Sena Zikombelo Zyoonse Nzibotu Kuli Leza?

Bantu banji mbobaingula:

▪ “Nokuba kuti kuli zikombelo zinji, Leza uukombwa ngumwi.”

▪ “Kunyina makani ancosyoma, iciyandika nkuba alusyomo.”

Ino ncinzi Jesu ncaakaamba?

▪ “Amunjile mumulyango uumanikide, nkaambo mulyango uukwazeme anzila impati njiitola kukunyonyooka, nkabela abo banjila mulinjiyo mbanjibanji. Mulyango uumanikide anzila iipatide njiitola kubuumi, nkabela abo biijana mbace.” (Matayo 7:13, 14) Jesu tanaakali kusyoma kuti zikombelo zyoonse nzibotu kuli Leza.

▪ “Kubuzuba obo banjibanji bayoondaambila kuti, Mwami, mwami, sa teetwakasinsima kuzina lyako? Alimwi, sa teensi kuzina lyako nkutwakatanda badaimona? Sa teensi kuzina lyako nkutwakacita milimo mipati minji? Lino nzoobaambila kuti, Nsimuzi pe, amuzwe kulindime inywe nubamucita zibi.” (Matayo 7:22, 23) Tabali boonse ibalyaamba kuti balamutobela mbatambula Jesu.

BAKOMBI banji balazibikkila maano zyintu nzyobasyoma atunsiyansiya. Pele ino ncinzi cicitika ikuti nzyobasyoma kazyiteendelani azili mu Jwi lya Leza Ibbaibbele? Jesu wakatondezya bubi bukonzya kuba akaambo kakutobela tunsiyansiya naakali kwaambila basololi bazikombelo bamuciindi ncaakali kupona naakati: “Mulobya Mulao wa-Leza kuciyanza canu.” Mpoonya wakazubulula majwi aaya aa Leza aakuti: “Bantu aba balandilemya amilomo yabo, nekubaboobo myoyo yabo ili kule ambe. Kukomba kwabo nkwabuyo, nkaambo balafunda zifundo zyamilao yabantu.”—Matayo 15:1-9; Isaya 29:13.

Kulilemeka akwalo kulayandika ikutali buyo kubikkila maano zyintu nzyotusyoma. Ibbaibbele lyaamba bantu bamwi balyaamba kuti bakomba Leza kuti: “Balalyaamba kuti, Tulizi Leza, anu kumilimo yabo balamukazya.” (Tito 1:16) Masimpe, Ibbaibbele lyaamba bantu bapona muciindi cesu kuti: “Bayandisya misalo yaansi kwiinda Leza, balijisi ciwa cabukombi pele inguzu zyambubo balazikazya. Eno kobafutatila bali bobuya.”—2 Timoteo 3:4, 5.

Kukomba camoyo woonse kulayandika, pele kuli azimbi ziyandika. Nkaambo nzi? Nkaambo kakuti muntu inga kakomba camoyo woonse pele kataluzi. Aboobo iluzyibo lwini-lwini lwa Leza lulayandika. (Ba-Roma 10:2, 3) Ikuba aluzyibo luli boobu akucita zyintu kweelana ancolyaamba Bbaibbele kulakonzya kutugwasya kukkomanisya Leza. (Matayo 7:21) Aboobo, cikombelo camasimpe ceelede kupa kuti bantu babe amakanze mabotu, kusyoma zyintu zyamasimpe akucita milimo mibotu. Ikuba amilimo mibotu caamba kucita kuyanda kwa Leza lyoonse.—1 Johane 2:17.

Ikuti kamuyanda kuzyiba ncoliyiisya Bbaibbele kujatikizya Leza, amubonane a Bakamboni ba Jehova kutegwa batalike kwiiya Bbaibbele andinywe kuŋanda yanu.

Majwi aakwelelezya sikubala aali apeeji 9]

Cikombelo camasimpe ceelede kupa kuti bantu babe amakanze mabotu, kusyoma zyintu zyamasimpe akucita milimo mibotu