Taim Nebukatnesar i kisim ol prins bilong Juda i go long Babilon, em i putim nambawan ofisa, nem bilong em Aspenas long lukautim ol. Nebukatnesar i tokim Aspenas long painim ol yangpela bois i gat gutpela helt na i smat moa namel long ol dispela prins. Ol dispela yangpela bois bai kisim trening inap 3-pela yia. Dispela trening bai redim ol long kamap ol nambawan ofisa long Babilon. Ol bois bai lain long rit, rait, na mekim tokples Akad bilong Babilon. Na tu, ol i mas kisim wankain kaikai olsem king na ol ofisa. Fopela bilong ol dispela bois em Daniel, Hanania, Misael, na Asaria. Aspenas i givim nupela nem bilong Babilon long ol: Beltesasar, Satrak, Mesak, na Abetnego. Yu ting skul ol i kisim bai mekim na ol i stop long lotuim Jehova?

 Dispela fopela bois i tingting strong long bihainim tok bilong Jehova. Ol i save olsem ol i no ken kisim kaikai bilong king bikos Lo Bilong Jehova i tok sampela kaikai bilong king i no klin. So ol i tokim Aspenas: ‘Plis no ken mekim mipela i kisim ol kaikai bilong king.’ Aspenas i tokim ol: ‘Sapos yupela i no kaikai na king i lukim olsem yupela i luk sik, em bai kilim mi i dai!’

Daniel i gat wanpela aidia. Em i tokim wokman i lukautim ol: ‘Plis, givim mipela kaikai bilong gaden tasol na wara inap 10-pela de. Bihain skelim mipela wantaim ol bois i kisim ol kaikai bilong king.’ Wokman i wanbel long dispela.

Bihain long 10-pela de, Daniel na 3-pela pren bilong em i luk helti winim olgeta narapela bois. Jehova i belgut long ol i bin bihainim tok bilong em. Na tu, em i givim savetingting long Daniel bilong kliagut long ol visen na driman.

Taim trening i pinis, Aspenas i bringim ol bois i go long Nebukatnesar. King i toktok wantaim Daniel, Hanania, Misael, na Asaria na em i lukim olsem ol i kleva tru na tingting bilong ol i klia winim olgeta narapela bois. Em i makim dispela 4-pela bois long wok long haus king bilong em. Planti taim king i save askim ol long edvais long ol bikpela samting. Jehova i mekim na ol dispela bois i gat savetingting winim ol saveman bilong king na ol man bilong mekim mejik.

Maski Daniel, Hanania, Misael, na Asaria i stap long narapela kantri, ol i no lusim tingting olsem ol i lain bilong Jehova. Olsem wanem? Yu tu bai tingim Jehova, maski papamama i no stap wantaim yu?