RIKUSOIN bele lori diʼak ba ema nia moris, maibé lori mós susar oioin, liuliu iha mundu ohin loron neʼebé nakonu ho problema. (2 Timóteo 3:1-5) Iha rai barak, ema aat sira buka ema riku, inklui mós turista sira neʼebé haree hanesan ema riku, hodi hadau sira-nia osan, ka naʼok sira-nia oan no haruka sira selu osan barak atubele hetan fali sira-nia oan.

Notísias ida kona-ba rai kiak ida dehan: “Tanba mosu beibeik krime oioin hanesan hadau ema-nia rikusoin, naʼok labarik sira, ka lohi ema hodi naʼok sira-nia osan, ida-neʼe halo ema riku ho ema kiak sai inimigu ba malu. Restaurante barak tenke iha ema seguransa sira neʼebé kaer kilat, ema riku nia uma halo moru aas haleʼu ho arame, lampu, kámera, ho tan ema seguransa sira.” Situasaun hanesan neʼe kona mós rai barak ohin loron.

Maibé Bíblia hatete: “Ema kiak nunka hetan ameasa.” Liafuan neʼe hanorin saida mai ita? Se ita hela iha área neʼebé iha krime no violénsia barak, ka se ita bá pasiar iha fatin hanesan neʼe, diʼak liu kuidadu an hodi la halo ema hanoin katak ita mak ema riku ida. Hanoin didiʼak kona-ba ita-nia hatais no sasán neʼebé ita lori, liuliu se ita iha sasán ruma neʼebé bele halo ema seluk hakarak hadau ka naʼok. Provérbios (Amsal) 22:3 dehan: “Ema neʼebé matenek haree perigu no subar an, maibé ema neʼebé ladún iha esperiénsia kontinua laʼo no hetan susar.”

Liafuan matenek iha Bíblia laran neʼe haleno duni ita-nia Kriadór nia domin, tanba Nia lakohi ita hetan susar. Tuir eskritura iha Eclesiastes (Pengkhotbah) 7:12, ‘matenek bele proteje ema hodi halo nia moris nafatin’.