Cikozyanyo “Camusimbi Muna Israyeli”

KAKUCEEDE buyo nsondo zyobile kuti Ciibalusyo calufwu lwa Jesu cicitike mumwaka wa 2006, bamukwasyi waba Sales bakkala mudolopo lya Praia Grande ku Brazil, bakalemba mulongo wabantu mbobakali kuyanda kutamba ku Ciibalusyo. Abigayl ulaamyaka yakuzyalwa iili cisambomwe wakapegwa pepa lyakutamba bantu alimwi bakamubuzya naa nguni ngwaakali kuyanda kutamba.

Wakamvwiila kuti: “Ndiyanda kutamba babaya badaala bayandisya kumweta-mweta bandibona.”

Bazyali bakwe bakabuzya kuti: “Ino mbaani aabo mboamba?”

Wakati: “Mbaabaya babelesya ncinga yabalema.”

Nokwakainda mazuba one, Abigayl wakabatondezya bazyali bakwe badaala mbaakali kwaamba. Izyina lyabo mba Walter alimwi bakali kukkala afwaafwi a Ŋanda ya Bwami. Kwainda myaka iili 15 kuzwa nibakajanika muntenda yamumugwagwa yakabapa kuti balemane kuzwa munkanya kusika kumaulu kabali amyaka iili 28. Akaambo kakuti bakali bavwubi, bakalijisi babelesi bobile bakali kubasindikila kuli koonse. Nobakazumizyigwa kuti Abigayl aambaule abadaala aaba, bazyali bakwe bakapandulula kuti mwanaabo uyanda kubapa kapepa kakubatamba ku Ciibalusyo.

Nibakamana kubandika, Abigayl wakaamba kuti: “Boonse mbotuswaangana limwi mu Ŋanda ya Bwami iilya balijisi mapepa manji aakutamba bantu, pele mebo ndajisi buyo eeli ndendamupa. Ndinywe molikke ngondatamba. Ikuti mutakabooli, ndiyakutyompwa. Pele ndiya kukkomana kapati mwaakuboola, awalo Jehova uyakukkomana kwiinda.

Ibuzuba bwa Ciibalusyo Bakamboni antoomwe a Abigayl bakali kusalazya Ŋanda ya Bwami ikulibambila Ciibalusyo mangolezya. Imasikati ba Walter nibakali kwiinda amootokala, bakabona Abigayl akwaambila wakali kweenzya mootokala kuti aime. Mpoona bakajalula mpulungwido akubuzya Abigayl ncaakali kucita. Abigayl wakavwiila kuti basalazya Ŋanda ya Bwami kutegwa baboola bajane kaisalala.

Imangolezya Abigayl wakali kabalangila ba Walter. Makani naakatalika, Abigayl wakali kulanga-langa kutegwa abone naa ba Walter basika kale. Mpoonya ba Walter bakanjila ababelesi babo. Eeci cakamukkomanisya kapati Abigayl cakuti wakali kwiile kumweta-mweta. Nowakamana muswaangano, ba Walter bakaamba kuti bakalibambide kuya kudolopo imwi bamane bakacinca maano akuya ku Ciibalusyo akaambo ka Abigayl. Mpoonya bakati: “Aaya ngamakani ngondali kuyanda kumvwa.” Bakalomba Bbaibbele alimwi bakatalika kwiiya Bbaibbele akujanika kumiswaangano.

Aciindi ncimunya eeci, mucizyi waba Walter wakaamba kuti wakali kuyanda kubonana a Abigayl akaambo kakuti wakamvwa bapati bakwe mbubaakali kumwaamba-amba. Nibakabonana a Abigayl wakakkomana kapati akaambo kakuti wakali kulilemeka kabotu. Mpoonya wakati: “Lino ndazyiba ncakkomeni boobu mukwesu.”

Ba Walter bazumanana kwiiya Bbaibbele alimwi akuswaangana. Balatola lubazu mumiswaangano alimwi balabaambila bamwi nzyobaiya. Masimpe Abigayl utuyeezya musimbi muna Israyeli wakagwasya Naamani kuti amuzyibe Jehova, Leza wakasimpe.—2 Bami 5:2-14.