Mudolopo lya Los Angeles ku California, malobboti aali 4,500, akabikkwa munzila iipa kuti myootokala kaitavwuli kapati abusena bomwe cakuti kayaalilwa kweenda. Malobboti aaya akabikkwa mumigwagwa yoonse yamudolopo, ikuti naa twaiswaanganya ilampa makkilomita aali 1,215. Muteende wa The New York Times, wakaamba kuti, Los Angeles “ndedolopo lipati lyakusaanguna munyika yoonse kucita boobo.”

Mubuvwuntauzi ibwakacitwa munyika yoonse akati kamwaka wa 1990 alimwi awa 2010, kwakajanika kuti mweelwe wabantu baneneede cakuzwa munzila wayungizyigwa a 82 pesenti. Nokuba kuti bantu bafwa akuneneya kuli boobu mbanji ziindi zyotatwe kwiinda baabo bafwa abulwazi buboola akaambo kakutalya zilyo zyeelede, aciindi nciconya, kubula cakulya cikkwene licili penzi muzisi zinji. Syaazibwene wazina lya Majid Ezzati, wakaamba kuti: “Mubwini, mumyaka iili 20 yainda bantu tiibakali kujana cakulya cikkwene, pele lino kuvwula kwazyakulya izitali kabotu, nomuba mumasi aatavwubide, kwatalika kutupa kuciswa.”

Muyuni uutegwa albatross, uuyeyeelwa kuti “ngomuyuni wapona myaka minji kwiinda bayuni boonse bamusyokwe,” wakakonkona akambi kana. Ino muyuni ooyu ulaamyaka yongaye? Basayaansi bakamujata ciindi cakusaanguna naakajisi myaka yosanwe mu 1956, kutegwa bamubikke kancini kakonzya kubagwasya kuzyiba nkwabede. Eeci caamba kuti lino ujisi myaka iinda ku 60. Mubuumi boonse bwamuyuni ooyu kuyeeyelwa kuti wauluka makilomita aali akati ka 3 a 4 miliyoni, alo aayelene anyendo zyone kusikila aali zili cisambomwe zyakuya kumwezi akupiluka.

Buvwuntauzi bumwi butondezya kuti ku South Africa akati kabamakaintu botatwe omwe ulabelesya nsipa naa misamu iipa kusalala lukanda. Misamu iili boobo iletela mapenzi alimwi yakakasyigwa kale muzisi zili mbozibede. Mapenzi aayo abikkilizya bulwazi bwakkansa, kunyonyooka nsa, kutyompwa, kulibilika, kuzwa tukoto-koto alimwi akuba azibata.