TAIM papa o mama i lusim God Jehova, dispela i save givim bikpela hatwok long pikinini. Yumi ken stori long Jotam. Bai yumi kisim save long ol hevi i bin kamap insait long famili bilong em taim em i wok long kamap bikpela.

Papa bilong Jotam, em Usia, em i king bilong Juda. Em man i gat bikpela namba tru long kantri. Inap planti yia paslain long Jotam i bon, Usia i bin stap olsem gutpela king. Tasol bihain taim Jotam i liklik yet, Usia i kisim pasin antap na brukim Lo Bilong God. Olsem na God i mekim na Usia i kisim sik lepra, em wanpela sik nogut tru. Yu save Jotam i mekim wanem?— a

Jotam i wok yet long mekim wok bilong Jehova. Ating mama bilong em Jerusa i bin helpim em. Tru ating i hatwok long Jotam i stap gut long Jehova taim ol i rausim papa bilong em Usia long haus bilong Jehova.

Yu bai mekim wanem sapos papa o mama bilong yu i lusim pasin bilong lotuim Jehova? Ating dispela bai givim bikpela hatwok long yu, a?— Tasol i no gat rong long tingting long yu bai mekim wanem samting taim dispela hevi i kamap. Sapos yumi skelim tok Devit i raitim long Baibel, bai yumi luksave long dispela samting.

Papa bilong Devit em Jesi, em wanpela gutpela man. Jesi i mekim wok bilong Jehova na yumi ken save olsem Devit i laikim papa bilong em. Tasol Devit i laikim tru Jehova, winim laikim  bilong em long Jesi. Yumi ken kisim save long as na yumi tok olsem.

Plis opim Baibel long Song 27:10. Devit i tok: “Maski papa na mama i givim baksait long mi, Bikpela bai i lukautim mi.” Tingim: Dispela tok bilong Baibel i makim olsem sapos papa bilong Devit em Jesi o mama bilong em i lusim pasin bilong lotuim Jehova, Devit bai wok yet long lotuim Em.

Olsem wanem long yu? Bai yu wok yet long lotuim Jehova, maski papa o mama bilong yu i no mekim olsem?— I gutpela long givim dispela askim long yu yet. As na yu laik mekim wok bilong Jehova em dispela nambawan bikpela lo long Baibel. Em i tok: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.”

Dispela lo i makim olsem yumi mas stap gut long Jehova maski i hatwok long mekim olsem. Yu ting husat i laik bai yumi mas lusim pasin bilong lotuim Jehova?— Satan em birua bilong God, i laik yumi mekim olsem. Jisas i kolim em olsem “hetman bilong dispela graun.” Na Baibel i kolim em tu olsem “god bilong dispela graun.” Yu ting yumi mas pret long Satan?—

Nogat, yumi no ken pret. Yumi mas tingim olsem Jehova i gat bikpela strong moa winim strong bilong Satan. Jehova bai lukautim yumi sapos yumi bilip long Em. Ritim long Baibel bilong yu yet long olsem wanem Jehova i bin lukautim Devit long traipela man Goliat. Jehova inap lukautim yu tu sapos yu stap gut long em.