Yes Ol Wanbilip:

Yumi ol man i lotuim Jehova, yumi laikim Tok bilong em, em Baibel. Yumi bilip olsem em i kamapim ol stori tru bilong bipo, ol gutpela stiatok yumi inap bihainim, na ol evidens long pasin laikim bilong Jehova long ol man. (Buk Song 119:105; Luk 1:3; 1 Jon 4:19) Yumi laik tru long helpim ol narapela long kisim save long ol gutpela tok i tru i stap long Tok Bilong God. Olsem na mipela i amamas tru long wokim dispela buk, “Ol Lesen Yu Inap Lainim Long Baibel.” Mipela i laik stori liklik long dispela.

Mipela i tingim ol pikinini taim mipela i redim dispela buk. Tasol em inap helpim tu ol man i bikpela pinis em ol i gat laik long kisim sampela save moa long Baibel. Baibel em buk bilong olgeta kain man, olsem na yumi olgeta inap kisim helpim taim yumi skelim ol dispela lesen, em bai helpim yumi long stap amamas tru.

Long rot bilong ol stori bilong Baibel, dispela buk i kamapim ol stori bilong namba wan famili long taim God i wokim ol samting na i kam. Mipela i wok strong long kamapim ol stori bilong Baibel long tok i klia na i no hatwok long ritim, ol dispela stori i kamapim ol samting i bin kamap pastaim na ol samting i kamap bihain.

Dispela buk i no kamapim tasol ol stori bilong Baibel, nogat. Ol i redim gut ol tok na ol piksa na taim yu ritim i olsem yu yet i harim na pilim ol samting olsem ol dispela man em Baibel i stori long ol.

Dispela buk bai helpim yumi long luksave olsem Baibel i pulap long stori bilong ol manmeri—ol man i bin bihainim tok bilong Jehova na ol man i sakim tok. Na i kirapim yumi long kisim skul long eksampel bilong ol. (Rom 15:4; 1 Korin 10:6) I gat 14 seksen long dispela buk. Kirap bilong wan wan seksen i kamapim ol sotpela tok long skul yumi inap kisim.

 Sapos yu papa o mama, yu inap ritim wanpela lesen wantaim pikinini bilong yu na stori tu long piksa bilong en. Bihain yutupela i ken ritim hap bilong Baibel em ol i kisim stori bilong dispela lesen long en. Helpim pikinini long konektim tok em i ritim long Baibel wantaim stori long lesen bilong buk. Yu inap bihainim wankain pasin taim yu laik skulim gut man i bikpela pinis long kliagut long ol bikpela tok bilong Baibel.

Mipela i bilip olsem dispela buk bai helpim ol man i gat gutpela bel—yangpela na lapun—long kisim save long Tok Bilong God na bihainim skul ol i kisim. Na ol tu inap lotuim em na insait long gutpela famili bilong em.