Jeni: Bondia, haʼu-nia naran Jeni. Mana nia naran saida?

Sofia: Haʼu naran Sofia.

Jeni: Ohin ami vizita ema atu fó tratu neʼe ba ema hotu. Neʼe iha títulu, Ita Hakarak Hatene Lia-loos ka lae?

Sofia: Karik mana bele fó ba ema seluk deʼit. Haʼu lakohi atu soe mana nia tempu.

Jeni: Tanbasá mak mana koʼalia hanesan neʼe?

Sofia: Tanba maski haʼu iha relijiaun ona maibé agora haʼu duvida ona kona-ba Maromak.

Jeni: Haʼu la mai atu obriga mana troka mana nia relijiaun. Maibé haʼu bele husu, saida mak halo Ita duvida kona-ba Maromak?

Sofia: Tanba haʼu-nia inan hetan asidente ho karreta iha tinan 17 liubá.

Jeni: Neʼe triste loos. Nia hetan kanek ka?

Sofia: Sin, agora nia la bele book an. Tan neʼe, haʼu sempre husu ba haʼu-nia an: Tanbasá mak Maromak husik ida-neʼe akontese? Se Maromak iha, tanbasá mak nia husik ita hotu terus?

Jeni: Ema barak mós husu pergunta sira-neʼe. No kuandu ita hetan terus, neʼe baibain deʼit atu husu tanbasá mak ida-neʼe akontese. Tuir loloos, ema balu iha Bíblia neʼebé adora Maromak, sira mós husu kona-ba neʼe.

Sofia: Tebes ka?

Jeni: Sin. Mana hakarak haʼu loke Bíblia atu hatudu ezemplu?

Sofia: Sin, haʼu hakarak.

Jeni: Iha mane ida iha Bíblia naran Habacuque. Haree toʼok buat neʼebé nia husu ba Maromak. Iha Habacuque (Habakuk) kapítulu 1, versíkulu 2 no 3, neʼe hatete: “Oh, Jeová, ba tempu hira mak haʼu tenke bolu atu husu ajuda, no Ita la rona haʼu? Ba tempu hira mak haʼu sei bolu Ita atu Ita salva haʼu husi violénsia, no Ita la salva haʼu? Tanbasá mak Ita hatudu buat neʼebé halo aat mai haʼu, no halo haʼu haree nafatin susar?” Pergunta sira-neʼe hanesan ho pergunta neʼebé mana mós husu ka lae?

Sofia: Sin, hanesan.

Jeni: Maibé Maromak la hirus Habacuque tanba nia husu pergunta sira-neʼe, no Maromak la duun Habacuque hodi dehan katak ninia fiar sai fraku.

Jeni: Bíblia hatete katak Maromak haree ita-nia terus no nia hanoin ita.

Sofia: Oinsá mak nia hanoin ita?

Jeni: Haʼu bele hatudu ezemplu iha Êxodo (Keluaran) 3:7. Mana bele lee eskritura ida-neʼe?

Sofia: Bele. Neʼe hatete: “No Maromak Jeová hatutan tan: ‘Haʼu haree loloos terus neʼebé haʼu-nia povu hasoru iha Egiptu, no haʼu rona tiha sira-nia lian halerik tanba ema hanehan sira atu halo serbisu; tanba haʼu hatene ho loloos terus neʼebé sira hasoru.’”

 Jeni: Obrigada. Entaun, tuir eskritura neʼe, Maromak haree ka lae kuandu ema hetan terus?

Sofia: Sin, nia haree.

Jeni: Loos. Maibé nia la haree deʼit husi dook ema nia terus. Lee fali iha parte ikus husi eskritura neʼe. Maromak hatete: “Haʼu hatene ho loloos terus neʼebé sira hasoru.” Liafuan sira-neʼe hatudu katak Maromak la dook husi ita kuandu hasoru terus, maibé nia hanoin tebes ita, loos ka lae?

Sofia: Sin, neʼe loos.

Jeni: Maibé kuandu Maromak haree ita-nia susar, nia mós sente triste. Mai ita lee eskritura ida tan neʼebé hatudu kona-ba neʼe iha Isaías (Yesaya) 63:9. Neʼe kona-ba tempu neʼebé Maromak nia povu hetan terus. Parte primeiru iha versíkulu neʼe hatete: “Durante sira-nia susar hotu, neʼe halo susar ba nia.” Mana hanoin oinsá? Tuir eskritura neʼe, kuandu Maromak nia povu hetan terus, neʼe kona Maromak nia laran ka lae?

Sofia: Sin, neʼe kona nia laran.

Jeni: Tuir loloos, Maromak hanoin tebes ita, no nia la gosta duni kuandu ita hetan terus. Kuandu ita hasoru susar, Maromak mós laran-susar.

Jeni: Karik iha buat ida tan neʼebé haʼu bele hatudu ba mana.

Sofia: Diʼak, bele.

Jeni: Hanoin toʼok kona-ba buat neʼebé Bíblia hatete kona-ba Maromak nia kbiit. Iha Jeremias (Yeremia) 10:12. Mana bele ajuda lee?

Sofia: Bele. Neʼe hatete: “Nia mak Ida neʼebé kria rai, liuhusi ninia kbiit, no Ida neʼebé halo rai neʼe metin, liuhusi ninia matenek, no Ida neʼebé kria lalehan liuhusi ninia matenek.”

Jeni: Obrigada. Entaun hanoin toʼok kona-ba eskritura neʼe. Maromak presiza kbiit boot atu kria lalehan no rai ka lae?

Sofia: Sin, nia presiza kbiit.

Jeni: Se Maromak iha kbiit atu kria buat hotu, neʼe katak nia mós iha kbiit atu kontrola buat neʼebé nia kria ka lae?

Sofia: Iha.

Jeni: Agora hanoin fali kona-ba mana nia inan. Tanbasá mak mana la gosta atu haree nia terus?

Sofia: Tanba nia mak haʼu-nia inan no haʼu hadomi tebes nia.

Jeni: No se mana iha kbiit atu halo nia isin diʼak fali, mana sei halo nuneʼe ka lae?

Sofia: Haʼu sei halo duni.

Jeni: Entaun, hanoin toʼok kona-ba neʼe: Ita foin aprende katak Bíblia hatete Maromak haree ita-nia terus no nia hanoin tebes ita. Nia mós iha kbiit neʼebé boot hodi hadiʼa. Maibé tanba Maromak seidauk hapara ita-nia terus maski nia iha hakarak, nia sei iha razaun diʼak atu kontrola ninia an hanesan neʼe ka lae?

Sofia: Haʼu seidauk hanoin kona-ba neʼe.

Jeni: Entaun razaun neʼebé Maromak seidauk hapara ita-nia terus mak saida? a

Sofia: Sin, ida-neʼe mak haʼu hakarak hatene.

Jeni: Karik haʼu bele mai fali iha tempu seluk no ita bele koʼalia liután kona-ba ida-neʼe.

Sofia: Obrigada. Haʼu hein.