“God i Stap We?”
“OLTAIM MI ASKIM: GOD I STAP WE?”— Pop Benedict 16, taim em i go raun long haus kalabus bilong bipo long Auschwitz, Polan.
TAIM OL HEVI I KAMAP, SAMPELA TAIM YU TINGTING, ‘GOD I STAP WE?’ O WANPELA BIKPELA HEVI I PAINIM YU, NA YU LAIK SAVE SAPOS GOD I SAVE TINGIM YU?
Ating yu gat wankain tingting olsem Sheila husat i stap long Amerika. Sheila i go bikpela long famili i tingim tru lotu, em i tok: “Kirap long taim mi pikinini na i kam inap nau, mi laikim God bikos em i Wokim yumi. Maski i olsem, mi no pilim olsem mi stap klostu long em. Mi ting em i lukim mi, tasol em i stap longwe. Mi ting God i heitim mi, na tu, mi no bilip olsem em i laikim mi.” Bilong wanem Sheila i gat tupela tingting olsem God i laikim em? Em i tok: “Famili bilong mi i karim ol hevi, na i luk olsem God i no helpim mipela liklik.”
Olsem Sheila, ating yu save God i Gat Olgeta Strong i stap. Tasol yu laik save sapos em i tingim tru yu. Stretpela man Jop, em man i bilip long strong na savetingting bilong Krieta, em tu i gat wankain tingting. (Jop 2:3; 9:4) Bihain long Jop i karim ol hevi—em i pilim olsem i no gat gutpela samting bai kamap—em i askim God: “Bilong wanem yu save givim baksait long mi olsem mi birua bilong yu na yu abrusim mi?”—Jop 13:24.
Baibel i tok wanem? God i as bilong ol hevi i kamap? I gat evidens i soim olsem God i tingim ol man na yumi olgeta wan wan? Yumi wan wan inap ting em i luksave long ol hevi bilong yumi, save long tingting bilong yumi, na em i helpim yumi long karim ol hevi?
Long ol atikol i kamap bihain, yumi bai stori long ol samting God i wokim na dispela i skulim yumi olsem God i tingim yumi. (Rom 1:20) Bihain bai yumi stori long tok Baibel i mekim long pasin bilong God long tingim yumi. Taim “yumi save long em” long rot bilong ol samting em i wokim na ol tok bilong em long Baibel, dispela bai strongim bilip bilong yumi olsem “God i save wari long [yumi].”—1 Jon 2:3; 1 Pita 5:7.
