“ʻOku totonu ke mou hoko ko e kau faiako.” (Hep. 5:12) Sioloto atu! Ko Sihova​—ʻa e Faiako lelei taha ʻi he ʻunivēsí—​ʻokú ne fakaafeʻi kitautolu ke tau akoʻi ʻa e niʻihi kehé fekauʻaki mo ia! Ko ha vāhenga-ngāue pē ke akoʻi ʻa e moʻoni fekauʻaki mo Sihová​—ʻi he fāmilí, ʻi he fakatahaʻangá pe ʻi he ngāue fakamalangá—​ko ha monū mahuʻinga mo ha fatongia mafatukituki ia. ʻE lava fēfē ke tau lavameʻa?

Ko e talí ʻoku maʻu ʻi he ngaahi lea naʻe hiki ʻe he ʻapositolo ko Paulá kia Tīmoté: “Hokohoko atu hoʻo kīvoi ʻi he lautohi ʻi he ʻao ʻo e kakaí, ʻi he ekinakí, ʻi he faiakó.” Naʻe tānaki atu ʻe Paula: “ʻI hono fai ení te ke fakatou fakahaofi ai koe mo e faʻahinga ko ia ʻoku nau fanongo atu kiate koé.” (1 Tīm. 4:13, 16) ʻOkú ke maʻu ha pōpoaki fakahaofi moʻui ke vahevahe atu. Ko ia ʻoku mātuʻaki mahuʻinga ke ke ngāue ke fakaleleiʻi hoʻo lautohí mo e faiakó. Ko e polosiua ko ení kuo faʻu ia ke ne tokoniʻi koe ke fai pehē. Fakakaukau ki he niʻihi ʻo hono ngaahi tafaʻakí.

Ko Sihova ʻa e “Faiako Maʻongoʻongá.” (ʻAi. 30:20) Neongo ko e polosiua ko ení te ne tokoniʻi koe ke fakaleleiʻi hoʻo pōtoʻi ko ha tokotaha lautohí mo e faiakó, ʻoua naʻa ngalo ko Sihova ʻa e Matavai ʻo ʻetau pōpoakí pea ko ia ʻokú ne tohoaki mai ʻa e kakaí. (Sione 6:44) Ko ia ai, lotu maʻu pē ʻo kole ʻa e laumālie māʻoniʻoní. Ngāueʻaki maʻu pē ʻa e Folofola ʻa e ʻOtuá. Tohoaki ʻa e tokangá kia Sihova, kae ʻikai kiate koe. Feinga mālohi ke langa hake ʻi he loto ʻa hoʻo kau fanongó ha ʻofa loloto kiate ia.

Kuo fakaafeʻi koe ke ke akoʻi ʻa e pōpoaki mahuʻinga taha kuo faifai ange pea ʻoange ki he faʻahinga ʻo e tangatá. ʻOku mau tuipau ʻi hoʻo falala ki he “mālohi ʻoku tokonaki mai ʻe he ʻOtuá,” te ke lavameʻa.​—1 Pita 4:11.

Mei homou kaungāfaiako,

Kulupu Pule ʻo e Kau Fakamoʻoni ʻa Sihová