu neʼe atu hotu”, mai ita koʼalia uitoan kona-ba funu neʼebé ema ida iha mundu la bele haree. Funu neʼe akontese tiha ona iha lalehan, no rezultadu husi funu neʼe kona ita ida-idak.

4, 5. (a) Kuandu Jesus foin sai Liurai, saida mak akontese iha lalehan? (b) Tuir Apokalipse 12:12, saida mak rezultadu husi funu neʼe?

⁴ Iha Kapítulu 8 husi livru neʼe esplika katak Jesus Kristu sai Liurai iha lalehan iha tinan 1914. (Daniel 7:13, 14; Apokalipse 11:15) Kuandu Jesus foin sai Liurai, nia halo buat ruma. Bíblia hatete: “Funu mosu iha lalehan: Miguel [naran seluk ba Jesus] no ninia anju sira halo funu ho samea boot [Diabu Satanás], no samea boot neʼe no ninia anju sira halo funu ho sira.” * Satanás ho ninia anju aat sira  lakon iha funu neʼe, no Jesus duni tun sira toʼo mundu. Iha lalehan, anju sira neʼebé laran-metin ba Maromak sente kontente loos tanba Satanás ho ninia anju aat sira la iha tan. Maibé, ema iha mundu la sente haksolok hanesan anju sira-neʼe. Tanbasá? Tanba Bíblia fó-hatene nanis kona-ba ema iha mundu neʼe: “Susar ba rai . . . basá Diabu tun tiha ona ba imi, no nia hirus makaʼas, tanba nia hatene katak nia tempu hela uitoan deʼit.”—Apokalipse 12:7, 9, 12.

⁵ Mai ita haree rezultadu husi funu neʼebé akontese iha lalehan. Tanba Satanás hirus makaʼas, nia halo ema iha mundu hetan susar. Hanesan ita sei aprende, agora ita moris iha tempu susar neʼe. Maibé tempu susar neʼe la naruk, Satanás nia “tempu hela uitoan deʼit”. Satanás mós hatene ida-neʼe. Bíblia bolu tempu neʼe “loron ikus sira”. (2 Timóteo 3:1) Ita sente kontente tebes tanba lakleur tan Maromak sei halakon buat aat hotu neʼebé Satanás halo iha mundu! Mai ita hanoin kona-ba buat balu neʼebé hakerek nanis iha Bíblia neʼebé  akontese agora daudaun. Buat sira-neʼe hatudu katak ita agora moris iha loron ikus sira. No mós, lakleur tan Maromak nia Ukun sei haraik bensaun neʼebé sei iha ba nafatin ba ema neʼebé hadomi Maromak Jeová. Primeiru, mai ita koʼalia kona-ba sinál haat neʼebé Jesus dehan sei akontese iha ita-nia tempu.

6, 7. Oinsá mak Jesus nia liafuan kona-ba funu no hamlaha sai loos ohin loron?

⁶ “Nasaun sei hamriik hasoru nasaun seluk no ukun ida sei hamriik hasoru ukun seluk.” (Mateus 24:7) Durante tinan 100 liubá ema rihun ba rihun mate tanba funu. Ema matenek husi rai-Bretaña hakerek: “Durante tinan 1901 toʼo tinan 2000, ema barak liu mate tanba ema mak oho. . . . Durante tinan 100 neʼe iha funu barak, no iha tempu uitoan deʼit mak funu la iha.” Relatóriu husi organizasaun ida neʼebé estuda akontesimentu mundu nian hakerek: “Se kompara vítima ba funu hotu husi Jesus nia tempu toʼo tinan 1899,  ema neʼebé sai vítima iha funu husi tinan 1900 toʼo tinan 2000 mak barak liu ba dala tolu.” Husi tinan 1914 toʼo agora ema naʼin-100.000.000 liu mate tanba funu. Ema rihun ba rihun triste tebes tanba sira-nia belun ka família mate iha funu. Karik Ita mós hetan terus hanesan neʼe.

