Dala ruma ó iha kanek neʼebé moras hodi ó tanis ka lae?— a Karik ita hotu iha esperiénsia hanesan neʼe. Dala ruma ita la sente moras kona-ba kanek iha ita-nia isin-lolon. Maibé ita-nia laran mak sente kanek tanba ema koʼalia lia-bosok kona-ba ita. Ida-neʼe bele halo ita triste, loos ka lae?—Maromak mós bele sente laran-kanek kuandu ema bosok kona-ba nia. Mai ita aprende kona-ba oinsá mak ita bele halo Maromak kontente duké halo nia sente laran-kanek.

Bíblia hatete katak uluk ema balu neʼebé dehan katak sira hadomi Maromak, halo nia sente triste. Sin, sira hakanek Maromak nia laran! Mai ita haree tanbasá Jeová bele sente laran-kanek kuandu ita la halo tuir buat neʼebé nia hatete.

Ema naʼin-rua neʼebé Jeová kria uluk kedas iha rai halo nia laran-kanek tebes. Nia kria sira atu hela iha mundu neʼebé hanesan paraízu iha “jardín Eden.” Ema naʼin-rua neʼe mak sé?— Loos duni, neʼe mak Adão no Eva. Maibé saida mak sira halo hodi hakanek Jeová nia laran?

Depois Jeová tau sira iha jardín Eden, nia haruka sira atu tau matan ba fatin neʼe. Nia mós fó-hatene sira katak sira bele iha oan no hela hamutuk iha jardín Eden hodi moris ba nafatin. Maibé antes Adão ho Eva hetan oan, buat ruma neʼebé aat mak akontese. Ó hatene saida mak neʼe ka lae?— Anju ida mak book Eva no hafoin Adão atu kontra hasoru Jeová. Maibé oinsá?

Anju ida-neʼe halo samea ida haree hanesan nia bele koʼalia. Eva gosta buat neʼebé samea hatete. Nia dehan katak Eva bele sai hanesan Maromak.  Tan neʼe Eva halo buat neʼebé samea haruka nia atu halo. Saida mak neʼe?—

Eva han husi ai-hun neʼebé Jeová bandu ba Adão no Eva atu labele han. Antes Maromak kria Eva, nia hatete ba Adão: “Ai-fuan husi ai-hun hotu iha jardín neʼe ó bele han toʼo bosu. Maibé kona-ba ai-fuan husi ai-hun koñesimentu nian kona-ba diʼak no aat, ó labele han, tanba iha loron neʼebé ó han ai-fuan neʼe, ó sei mate.”

Eva hatene ona ukun-fuan ida-neʼe. Maibé nia hateke nafatin ba ai-hun no haree katak “ai-hun neʼe diʼak nuʼudar ai-han no katak neʼe mak buat neʼebé matan kaan . . . Tan neʼe nia kuʼu ai-fuan husi ai-hun neʼe no han.” Depois nia mós fó balu ba Adão, no “nia mós komesa atu han.” Tanbasá mak Adão halo hanesan neʼe?— Tanba Adão nia domin ba Eva mak boot liu fali nia domin ba Jeová. Adão hili rasik hodi halo Eva kontente duké Maromak. Maibé atu halo tuir Jeová mak importante liu fali halo tuir ema seluk!

Hanoin-hetan ka lae samea neʼebé koʼalia ba Eva? Hanesan ho ema ida neʼebé bele book boneka hodi haree katak nia bele koʼalia, iha ida neʼebé mós bele halo samea haree hanesan nia bele koʼalia. Maibé lian neʼebé samea uza mak sé nian?— Lian ida-neʼe mak “samea uluk nian, neʼebé ema hanaran Diabu eh Satanás.”

Ó hatene oinsá mak ó bele halo Maromak kontente ka lae?— Ita bele halo nuneʼe hodi sempre halo tuir Maromak. Satanás dehan katak nia bele halo ema hotu tuir deʼit nia hakarak. Tan neʼe Jeová husu ita: “Haʼu-nia oan, sai matenek bá, no halo haʼu-nia laran kontente, atu haʼu bele hatán ba ida neʼebé koʼalia aat mai haʼu.” Satanás koʼalia aat Jeová. Nia hatete katak nia bele halo ema hotu la serbí tan nia. Tan neʼe, mai ita halo Jeová kontente hodi halo tuir no serbí nia! Ó sei hakaʼas an hodi halo nuneʼe ka lae?—