1, 2. Yumi inap painim we ples hait long nau?

TINGIM olsem yu wokabaut long rot long taim nogut. Skai i go tudak moa. Laitning i sut, klaut i pairap, na nau bikpela ren i pundaun. Yu ran i go na traim long painim ples hait. Long arere bilong rot yu lukim wanpela haus yu ken hait long en. Haus i strong, drai, na i gutpela long stap long en. Yu amamas tru long dispela ples hait!

² Yumi stap long taim nogut. Ol samting i kamap long graun i wok long i go nogut moa. Tasol i gat wanpela ples hait i stap, em inap lukautim yumi na maski hevi i painim yumi, hevi i no inap bagarapim yumi i go inap long oltaim oltaim. Em wanem ples hait? Baibel i tok: “Bai dispela man i tok long Bikpela olsem, ‘Yu save banisim mi na yu was gut long mi. Yu God bilong mi. Mi save bilip long yu.’”​—Song 91:2.

3. Olsem wanem Jehova inap kamap ples hait bilong yumi?

³ Tingim dispela! Jehova, Man Bilong Wokim olgeta samting na King bilong heven na graun, em i ples hait bilong yumi. Em inap  lukautim yumi, long wanem, em i gat bikpela strong, winim olgeta man na olgeta samting inap birua long yumi. Maski yumi kisim bagarap, Jehova inap tekewe ol samting nogut dispela bagarap i kamapim. Olsem wanem Jehova inap kamap ples hait bilong yumi? Yumi mas bilip long em. Na tu, Baibel i tokim yumi: “Yupela i mas i stap klostu long [God] na larim em i laikim yupela oltaim.” (Jut 21) Em nau, yumi mas i stap insait long laikim bilong God, olsem holimpas dispela pasin bilong pas gut wantaim Papa bilong yumi long heven. Taim yumi mekim olsem, yumi ken bilip tru olsem em i ples hait bilong yumi. Tasol olsem wanem yumi inap pas gut wantaim em?

4, 5. Long wanem ol rot Jehova i soim olsem em i laikim tru yumi?

⁴ Bilong yumi ken stap insait long laikim bilong God, yumi mas kliagut long ol samting Jehova i bin mekim bilong soim olsem em i laikim tru yumi. Tingim sampela tok bilong Baibel yu bin lainim long rot bilong dispela buk. Jehova em i Man Bilong Wokim olgeta samting, na em i bin givim graun long yumi olsem gutpela ples yumi ken i stap long en. Em i bin putim long graun planti kaikai na wara, ol gutpela samting insait long graun, ol animal, na ol naispela plaua, maunten, na solwara samting. God em i As bilong ol tok bilong Baibel na long rot bilong en, em i kamapim nem na ol pasin bilong em long yumi. Na tu, Baibel i kamapim klia olsem em i salim dispela wanpela Pikinini bilong em i kam long graun, em i larim Jisas i karim pen na i dai bilong helpim yumi. (Jon 3:16) Dispela presen i mekim wanem long yumi? Dispela presen i mekim na yumi bilip na wetim ol gutpela samting tru bai kamap bihain.

⁵ God i bin mekim narapela samting tu na long dispela as yumi inap kisim ol gutpela samting long bihain. Jehova i bin kamapim wanpela kingdom long heven, em Kingdom Bilong Mesaia. Klostu nau dispela Kingdom bai pinisim olgeta pen na hevi na mekim dispela graun i kamap wanpela paradais. Tingim dispela! Yumi ken i stap bel isi na amamas oltaim long dispela Paradais. (Song 37:29) God i givim ol gutpela tok long yumi  bilong helpim yumi long wokabaut long nambawan gutpela rot long nau. Na tu, beten em i narapela presen em i bin givim long yumi, na olgeta taim rot i op long toktok wantaim em. Ol dispela samting em sampela rot tasol Jehova i bin soim olsem em i laikim tru ol lain manmeri na em i laikim yu tru.

6. Pasin bilong Jehova long laikim yu inap kirapim yu long mekim wanem?

⁶ Yu mas tingim dispela bikpela askim: Pasin laikim bilong Jehova i kirapim mi long mekim wanem? Planti bai bekim dispela askim olsem: “Mi mas laikim tru Jehova.” Yu save pilim olsem? Jisas i tok dispela em i nambawan bikpela lo: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.” (Matyu 22:37) I gat planti as na yu mas laikim tru God Jehova. Tasol olsem wanem? Pasin bilong pilim olsem yu laikim tru Jehova, dispela tasol i makim olsem yu laikim em long bel na tingting na strong olgeta bilong yu?

