Kporom hen Aôndo

Ngu Orjir u Eren Kwagh sha Mimi Hanma Shighe

Genese 18:22-32

AEREN a dedoo er ijirôron i mimi man perapera man msange u sangen ior sha dooshima ga la doo u ga he? Se due a isharen i soon ser i er kwagh a vese sha mimi la ken uya je. Kpa kwagh er vihi yô, ieren i mimi ban ken tar u ainge ne kpen kpen. Nahan kpa, Orjir ugen ngu u a kom u se na un jighjigh yô. Orjir shon yô ka Yehova Aôndo. Eren kwagh sha mimi hanma shighe. Kwaghôron u Yehova vea Aberaham, u i nger ken Genese 18:22-32 la tese wang ér eren kwagh sha mimi hanma shighe. *

Zum u Yehova kaa a Aberaham wener Un soo u tôvon fan akaa a á lu zan hemen ken Sodom man Gomora yô, ishima i za Aberaham iyol ér alaghga tsô á tim ma orperapera u nan lu ken gar la kua anmgbian na Loti kpaa. Tsô Aberaham zamber a Yehova ér: “Ú tim orperapera a orifer imôngo? Alaghga mbaperapera vea lu ken gar la akunduahargber, nahan kpaa Ú tim ijiir la, Ú tsegha i sha ci u mbaperapera mba akunduahargber la gaa?” (Ivur 23, 24) Aôndo kaa ér aluer un zua a mbaperapera 50 yô una tim agar la ga. Aberaham shi zamber a Yehova kwa taan, nahan a pande iyenge la zan zan hingir mbaperapera 10 tseegh. Hanma kwa yô, Aôndo lu kaan a Aberaham ér aluer un zua a mbaperapera mba a lu zamber sha ci ve la yô, una tim agar la ga.

Aberaham yange lu nyiman kwagh a Aôndo shinii? Mayange ga! Yange a lu nahan yô, ma lu imanger i hemban cii. Gbenda u Aberaham ôr kwagh la tese icivir man iyol hiden a mi ijime. A kaa ér un ngu di “inya kua mtwem tsô.” (Ivur 27) Heela tseegh ga, kwaghôron u Aberaham la tese ér yange lu a vangertiôr ér Yehova una er kwagh u vough. Aberaham kaa wener “tuna” u Aôndo nahan a̱ tim mbaperapera a mbaaferev imôngo je, man a kimbir ishember ne kwa har. Tertamen u jighjigh ne tese er un lu a vangertiôr ér “Orjirigh u tar cii” una “er vough” yô.—Ivur 25.

Akaa a Aberaham ôr la lu shamini? Een man ei. Mnenge u Aberaham lu a mi ér a̱ hemba kpa a zua a mbaperapera pue ken Sodom man Gomora la lu mimi ga. Kpa yange gema ôr kwagh shami zum u a kaa ér mayange Aôndo una “tim orperapera a orifer imôngo” ga la. Zum u Aôndo va tim agar a ifer ne la, orperapera Loti man ônov nav mba kasev uhar war sha iwasen i mbatyomov.

Ngeren ne tese se nyi sha kwagh u Yehova? M-er u Yehova ôr a Aberaham ér un wa ishima u za nengen kwagh u a lu zan hemen ken agar ne la tese ér yange soo ér Aberaham a ôr mnenge na sha kwagh ne. Tsô a kegh ato zulee a huror na Aberaham á ungwa ishimanyian na sha kwagh u mtim u agar ne la. (Yesaia 41:8) Nenge imba er iliam i Yehova a Aberaham ne i̱ tese se ér Yehova ka Aôndo u hiden a iyol ijime u a eren kwagh a mbacivir un mba shin tar ne sha icivir sha wono! Sha kpôô yô, se mba a atôakyaa kpishi a se suur sha Yehova a ishima yase cii yô, gadia ngu Orjir u a eren kwagh u vough hanma shighe cii yô.

[Ngeren u shin kpe]

[Foto u sha peeji 20]

Aberaham zamber a Yehova sha kwagh u mtim u Sodom man Gomora