Tingim pasin pren bilong ol man we tupela i pas gut wantaim—pasin pren bilong ol twins. Ol i gat pasin bilong laikim na pas gut wantaim narapela. Nancy Segal em dairekta bilong Twin Studies Center na em yet i wanpela twin, em i tok, sampela i “save long tok narapela i laik kamapim maski em i no stori gut.” Wanpela meri i stori long pasin pren namel long em na twin bilong em: “Mipela i save long olgeta samting long narapela narapela.”

Wanem ol samting i kamapim dispela kain pasin pren? Ol wok painimaut i soim olsem ples man i go bikpela na wok papamama, tasol namba 1 risen em ol wankain jin i kamapim ol twin pikinini.

TINGIM: Man husat i wokim yumi i save gut long yumi wan wan. Man bilong raitim song, Devit i tok: “Yu wokim mi olgeta insait long bel bilong mama. Taim mi kamap isi isi long ples hait insait long bel bilong mama, yu bin lukim olgeta bun bilong mi. . . . Yu lukim mi taim mama i no karim mi yet. Mi no kamap yet long graun, tasol yu raitim pinis long buk bilong yu.” (Song 139:13, 15, 16) God tasol i save na em i kliagut long ol jin bilong yumi na ol samting i kamap long laip bilong yumi, na dispela i mekim sampela samting long ol pasin yumi gat. Save God i gat long yumi i strongim bilip bilong yumi olsem em i save gut long olgeta liklik samting long laip bilong yumi.

Devit i beten: “Bikpela, yu skelim pinis bel bilong mi, na yu save tru long mi. Yu save long olgeta samting mi save mekim. Yu stap longwe, tasol yu save long olgeta tingting bilong mi. Na sapos mi laik mekim wanpela tok, yu save pinis long dispela tok.” (Song 139:1, 2, 4) Na tu, Jehova i save long ol samting yumi pilim na em i “save long olgeta tingting na laik bilong yumi.” (1 Stori 28:9; 1 Samuel 16:6, 7) Ol dispela ves i kamapim wanem samting long God?

Maski yumi no beten na kamapim tingting na laik bilong yumi, Krieta bilong yumi i lukim ol samting yumi mekim na em i save long risen na yumi mekim olsem. Na tu, em i save long ol gutpela pasin yumi laik mekim, maski ol samting i pasim yumi na yumi no inap mekim ol samting em bel i gat laik tru long en. Taim God i wokim yumi, em i putim pasin laikim long bel bilong yumi, em i laik tru long lukim na save gut long ol tingting na pasin yumi mekim.—1 Jon 4:7-10.

 Baibel i tokim yumi

• “Ai bilong Jehova i save lukluk long ol stretpela man, na em i save putim yau long ol taim ol i beten strong long em.”—1 PITA 3:12.

• God i promis: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.”—SONG 32:8.

Taim yumi save olsem God i save gut long ol samting i painim yumi na tingting bilong yumi, dispela inap helpim yumi long sanap strong na karim hevi. Tingim samting i painim Anna long Naijiria. Em i tok: “Mi laik save sapos i gat risen na mi mas stap laip bikos mi karim ol hevi na mi nidim tru helpim. Mi wido husat i lukautim pikinini meri bilong mi long haus sik, em i gat sik hydrocephalus (wara i pulap long kru), long dispela taim mi gat kensa long susu na mi mas kisim operesen, na kimoterapi na redioterapi bilong daunim sik kensa. Mi bel hevi tru na i hatwok long mi karim hevi bilong stap long haus sik na long wankain taim lukautim pikinini bilong mi.”

Wanem samting i helpim Anna long karim dispela hevi? Em i tok: “Mi tingim ol skripsa olsem Filipai 4:6, 7, em i tok olsem ‘bel isi bilong God i winim tru tingting bilong man, em bai lukautim bel bilong yupela na tingting bilong yupela.’ Olgeta taim mi tingim dispela skripsa, mi pilim olsem mi pas gut wantaim Jehova, mi save olsem em i save gut long mi winim mi yet. Na tu, mi kisim planti tok bilong strongim mi long ol wanbilip bratasista em ol i gat pasin laikim long kongrigesen Kristen.

“Maski mi karim hevi long helt bilong mi, mi na pikinini bilong mi i kamap orait. Long wanem, Jehova i stap wantaim mipela, mipela i kisim save long no ken holim tingting kranki long ol hevi i painim mipela. Jems 5: 11 i tokim yumi: ‘Mipela i tokaut olsem, ol man husat i sanap strong na karim hevi ol i amamas. Yupela harim pinis stori bilong Jop long em i bin sanap strong na long ol samting Jehova i bin mekim long em. Yupela i save, Jehova i gat pasin bilong sori tru na marimari.’” Jehova i save gut long ol samting i painim Jop, olsem na yumi ken bilip olsem em i save gut long ol hevi i painim yumi.