7. Pasin bilong laikim tru God i wanpela samting yumi pilim long bel na em tasol? Stori long dispela.

⁷ Olsem Baibel i kamapim, pasin bilong laikim tru God i no wanpela samting yumi pilim tasol long bel. Tru, em i bikpela samting long yumi laikim tru Jehova long bel bilong yumi, tasol dispela em i kirap tasol bilong pasin bilong laikim em tru tru. Sid bilong apol i bikpela samting bilong kamapim wanpela diwai apol i save karim kaikai. Tasol sapos yu laikim wanpela apol, bai yu amamas sapos wanpela i givim yu sid tasol bilong apol? Nogat tru! Na olsem tasol, taim bel i kirapim yumi long laikim tru God Jehova, dispela samting tasol i no inap. Baibel i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:3) Pasin bilong yumi long laikim tru God i mas kamapim ol gutpela kaikai. Ol samting yumi mekim i mas kamapim klia dispela samting.​—Matyu 7:​16-20.

8, 9. Yumi ken mekim wanem bilong soim olsem yumi laikim tru God na tok tenkyu long em?

 ⁸ Yumi soim olsem yumi laikim tru God taim yumi bihainim ol lo na stiatok bilong em. I no hatwok tumas long mekim olsem. Ol lo bilong Jehova i no putim hevi long yumi, nogat, ol i helpim yumi long i stap amamas na belgut. (Aisaia 48:​17, 18) Taim yumi larim Jehova i stiaim wokabaut bilong yumi, yumi soim Papa bilong yumi long heven olsem yumi amamas tru long ol samting em i bin mekim bilong helpim yumi. Sori tru, planti man long nau i no save soim olsem ol i pilim gutpela pasin bilong God. Yumi no laik mekim dispela kain pasin, olsem sampela man i bin mekim em ol i bin stap long taim Jisas i stap long graun. Jisas i oraitim 10-pela man i gat sik lepra, tasol wanpela tasol i kam bek na tok tenkyu long em. (Luk 17:​12-17) Yumi laik bihainim pasin bilong dispela man, yumi no laik bihainim pasin bilong 9-pela narapela man i no tok tenkyu!

⁹ Orait yumi mas bihainim wanem ol lo bilong Jehova? Nau yumi ken skelim gen sampela bilong ol em yumi bin skelim pinis long dispela buk. Pasin bilong bihainim ol lo bilong God bai helpim yumi long stap insait long laikim bilong em.

10. Stori long as na em i bikpela samting long yumi mas wok oltaim long kisim save long God Jehova?

¹⁰ Pasin bilong kisim save long Jehova em i wanpela bikpela samting i helpim yumi long i go klostu long em. Em i wanpela pasin yumi no ken lusim. Sapos yu stap ausait long wanpela nait i kol nogut tru na yu go klostu long paia bilong hatim skin bilong yu, yu ting bai yu larim paia i go liklik na dai? Nogat. Bai yu tromoi sampela paiawut long en bambai paia i lait bikpela na hat. Sapos yu no mekim olsem, ating laip bilong yu inap lus! Paiawut i mekim paia i stap strong, na olsem tasol pasin bilong “save gut long God” i strongim pasin bilong yumi long laikim tru Jehova.​—Sindaun 2:​1-5.

11. Tok bilong Jisas i mekim wanem long ol disaipel bilong em?

¹¹ Jisas i laik bai ol disaipel bilong em i lukautim pasin bilong ol long laikim Jehova na tok i tru bilong Em na bai dispela pasin i stap strong tru. Bihain long Jisas i kirap bek, em i lainim tupela disaipel bilong em long sampela tok profet bilong Ol Skripsa Hibru em tok bilong ol i kamap tru long em. Dispela i mekim wanem long ol? Bihain ol i tok: “Tru tumas, taim mitupela i wokabaut long rot, na em i givim toktok long mitupela, na em i autim as tingting bilong buk bilong God long mitupela, bel bilong mitupela i bin kirap tru.”​—Luk 24:32.

12, 13. (a) Olsem wanem long pasin bilong laikim God na Baibel long nau? (b) Yumi ken mekim wanem na pasin laikim bilong yumi i no ken pinis?

¹² Olsem wanem? Taim yu kisim stretpela save long tok bilong Baibel long namba wan taim, yu pilim bikpela amamas, na yu gat laik bilong mekim wok, na pasin bilong laikim tru God? Ating yu pilim olsem. Planti man i bin pilim olsem. Orait nau em i bikpela samting long lukautim dispela pasin laikim na mekim i kamap strong moa. Yumi no laik bihainim pasin bilong ol man bilong graun long nau. Jisas i tok profet: “Planti man bai i lusim pasin bilong laikim.” (Matyu 24:12) Yu ken mekim wanem na bai pasin bilong yu long laikim tru Jehova na tok i tru bilong Baibel i no ken pinis?