⁷ “Rai sei hamlaha.” (Mateus 24:7) Tuir ema neʼebé halo peskiza, hatete katak durante tinan 30 liubá, hahán iha mundu sai barak liu. Maski nuneʼe, hamlaha kontinua tanba ema la iha osan atu hola hahán, ka la iha rai atu halo toʼos. Iha rai kiak sira, ema rihun ba rihun terus tanba hamlaha. Organização Mundial da Saúde hatete katak kuran vitamina mak razaun ida neʼebé labarik naʼin-5.000.000 liu mate tinan-tinan.

8, 9. Saida mak hatudu katak buat neʼebé Jesus fó-hatene nanis kona-ba rai-nakdoko no moras aat sai loos tiha ona?

⁸ “Sei iha rai-nakdoko makaʼas.” (Lucas 21:11) Tuir grupu ema matenek ida, rai-nakdoko makaʼas bele mosu maizumenus dala 19 tinan-tinan. Rai-nakdoko  sira-neʼe makaʼas tebes toʼo bele estraga uma no halo rai nakfera. No mós rai-nakdoko makaʼas liu neʼebé sobu hotu uma akontese tinan-tinan. Informasaun balu hatudu katak husi tinan 1900, ema naʼin-2.000.000 liu mate tanba rai-nakdoko. Relatóriu seluk hatete: “Teknolojia neʼebé bá oin ladún konsege salva ema barak.”

⁹ “Sei iha moras aat.” (Lucas 21:11) Maski ema matenek halo ai-moruk no tratamentu foun, maibé moras uluk nian no mós moras foun kontinua atu haterus ema. Relatóriu ida hatete katak moras 20 neʼebé kona ema barak, hanesan meʼar-raan, malária, no kólera, kona ema barak liu iha tinan balu liubá, no moras balu neʼebé uluk bele kura sai susar liu atu kura. No mós, moras foun 30 liu mosu tiha ona. Moras foun balu la iha ai-moruk no bele halo ema mate.

10. Tuir Ita-nia hanoin, ohin loron ema hatudu hahalok saida deʼit neʼebé hakerek iha 2 Timóteo 3:1-5?

¹⁰ Bíblia la fó-hatene deʼit kona-ba buat boot neʼebé sei akontese  iha mundu iha loron ikus sira, maibé fó-hatene nanis mós katak ema nia hahalok sei la hanesan ho ema iha tempu uluk. Iha 2 Timóteo 3:1-5, apóstolu Paulo hakerek kona-ba ema barak nia hahalok iha loron ikus sira. Nia hatete: “Iha loron ikus sira sei mosu problema barak neʼebé susar atu tahan.” Buat balu neʼebé Paulo hakerek kona-ba ema nia hahalok mak ema sei

• hadomi deʼit sira-nia an

• hadomi osan

• la halo tuir inan-aman

• la laran-metin

• la hadomi malu

• la kontrola an

• siʼak

• hadomi deʼit ksolok duké hadomi Maromak

• iha ema nia oin sira hatudu hahalok katak sira adora Maromak, maibé sira la moris tuir sira-nia adorasaun

11. Tuir Salmo 92:7 saida mak sei akontese ba ema aat?

¹¹ Iha Ita-nia hela-fatin, iha ema neʼebé hatudu hahalok sira hanesan neʼe ka lae? Iha duni. Iha fatin hotu, iha ema neʼebé hatudu hahalok la diʼak. Ida-neʼe hatudu katak lakleur tan Maromak sei halo buat ruma, tanba Bíblia hatete: “Kuandu ema aat sira sai buras hanesan duʼut aat no ema neʼebé halo nafatin hahalok aat sai barak, ida-neʼe hodi sira bele lakon ba nafatin.”—Salmo (Mazmur) 92:7.

