Икенче көринтлеләргә 8:1—24
8 Кардәшләр, сезгә Македо́ниядәге җыелышларга+ бүләк ителгән Аллаһының юмарт игелеге турында хәбәр итәсебез килә.
2 Авыр сынау кичергәндә газаплануларына карамастан, алар бик фәкыйрь булсалар да, куанычлары зур һәм юмартлыклары гаҗәеп булды.
3 Алар бит хәлләреннән килгәнчә,+ хәтта күбрәк тә эшләде,+ мин моңа шаһит.
4 Алар бездән бүләк бирү хөрмәтенә ия булуларын һәм изгеләргә ярдәм итү хезмәтендә катнашуларын үзләре үтенеп сорадылар.+
5 Алар без өметләнгәннән дә күбрәк эшләделәр һәм үзләрен иң элек Хуҗабызга, шулай ук, Аллаһы ихтыяры буенча, безгә тапшырдылар.
6 Моны күреп, без сезнең арагызда бүләк җыю эшен башлап җибәргән Ти́тусны+ шул эшне тәмамларга дәртләндердек.
7 Шулай да сездә иман, сүз, белем, һәртөрле тырышлык һәм безнең сезгә карата булган мәхәббәтебез — һәр нәрсә мул булган кебек, бу бүләк бирү эшендә дә муллык булсын.+
8 Моны сезгә әмер итеп түгел, ә мәхәббәтегезнең эчкерсезлеген сынар өчен һәм сез башкаларның тырышлыгын белсен өчен әйтәм.
9 Сез Хуҗабыз Гайсә Мәсихнең юмарт игелеген беләсез: ул бай булса да, сезнең хакка фәкыйрь булды+ һәм моны сез аның фәкыйрьлеге аша бай булсын өчен эшләде.
10 Минем фикерем шул:+ бүләк җыю эше сезгә файда китерә, чөнки сез бер ел элек башлаган шул эшне ашкынып башкарырга теләгәнегезне күрсәттегез.
11 Ә хәзер аны төгәлләгез инде. Бу эшкә бик теләп тотынган кебек, аны шундый ук теләк белән, үзегездә булганны исәпкә алып, башкарып та чыгыгыз.
12 Аллаһыны аеруча чын күңелдән бирелгән бүләк сөендерә, чөнки ул кеше булмаганын түгел, ә булганын бирер дип көтә.+
13 Башкаларның тормышларын җиңеләйтү, ә сезнекен кыенлаштыру максатым юк.
14 Бертигез итү аша сездә хәзер артыгы белән булганы алардагы кытлыкны каплавын, ә аларның артыгы белән булганы сездәге кытлыкны каплавын телим. Шулай итеп тигезлек булачак.
15 Болай дип язылган бит: «Күп булганында чиктән тыш күп, ә аз булганында чиктән тыш аз булмады».+
16 Ти́тус+ күңеленә сезнең турында бездәге кебек эчкерсез кайгырту теләге салган Аллаһыга рәхмәт яусын,
17 чөнки Ти́тус әйткәннәребезне кабул итте, һәм зур ашкыну күрсәтеп үз теләге белән сезнең яныгызга китә.
18 Аның белән бергә тагын бер кардәшебезне җибәрәбез. Аны яхшы хәбәр хакына башкарган эшләре өчен бар җыелышлар мактый,
19 һәм ул шулай ук бүләкне алып китерер өчен җыелышлар тарафыннан безгә юлдаш итеп билгеләнгән. Без бу бүләкне Хуҗабызның даны хакына һәм башкаларга ярдәм кулы сузарга теләгебезне дәлилләп таратачакбыз.
20 Шулай итеп, изгеләргә таратыр өчен үзебезгә тапшырылган мул иганәләр турында әйткәндә,+ безгә беркем дә тел тидерә алмаячак.
21 Чөнки без «Йәһвә* каршында да, кешеләр алдында да бар нәрсә турында намус белән кайгыртабыз».+
22 Алар белән бергә тагын бер кардәшебезне җибәрәбез. Без аны кат-кат сынап, аның күп яклардан тырыш булуын күрдек, ә хәзер аның сезгә карата ышанычы зур булганга, ул тагын да күбрәк тырыша.
23 Ти́тус турында шикләр булса, шуны әйтәм: ул — минем иптәшем һәм сезгә булышучы хезмәттәшем. Ә инде башка кардәшләребезгә килгәндә, алар — җыелыш рәсүлләре һәм Мәсихнең даны.
24 Шуңа күрә җыелышлар алдында аларга үз мәхәббәтегезне+ һәм сезнең белән мактанып әйткән сүзләребез юкка гына булмаганын күрсәтегез.
Искәрмәләр
^ А5 кушымт. к.