¹³ Wok yet long kisim save long God Jehova na Jisas Krais. (Jon 17:3) Tingim tingim long bel ol tok yu kisim save long en  long Baibel, na askim yu yet: ‘Dispela tok i givim wanem save long mi long ol samting bilong God Jehova? Ol dispela ves i kamapim wanem narapela as na mi mas laikim em long bel, tingting, na strong olgeta bilong mi? (Song 119:97) Kain pasin bilong tingim tingim long bel bai mekim na pasin bilong yu long laikim tru Jehova bai stap strong.

14. Olsem wanem beten inap helpim pasin bilong yumi long laikim tru Jehova i stap strong?

¹⁴ Beten em i narapela rot bilong helpim pasin bilong yu long laikim tru Jehova i stap strong. (1 Tesalonaika 5:17) Long Sapta 17 bilong dispela buk, yumi kisim save olsem beten em i gutpela presen i kam long God. Pasin bilong toktok gut wantaim ol narapela i helpim yumi long pas gut wantaim ol, na olsem tasol bai yumi pas gut wantaim Jehova taim yumi beten oltaim long em. Em i bikpela samting long yumi no ken beten nating​—kolim ol wankain tok tasol planti taim na yumi no pilim tru long bel ol dispela tok. Yumi mas toktok long Jehova olsem pikinini i save toktok long papa em i laikim tru. Tru, yumi mas toktok long pasin rispek, tasol yumi mas kamapim ol tingting i stap long bel bilong yumi. (Song 62:8) Yes, pasin bilong stadi long Baibel na beten i bikpela samting long wok lotu bilong yumi, na i helpim yumi long stap insait long laikim bilong God.

15, 16. I gat wanem as na yumi ken ting wok bilong autim tok bilong Kingdom i wanpela gutpela wok tru yumi ken mekim?

¹⁵ Pasin bilong stadi long Baibel na beten em ol hap wok bilong lotu yumi ken mekim taim yumi yet i stap. Tasol nau yumi ken skelim hap wok bilong lotu yumi save mekim long ai bilong ol man​—yumi autim bilip bilong yumi long ol narapela. Olsem wanem? Yu autim pinis sampela tok i tru bilong Baibel long ol narapela? Sapos yu mekim, orait yu bin insait long wanpela gutpela wok tru. (Luk 1:74) Taim yumi autim stretpela save yumi bin lainim long God Jehova, yumi insait long wanpela bikpela wok tru olgeta Kristen i mas mekim​​—em wok bilong autim gutnius bilong Kingdom Bilong God. ​​—Matyu 24:14; 28:​19, 20.

¹⁶ Aposel Pol i ting wok bilong em long autim tok i wanpela  gutpela samting tru. (2 Korin 4:7) Wok bilong tokim ol manmeri long God Jehova na ol samting em bai mekim em i nambawan gutpela wok yu ken insait long en. Yumi mekim wok bilong nambawan gutpela Bosman, na dispela wok i givim nambawan gutpela pe long yumi. Taim yu insait long dispela wok, yu helpim ol man i gat gutpela bel long i go klostu long Papa bilong yumi long heven na long wokabaut long rot i go  long laip oltaim! I no gat narapela wok inap mekim yu i stap belgut tru olsem dispela wok! Na tu, wok bilong autim tok bilong Jehova na Baibel i strongim bilip bilong yu na pasin bilong yu long laikim em tru. Na Jehova i amamas tru long wok yu mekim. (Hibru 6:10) Pasin bilong givim bel long dispela wok bai helpim yu long stap insait long laikim bilong God. ​​—1 Korin 15:58.

17. Bilong wanem yumi mas strong long mekim wok Kristen bilong autim tok long nau?

¹⁷ Em i bikpela samting long tingim olsem taim i sot pinis long mekim wok bilong autim tok bilong Kingdom. Baibel i tok: “Yu mas strong long autim tok bilong em.” (2 Timoti 4:2) Bilong wanem yumi mas strong long mekim dispela wok long nau? Baibel i tok: “De bilong Bikpela i mekim kot bilong en, em i klostu nau na dispela De bai i kamap kwiktaim tru.” (Sefanaia 1:14) Em nau, klostu nau Jehova bai pinisim pasin nogut bilong dispela graun. Yumi mas givim tok lukaut long ol manmeri! Ol i mas save olsem nau em i taim bilong makim Jehova i stap King bilong ol. Pinis bilong pasin nogut bilong dispela graun “bai i kamap.” ​​—Habakuk 2:3.