12, 13. Tanbasá mak ita bele dehan katak “koñesimentu neʼebé loos” sai barak iha “tempu ikus nia rohan”?

¹² Hanesan Bíblia fó-hatene nanis, loron ikus sira-neʼe nakonu ho susar. Maski nuneʼe, iha buat diʼak neʼebé akontese ba ema neʼebé adora Maromak Jeová.

¹³ Livru Daniel husi Bíblia fó-hatene nanis katak “koñesimentu neʼebé loos sei sai barak”. Bainhira mak ida-neʼe sei akontese? Durante “tempu ikus nia rohan”. (Daniel 12:4) Liuliu husi tinan 1914, Maromak Jeová ajuda ema neʼebé hakarak loos atu serbí nia hodi sira bele komprende didiʼak kona-ba Bíblia. Lia-loos husi Bíblia neʼebé sira aprende aumenta ba beibeik. Porezemplu, sira hatene lia-loos kona-ba Maromak nia naran, ninia hakarak, Jesus nia moris nuʼudar sakrifísiu neʼebé selu ita-nia sala, ema mate nia kondisaun, no moris-hiʼas. Buat seluk tan neʼebé sira aprende mak atu moris tuir dalan neʼebé halo sira kontente no fó glória ba Maromak. No mós, sira hatene ho klaru liu kona-ba oinsá mak Maromak nia Ukun sei hadiʼa problema hotu iha mundu neʼe. Saida mak sira halo ho lia-loos sira-neʼe? Pergunta neʼe lori ita ba buat seluk tan neʼebé Bíblia fó-hatene nanis kona-ba loron ikus sira-neʼe.

14. Liafuan diʼak kona-ba Maromak nia Ukun haklaken tiha ona toʼo neʼebé? Sé mak halaʼo serbisu haklaken neʼe?

¹⁴ Kuandu Jesus Kristu fó-hatene nanis kona-ba tempu neʼebé “mundu neʼe atu hotu”, nia hatete katak “ema sei haklaken liafuan diʼak kona-ba Maromak nia Ukun iha mundu tomak”. (Mateus 24:3, 14) Testemuña ba Jeová haklaken daudaun  liafuan diʼak kona-ba Ukun neʼe iha rai 235 liu no iha língua 600 liu, katak iha mundu tomak. Sira hanorin kona-ba Ukun neʼe katak sá, sei halo saida, no oinsá mak ema bele hetan bensaun husi Ukun neʼe. Testemuña ba Jeová neʼebé halaʼo haklaken neʼe hamutuk ema rihun ba rihun. Sira mai husi “nasaun, suku, povu no lian hotu”. (Apokalipse 7:9) Testemuña sira estuda Bíblia ho ema rihun ba rihun neʼebé hakarak hatene saida mak Bíblia loloos hanorin. Ema neʼebé estuda lalika selu. Buat sira-neʼe hotu hatudu katak Jesus nia liafuan sai loos ona. Ida-neʼe halo ita hakfodak, liuliu tanba Jesus mós fó-hatene nanis katak “ema hotu sei odi” ema kristaun loos!—Lucas 21:17.

15. (a) Ita fiar katak agora ita moris iha loron ikus sira ka lae? Tanbasá? (b) “Mundu nia rohan” katak sá ba ema neʼebé kontra hasoru Maromak Jeová no ba sira neʼebé hakruʼuk an ba Maromak nia Ukun?

¹⁵ Ita hatene duni katak buat barak neʼebé Bíblia fó-hatene nanis akontese daudaun. Tan neʼe, ita sente katak agora ita moris iha loron ikus sira, loos ka lae? Ema sei haklaken liafuan diʼak toʼo Maromak Jeová deside katak tempu toʼo ona, tuirmai “mundu nia rohan” sei mai. (Mateus 24:14) “Mundu nia rohan” mak kona-ba tempu neʼebé Maromak sei halakon buat aat hotu husi mundu neʼe. Maromak Jeová sei uza Jesus no ninia anju sira, neʼebé iha forsa boot, atu halakon sira hotu neʼebé kontra hasoru nia. (2 Tesalónika 1:6-9) Satanás no ninia anju aat sira sei la lohi tan nasaun sira. Tuirmai, Maromak nia Ukun sei haraik bensaun barak ba ema hotu  neʼebé hakruʼuk an ba ukun neʼe.—Apokalipse 20:1-3; 21:3-5.

