Sena Jesu ngu Leza Singuzuzyoonse?
Sena Jesu ngu Leza Singuzuzyoonse?
Bantu banji mbobaingula:
▪ “Ee, Jesu ngu Leza Singuzuzyoonse.”
▪ “Leza wakaboola anyika kwiinda muli Jesu.”
Ino ncinzi Jesu ncakaamba?
▪ “Kuti nomwali kundiyanda, nomwali kukondwa nkaambo nja kuli-Taata, nkaambo Taata mupati kwiinda ndime.” (Johane 14:28) Jesu wakaamba kuti walo a Bausyi tabeelene.
▪ “Ndatanta kuli-Taata akuli-Uso, kuli-Leza wangu akuli-Leza wanu.” (Johane 20:17) Jesu kunyina naakaamba kuti wakali Leza, pele wakaamba kuti Leza uliindene anguwe.
▪ “Nsilyaambilide ndemwini, pele Taata uwakandituma, nguwakandilailila mbwenjeelede kwaamba ambwenjeelede kukanana.” (Johane 12:49) Nzyaakali kuyiisya Jesu tiizyakali zyakwe; zyakali zya Bausyi.
JESU wakaamba kuti Mwana wa Leza ikutali kuti ngu Leza Singuzuzyoonse. Ikuti Jesu ngu Leza, ino wakali kupaila kuli ni naakali anyika? (Matayo 14:23; 26:26-29) Masimpe inga tiiceelela kuyeeya kuti Jesu wakali kulicengeezya kuti waambaula amuntu umwi.
Ciindi basikwiiya ba Jesu bobilo nobakamulomba kuti abape zyuuno zyabulemu mu Bwami bwakwe, wakabavwiila kuti: “Kukkala kubbazu lyalulyo antela kulumwensi lwangu, teensi ndime eempa pe. Ngu Taata uyoopa mabazu aayo kuli baabo mbaakasala.” (Matayo 20:23, BT) Sena Jesu wakababeja basikwiiya bakwe naakabaambila kuti tanaakajisi nguzu zyakubapa ncobakali kuyanda? Peepe! Muciindi caboobo, wakali kutondezya kuti Leza alikke nguujisi nguzu zyakucita boobo. Mane buya Jesu wakaamba kuti kuli zyintu zimwi walo nobaba bangelo nzyobatazyi ccita buyo Bausyi.—Marko 13:32.
Sena Jesu wakali buyo muniini kuli Leza naakali anyika? Peepe. Noliba leelyo naakafwa akubusyigwa, Ibbaibbele lyaamba kuti Jesu muniini alimwi ulalibombya kuli Leza. Mwaapostolo Paulo utuyeezya kuti “mutwe wa-Kristo ngu-Leza.” (1 Ba-Korinto 11:3) Ibbaibbele lyaamba kuti kumbele zyintu zyoonse zyaakubikkwa mumaanza aa Kristo “alakwe Mwana mwini [naa Kristo] uzoolibombya kuliyooyo iwakamubombesezya zintu zyoonse, kuti Leza abe malondwedo aazintu zyoonse.”—1 Ba-Korinto 15:28.
Aboobo, Jesu tali Leza Singuzuzyoonse. Nkakaambo kaako Jesu ncaakabaamba Bausyi kuti “Leza wangu.”—Ciyubunuzyo 3:2, 12; 2 Ba-Korinto 1:3, 4. *
Bupanduluzi buyungizidwe
^ munc. 12 Kuti kamuyanda twaambo atumbi kujatikizya makani aaya, amubone mapeeji 201-204 mubbuku lyakuti, Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.
Majwi aakwelelezya sikubala aali apeeji 7]
Jesu wakaamba kuti kuli zyintu zimwi walo nobaba bangelo nzyobatazyi ccita buyo Bausyi