Xana ku ni muntshwa loyi u n’wi tivaka loyi a langutaneke ni xiphiqo lexikulu xa rihanyo? Xana u ni vuvabyi kumbe vulema byo karhi lebyi ku sivelaka ku ntlanga mintlango leyi tintangha ta wena ti yi tlangaka?

Loko swi ri tano, swa twisiseka leswaku minkarhi yin’wana u titwa u tshikilelekile. Hambiswiritano, eBibeleni ku ni swilo swimbirhi leswi nga ku chavelelaka.

• Muvumbi wa wena, Yehovha Xikwembu wa xi tiva xiyimo xa wena. Ku tlula kwalaho, ‘wa ku khathalela.’—1 Petro 5:7.

• Xikongomelo xa Yehovha Xikwembu i ku herisa vuvabyi hinkwabyo. U nga hlaya hi mhaka leyi eBibeleni eka Esaya 33:24 na Nhlavutelo 21:1-4.

Vantshwa va ntsandza-vahlayi lava langutaneke ni xiphiqo xa rihanyo va kume leswaku ku va ni ripfumelo eka Xikwembu ni le ka switshembiso swa xona, swa va tiyisa. Xiya swikombiso swa mune.

•  YEIMY

•  MATTEO

•  BRUNA

•  ANDRÉ

Loko ndza ha ri ni malembe ya 11, a ndzi lava xitulu xa lava lamaleke leswaku ndzi ta kota ku ya kun’wana ni kun’wana. A ndzi swi koti ku endla mintirho yo olova yo tanihi ku tlakula swilo swo olova.

Loko ndzi ri ni malembe ya ntlhanu, ndzi khomiwe hi vuvabyi bya ku tsana ka misiha, lebyi a byi endla leswaku ndzi nga ha koti nchumu. Minkarhi yin’wana, a ndzi tshikileleka hikuva a ndzi nga swi koti ku endla swilo leswi tintangha ta mina a ti swi endla. Kambe vatswari va mina ni vanhu va le vandlheni, a va ndzi tiyisa hi tlhelo ra moya ni ra nyama. A ndzi ri mutirhi wa nkarhi hinkwawo naswona Vakreste-kulorhi a va ndzi heleketa loko ndzi ya dyondza Bibele ni vanhu lava tsakelaka.

Yesu u vule leswaku siku rin’wana ni rin’wana ri ni mivilelo ya rona. (Matewu 6:34) A ndzi ringeta ku anakanya hi swilo swa siku rero kutani ndzi tivekela tipakani leti ndzi lavaka ku ti fikelela. Ndzi swi langutele hi mahlo-ngati emisaveni leyintshwa ya Xikwembu laha ndzi nga ta kota ku va ni ‘vutomi bya xiviri’ laha vuvabyi lebyi byi nga ta herisiwa.—1 Timotiya 6:19.

Mhaka yo anakanyisisa ha yona: Yeimy u kume swi pfuna ku “tivekela tipakani leti a nga ta ti fikelela.” Xana u nga swi kotisa ku yini ku endla leswi fanaka?—1 Vakorinto 9:26.

Nhlana wa mina wu sungule ku vava loko ndzi ri ni malembe ya tsevu naswona eku sunguleni madokodela a ma vula leswaku a ko va switlhavi swa ku kula. Kambe endzhaku ka lembe, ma kume leswaku ku ni tshumba elongweni ra mina.

Ndzi endliwe vuhandzuri kambe va kote ku susa ntsena 40 wa tiphesete ta tshumba leri. Ku nga si hela tin’hweti timbirhi, tshumba ri tlhele ri pfimba. Ku sukela kwalaho, a ndzi kamberiwa ko tala, ndzi tshunguriwa naswona sweswo a swi ndzi heta matimba.

Minkarhi yin’wana, tshumba a ri ndzi vangela switlhavi emirini hinkwawo ngopfu-ngopfu enhlaneni ni le xifuveni. Hambiswiritano, ndzi ringeta ku rivala hi ta mavabyi ya mina. Ndzi tsundzuka vanhu van’wana lava tiyiseleke swiyimo swo tika swinene naswona va tshameke va ri ni langutelo lerinene. Mpfuno wa mina lowukulu wa ku tshama ndzi ri ni langutelo lerinene i ntshembo wa leswaku siku rin’wana, Yehovha Xikwembu u ta hetisisa switshembiso swa yena swa ku herisa ku xaniseka hinkwako.—Nhlavutelo 21:4.

Mhaka yo anakanyisisa ha yona: Ku ehleketa hi xitshembiso xa Xikwembu xa ku herisa ku xaniseka swi nga ku pfuna njhani leswaku u tiyisela tanihi leswi swi pfuneke Matteo?—Esaya 65:17.

Tanihi leswi ndzi langutekaka ndzi nga vabyi, vanhu van’wana va nga ehleketa leswaku ndzi lolo. Kambe swilo hinkwaswo swi nga ha ndzi tikela, ku katsa ni mintirho ya le kaya, ku hlaya hambi ku ri pfuka emubedweni.

Loko ndzi ri ni malembe ya 16, ndzi khomiwe hi vuvabyi bya ku tsana ka misiha ni ku tsana ka miehleketo lebyi a byi ndzi endla ndzi nga ha koti ku tirha hambi ku ri ku hoxa xandla eka mintirho ya Vukreste hilaha ndzi nga kotaka hakona. A ndzi tshamela ku hlaya 1 Petro 5:7, leyi nge: “Mi lahlela ku vilela hinkwako ka n’wina eka [Xikwembu], hikuva xa mi khathalela.” Swa ndzi khutaza ku tiva leswaku Yehovha wa khathala hi un’wana na un’wana wa hina. Swi hambeta swi ndzi tiyisa ninamuntlha.

Mhaka yo anakanyisisa ha yona: U nga vuyeriwa njhani hi ku lahlela swiphiqo swa wena hinkwaswo eka Yehovha, ku fana na Bruna?—Pisalema 55:22.

Vanhu van’wana va ndzi khoma tanihi n’wana wa malembe ya khume. Kambe A ndzi nge va soIi; ndzi languteka ku fana na yena.

Loko ndzi ri ni malembe mambirhi, ndzi khomiwe hi vuvabyi lebyi nga tolovelekangiki bya khensa lebyi sunguleke elongweni kutani byi ya ni le byongweni. Madokodela ma kote ku byi lawula kambe vutshunguri byi kavanyete ku kula ka mina. Sweswi ndzi lehe timitara ta 1.37 (4 ft 6 in.). Vanhu vo tala va ehleketa leswaku ndza hemba loko ndzi va byela leswaku ndzi ni malembe ya 18.

Evandlheni ra Vukreste, vanhu va ndzi komba xichavo. A va ndzi khomi tanihi n’wana ku fana ni vana lava a ndzi nghena na vona xikolo. Ndzi ringeta ku va ni vonelo lerinene hi xiyimo xa mina. Nchumu wa nkoka lowu ndzi tsakisaka hileswaku, ndzi tive Yehovha. Ku nga khathariseki nchumu wun’wana ni wun’wana lowu ndzi nga ha langutanaka na wona, ndza tiyiseka leswaku Yehovha u ta ndzi khathalela. Ku ehleketa hi misava leyintshwa leyi Yehovha Xikwembu a yi tshembisaka, swi ndzi pfuna leswaku ndzi va ni langutelo lerinene.—Esaya 33:24.

Mhaka yo anakanyisisa ha yona: Ha yini ku tiva Yehovha ku ri “nchumu wa nkoka swinene eka munhu” hilaha André a vuleke hakona?—Yohane 17:3.