16. Dalan matenek saida mak diʼak atu halo?

¹⁶ Tanba Satanás nia mundu besik atu ramata, importante atu husu ba ita-nia an: ‘Haʼu tenke halo saida?’ Dalan matenek mak kontinua atu aprende kona-ba buat neʼebé Maromak Jeová hakarak ita atu halo. (João 17:3) Sai badinas atu estuda Bíblia. Sai toman hodi halibur hamutuk ho ema seluk neʼebé buka atu halo tuir Maromak Jeová nia hakarak. (Ebreu 10:24, 25) Aprende beibeik husi buat hotu neʼebé Maromak Jeová fó ba ninia povu iha mundu tomak, no troka ita-nia hahalok hodi tuir buat neʼebé ita estuda. Hodi halo nuneʼe, ita sei fiar katak Maromak simu ita.—Tiago 4:8.

17. Derrepente deʼit, Maromak Jeová sei halakon ema aat hotu. Tanbasá mak ema barak liu la hatene kona-ba ida-neʼe?

¹⁷ Jesus fó-hatene nanis katak ema barak liu sei la iha interese kona-ba sinál neʼebé hatudu katak agora daudaun ita moris iha loron ikus sira. Derrepente deʼit, iha tempu neʼebé ema la hatene, Maromak Jeová sei halakon ema aat hotu. Ema barak liu la hanoin kona-ba akontesimentu neʼe, neʼebé sei toʼo mai hanesan naʼok-teen iha kalan. (1 Tesalónika 5:2) Jesus fó avizu hodi hatete: “Hanesan Noé nia loron, nuneʼe mós ho tempu neʼebé Oan-Mane husi ema toʼo ona mai. Iha loron sira neʼebá antes rai-nabeen, ema han no hemu, mane no feto sira kaben, toʼo loron neʼebé Noé tama ba ró laran. No sira lakohi rona toʼo rai-nabeen mosu no halakon sira hotu, nuneʼe mós sei mosu iha tempu neʼebé Oan-Mane husi ema toʼo ona mai.”—Mateus 24:37-39.

18. Ita tenke hanoin didiʼak kona-ba Jesus nia avizu saida?

 ¹⁸ Tan neʼe, Jesus fó-hatene ema neʼebé rona ba nia: “Kuidadu didiʼak imi-nia an bá, atu nuneʼe imi-nia laran la todan tanba han demais no hemu barak, no hanoin resin kona-ba moris neʼe, no derrepente deʼit loron neʼe monu ba imi hanesan lasu ida. Basá loron neʼe sei monu ba ema hotu neʼebé hela iha rai. Tan neʼe, matan-moris bá, no harohan bá iha tempu hotu, atu nuneʼe imi bele hetan salvasaun husi buat sira-neʼe hotu neʼebé fó-hatene nanis ona atu mosu, no atu Oan-Mane husi ema bele simu imi.” (Lucas 21:34-36) Importante atu ita hanoin didiʼak kona-ba Jesus nia liafuan hirak-neʼe. Tanbasá? Tanba ema neʼebé Maromak Jeová no ninia “Oan-Mane” Jesus Kristu simu, iha esperansa atu moris liu tempu neʼebé Satanás nia mundu aat neʼe sei lakon. Tuirmai, sira bele moris ba nafatin iha mundu foun neʼebé kapás tebetebes, neʼebé besik ona atu mai!—João 3:16; 2 Pedro 3:13.