Kisim Skul Long Tok Bilong God
Bilong Wanem God i Salim Jisas i Kam Long Graun?
Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.
1. Jisas i stap we paslain long God i salim em i kam long graun?
Jisas i bin stap olsem wanpela spirit long heven paslain long mama i karim em long Betlehem. Em i namba 1 samting God i bin wokim, na God yet i bin wokim em. Olsem na i stret Baibel i kolim em olsem Pikinini tru bilong God. Long heven em i stap olsem mausman bilong God. Olsem na Baibel i kolim em Tok. Na tu, em i stap olsem helpim bilong God na em i helpim wok bilong wokim olgeta narapela samting. (Jon 1:2, 3, 14) Jisas i bin stap wantaim God inap planti bilion yia paslain long God i wokim ol man.—Ritim Maika 5:2; Jon 17:5.
2. Long wanem rot God i salim Pikinini bilong em i kam long graun?
Jehova i kisim laip bilong Jisas long heven na putim long bel bilong Maria long rot bilong holi spirit. Olsem na i no wanpela man bilong graun i kamapim em. Long de mama i karim Jisas, ol ensel i tokaut long dispela samting long sampela wasman bilong sipsip em ol i stap ausait long nait na was long ol sipsip bilong ol. (Luk 2:8-12) Olsem na mama i no karim Jisas long taim bilong bikpela kol tru, nogat, ating em i karim em long taim bilong san em long kirap bilong mun Oktoba samting. Bihain Maria na man bilong em Josep i kisim Jisas i go long asples bilong ol long Nasaret na mekim bikpela long em. Josep i lukautim Jisas olsem waspikinini bilong em.—Ritim Matyu 1:18-23.
Taim Jisas i gat 30 krismas, em i kisim baptais na God i tokaut olsem Jisas em i Pikinini bilong Em. Orait Jisas i kirap long mekim wok em God i salim em i kam long mekim.—Ritim Matyu 3:16, 17.
3. Bilong wanem God i salim Jisas i kam long graun?
God i salim Jisas i kam bilong skulim ol man long tok i tru. Jisas i skulim ol man long Kingdom Bilong God, em wanpela gavman i stap long heven na em bai kamapim gutpela sindaun long olgeta hap bilong graun. Jisas i opim rot bilong ol man i ken kisim laip oltaim. (Jon 4:14; 18:36, 37) Na tu, Jisas i skulim ol man long planti samting ol man inap mekim bilong stap amamas tru. (Matyu 5:3; 6:19-21) Em yet i mekim ol samting em i skulim ol narapela long mekim. Olsem, em i stap gutpela piksa long pasin bilong stap gut long God long taim bilong hevi. Taim ol man i mekim nogut long em, em i no bekim pasin nogut bilong ol.—Ritim 1 Pita 2:21-24.
Jisas i skulim ol disaipel bilong em long redi long dai bilong helpim ol narapela. Em i bin i gat bikpela namba taim em i stap wantaim Papa bilong em long heven, tasol em i daunim em yet na bihainim tok bilong Papa na kam long graun bilong stap namel long ol man. Jisas i stap olsem nambawan gutpela piksa long mekim pasin laikim.—Ritim Jon 15:12, 13; Filipai 2:5-8.
4. Indai bilong Jisas i kamapim wanem samting?
God i salim Jisas i kam dai bilong tekewe sin bilong yumi. (Jon 3:16) Yumi olgeta i sinman, olsem yumi no gutpela olgeta na yumi save mekim sin. Olsem na yumi save sik na i dai. Tasol namba 1 man Adam, em i gutpela olgeta. Em i no gat sin na em i no inap dai o kisim sik. Tasol em i lusim dispela laip olsem man i gutpela olgeta taim em i sakim tok bilong God. Long rot bilong Adam, yumi kisim sin na pe bilong sin em dai.—Ritim Rom 5:12; 6:23.
Jisas em man i gutpela olgeta, em i no dai bilong tekewe sin bilong em yet, nogat. Em i dai bilong tekewe sin bilong yumi. Dai bilong Jisas i opim rot bilong yumi long kisim laip oltaim na ol blesing i kam long God.—Ritim 1 Pita 3:18.