18. Bilong wanem yumi mas lotuim Jehova long ples klia wantaim ol trupela Kristen?

¹⁸ Jehova i laik bai yumi lotuim em long ples klia wantaim ol trupela Kristen. Long dispela as Baibel i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:​24, 25) Taim yumi bung wantaim ol wanbilip long ol miting Kristen, yumi gat rot bilong litimapim nem bilong God bilong yumi na lotu long em. Na tu, narapela i strongim bel bilong narapela.

19. Yumi ken mekim wanem bilong strongim pasin bilong laikim ol narapela insait long kongrigesen Kristen?

¹⁹ Taim yumi bung wantaim ol narapela man i lotuim Jehova, yumi helpim pasin pren na pasin bilong laikim ol narapela  i kamap strong insait long kongrigesen. Em i bikpela samting long yumi wok long painim ol gutpela pasin bilong ol arapela, olsem Jehova i wok long painim ol gutpela pasin bilong yumi. Yu no ken ting ol wanbilip bilong yu i mas gutpela olgeta. Tingim olsem sampela i strong moa long ol samting bilong spirit na sampela i wok yet long kamap strong, na yumi olgeta i save popaia. (Kolosi 3:13) Wok long pas gut wantaim ol man i laikim tru Jehova, long dispela rot bai yu kamap strong long ol samting bilong spirit. Yes, pasin bilong lotuim Jehova wantaim ol brata na sista spirit bai helpim yu long stap insait long laikim bilong God. Jehova i save givim wanem gutpela pe long ol man i stap gut long em na i lotuim em na long dispela rot ol i stap insait long laikim bilong em?

20, 21. “Laip tru” em i wanem samting? Bilong wanem em i wanpela gutpela samting tru bilong bilip na wet long en?

²⁰ Jehova i save givim laip long ol gutpela wokman bilong em, tasol em i givim wanem kain laip? Olsem wanem? Yu stap laip nau? Ating yumi olgeta bai tok, yes, mi stap laip. Yumi save pulim win, yumi kaikai, na dring, olsem na yumi stap laip. Na taim yumi stap amamas tru, ating yumi save tok, “Nau laip bilong mi i gutpela tru!” Tasol Baibel i soim olsem i no gat wanpela man em laip bilong em i gutpela tru long nau.

²¹ Baibel i tokim yumi long “kisim dispela laip em i laip tru.” (1 Timoti 6:19) Ol dispela tok i kamapim olsem “laip tru” em i samting yumi bilip na wet long kisim long bihain. Yes, taim yumi kamap gutpela olgeta, bai laip bilong yumi i gutpela tru, long wanem, i stap bilong yumi bai kamap olsem God i bin tingting pinis long en long pastaim tru. Taim yumi stap long graun em i ples paradais na yumi no gat sik, yumi stap wanbel, na amamas, bai yumi kisim “laip tru”​—em laip oltaim. (1 Timoti 6:12) Dispela em i wanpela gutpela samting tru bilong bilip na wet long en, a?

22. Olsem wanem yu inap “kisim dispela laip em i laip tru”?

²² Yumi mas mekim wanem bilong “kisim dispela laip em i laip tru”? Long wankain hap bilong Baibel, Pol i tokim ol Kristen long “mekim planti gutpela pasin bilong helpim ol arapela  manmeri.” (1 Timoti 6:18) Bikpela samting em long bihainim ol tok i tru bilong Baibel yumi bin kisim save long en. Tasol olsem wanem? Pol i tok yumi inap kisim dispela “laip tru” long rot bilong ol gutpela wok yumi bin mekim? Nogat, marimari bilong God i mekim na yumi inap kisim dispela gutpela samting. (Rom 5:15) Tasol Jehova i amamas long givim gutpela pe long ol man i stap gut long wok bilong em. Em i laik lukim yu i kisim dispela “laip tru.” Ol man i stap insait long laikim bilong God, ol bai kisim laip oltaim na stap amamas na bel isi.

23. Bilong wanem em i bikpela samting long stap insait long laikim bilong God?

²³ Yumi olgeta i mas askim yumi yet, ‘Mi lotuim God long rot em i makim long Baibel?’ Sapos long olgeta de taim yumi mekim ol samting yumi inap tok yes long dispela askim, orait yumi wokabaut long stretpela rot. Yumi ken bilip olsem Jehova em i ples hait bilong yumi. Em bai lukautim lain bilong em long dispela taim bilong las de i gat planti hevi. Na tu, Jehova bai bringim yumi i go insait long nupela taim em i klostu pinis nau. Bai yumi amamas tru long lukim dispela taim! Na bai yumi amamas tru long yumi bin makim ol stretpela rot long bihainim long dispela taim bilong las de! Sapos yu makim ol stretpela rot long nau, bai yu kisim dispela laip God Jehova i tingting pinis long en long pastaim, em “laip tru” bilong i stap inap oltaim oltaim!