“Adamu wakaulika izina lyamukaakwe kuti ngu-Eva, nkaambo mbebanyina baumi boonse.” —Matalikilo 3:20.

NZYOBAAMBA BASYAAZIBWENE

Ibamucibeela ca Lukamantano Lwazisi Icilanganya Lwiiyo, Sayaansi Alimwi Azilengwa bakaamba kuti: “Bantu boonse bakazwa kumusyobo omwe alimwi bakazyalwa kumuntu omwe.”—Oobo mbolyaamba bbuku lyakuti Declaration on Race and Racial Prejudice, 1978.

NCOLYAAMBA BBAIBBELE

Leza wakalenga bantu bobilo, Adamu a Eva, mpoonya wakabaambila kuti: “Amuzyalisye, muvule, muzuzye nyika akwiibombya.” (Matalikilo 1:28) Aboobo, ba Adamu a Eva bakaba bazyali babantu boonse. Mpoonya izambangulwe nolyakanyonyoona bantu anyika, banabukwetene bone bakafwutuka. Aaba bakali ba Nowa amukaintu wakwe, bana bakwe botatwe kubikkilizya abamakaintu babo. Ibbaibbele liyiisya kuti toonse twakazwa kubana ba Nowa.—Matalikilo 9:18, 19.

“Kuzwa kumuntu omwe [Leza] wakalenga bantu ibali muzisi zyoonse kuti bakkale munyika.”—Milimo 17:26.

NZYOBAAMBA BAMWI

Mumwaanda wamyaka wa 20, nkamu zili mbozibede azyalo zyakatalika kusalana mubala. Mucikozyanyo, nkamu ya Nazi yakaamba kuti kwakali twaambo twakali kubapa kusyoma kuti kuli misyobo iinda misyobo iimwi. Kulubazu lumwi, kweelana amakani aambwa kale ngobakalemba ibamucibeela ca Lukamantano Lwazisi Icilanganya Lwiiyo, Sayaansi Alimwi Azilengwa, bakazumina kuti kuyandika “kukamantanya misyobo yoonse yabantu calo ciyakupa kuti bantu boonse beelane.”

NCOLYAAMBA BBAIBBELE

Lugwalo lwa Milimo 10:34, 35 lwaamba kuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.” Akaambo kamajwi aaya, taakwe weelede kusumpula musyobo umwi kwiinda misyobo iimbi.

Jesu wakaamba njiisyo Banakristo boonse njobeelede kutobela naakaambila basikwiiya bakwe kuti: “Nyoonse muli babunyina.” (Matayo 23:8) Wakapailila kuti basikumutobela bakamantane alimwi akuti “babe bamwi cakulondola,” ikutali kwaandaana.—Johane 17:20-23; 1 Bakolinto 1:10.

“Kumamanino aaciindi cilundu caŋanda ya-Jehova ciyooimikwa . . . , nkabela masi oonse anooya bukunka kulincico.”—Isaya 2:2.

MBOBAYEEYA BAMWI

Muzisi zinji mazwanga aacitika akaambo kakusalana mubala apa bantu kudooneka ikuti naa banamaleya babweza ntaamu ziyandika kutegwa bamane penzi eeli. Ibamwi baamba kuti misyobo yabantu kunyina noiyooyelana pe.

NCOLYAAMBA BBAIBBELE

Leza takalekeli kuti kusalana mubala kuzumanane. Muciindi caboobo, mubweendelezi bwakwe, baalumi alimwi abamakaintu “ibazwa muzisi zyoonse, mumisyobo yoonse, mumikowa yoonse alimwi amumilaka yoonse,” bayoomubelekela calukamantano alimwi kabatondezya luyando lwini-lwini kuli umwi amweenzinyina. (Ciyubunuzyo 7:9) Bwami bwa Leza tabuli bube buyo bwamumoyo wamuntu. Pele nimfwulumende iiyoocinca zintu munyika, busena Leza mbwaakakanzide kuti bantu boonse bakakkale kakunyina kusalana mubala. *