Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Xana nkhuvulo wa Vakreste wu vula yini?

Nkhuvulo i ndlela yo kombela Xikwembu leswaku u va ni vuxaka lebyinene na xona. Kutani Mukreste u fanele a khuvuriwa, ku nga ri loko a ri ricece, kambe loko a kule ku ringana lerova a nga kota ku dyondza hi Xikwembu kutani a va mudyondzisiwa wa Yesu. (Mintirho 8:12; 1 Petro 3:21) Hi va vadyondzisiwa va Yesu loko hi dyondza ni ku endla leswi a hi leriseke swona.—Hlaya Matewu 28:19, 20.

Enkarhini wa vaapostola va Yesu, vanhu vo tala va teke goza handle ko dya nkarhi leswaku va dyondza hi Xikwembu na Yesu. Hi xikombiso, loko wanuna un’wana a dyondze leswaku rifu ra Yesu ri endle swi koteka leswaku hi ponisiwa, u nambe a va mudyondzisiwa. Namuntlha, vanhu vo tala lava hi ku tshembeka ni hi ku titsongahata va lavisiseke ntiyiso, va hlawule ku va valandzeri va Yesu.—Hlaya Mintirho 8:26-31, 35-38.

2. Ha yini Yesu a khuvuriwile?

Yesu a a ri ni malembe ya kwalomu ka 30 loko Yohane lowo Khuvula a n’wi nyuperisa endzeni ka mati ya Nambu wa Yordani. Ku khuvuriwa ka Yesu a ku kombisa xiboho xakwe xa ku endla ku rhandza ka Xikwembu. (Vaheveru 10:7) Leswi a swi ta katsa ku nyikela hi vutomi byakwe byi va xitlhavelo xa swidyoho swa vanhu. Niloko a nga si suka etilweni leswaku a ta laha misaveni, Yesu minkarhi hinkwayo a a rhandza Tata wakwe Yehovha ni ku n’wi yingisa.—Hlaya Marka 1:9-11; Yohane 8:29; 17:5.

  3. Ha yini Mukreste a fanele a khuvuriwa?

Xiyimo xa hina a xi fani ni xa Yesu—hi velekiwe hi ri vadyohi. Kambe, xitlhavelo xa rifu ra Yesu xi endla swi koteka leswaku hi va ni vuxaka lebyinene ni Xikwembu. (Varhoma 5:10, 12; 12:1, 2) Entiyisweni, swa koteka leswaku hi va swirho swa ndyangu wa xona. (2 Vakorinto 6:18) Xana hi ri kuma njhani lunghelo rero? Hi ku khongela exihundleni, munhu u tinyiketela eka Yehovha, a hlambanya leswaku u ta endla ku rhandza kakwe vutomi bya yena hinkwabyo. Endzhaku ka ku tinyiketela koloko, munhu u swi kombisa erivaleni hi ku va a khuvuriwa.—Hlaya Matewu 16:24; 1 Petro 4:2.

4. Xana u nga tilunghiselela njhani leswaku u khuvuriwa?

Timbhoni ta Yehovha ti dyondza Bibele ni munhu un’wana ni un’wana loyi a lavaka ku tshinela ekusuhi ni Xikwembu. Ku dyondza Bibele ni ku va kona eminhlanganweni ya Vukreste swi ta tiyisa rirhandzu ra wena eka Xikwembu ni ripfumelo ra wena eka xona. Swi ta tlhela swi ku pfuna ku hlakulela malangutelo ni mikhuva leyinene. Ku va ni rirhandzu, ripfumelo ni timfanelo tin’wana leti tsakisaka Xikwembu swi ta ku pfuna leswaku u hanya hi ku pfumelelana ni xihlambanyo xa wena xa ku tirhela Yehovha hilaha ku nga heriki.—Hlaya Yohane 17:3; Vaheveru 10:24, 25.

Leswaku u kuma rungula leri engetelekeke, vona ndzima 18 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.