BOBTAIL TAUKA bilong Hawaii (Hawaiian Bobtail Squid) i stap long solwara i save painim kaikai long nait. Dispela tauka i save kamapim lait, na taim lait bilong mun na ol sta i kisim bodi bilong en, nau kala bilong en i senis i kamap wankain olsem ol samting i stap klostu long en, olsem na i hatwok long lukim em. Ol baktiria i stap long bodi bilong tauka i save helpim em long kamapim lait. Save yumi kisim long pasin bilong baktiria na tauka long helpim narapela narapela inap helpim helt bilong yumi tu.

Tingim: Bobtail tauka bilong Hawaii i stap long klinpela solwara bilong ol ailan bilong Hawaii. Taim mun na ol sta i lait, ol narapela bikpela pis samting inap lukim sedo bilong en. Tasol bel bilong dispela tauka i save kamapim lait i gat wankain kala long lait bilong mun na ol sta. Dispela i olsem, long wanem, ol baktiria i stap long bel bilong en i save helpim em long kamapim dispela lait na bai tauka i hait long ol narapela pis.

Na tu, ol dispela baktiria i helpim tauka long save long ol taim bilong en long slip na kirap. Ol saveman i laik kisim sampela save moa long dispela, long wanem, ol i ting pasin bilong baktiria long helpim tauka i stap tu long ol man na ol narapela animal. Ol baktiria i stap long ol man na animal we i save brukim kaikai inap mekim sampela samting long pasin bilong ol long slip na kirap. Olsem, sapos ol baktiria i no mekim gut wok bilong ol, orait ol man inap kisim sik dipresen, sik suga, pat tumas, na i no kisim gutpela slip. Olsem na ol saveman i mekim wok painimaut long ol baktiria i stap long tauka na bai ol inap helpim ol man long i gat gutpela helt.

Yu ting wanem? Lait bilong bobtail tauka bilong Hawaii i kamap long rot bilong evolusen? O wanpela i bin wokim?