Икенче көринтлеләргә 9:1—15
9 Ә инде изгеләргә хезмәт күрсәтү+ хакында сезгә язып торасы да юк,
2 чөнки мин сезнең ярдәм итәргә әзер булуыгызны беләм һәм македо́ниялеләр алдында, Аха́ядагы кардәшләр инде бер ел буе ярдәм итәргә әзер торалар дип, сезнең белән мактанам, һәм сезнең ашкынуыгыз аларның күпчелеген дәртләндереп җибәрде.
3 Әмма сезнең белән мактануым юкка гына булмасын өчен һәм сез, әйткәнемчә, чыннан да әзер булсын өчен, яныгызга кардәшләрне җибәрәм.
4 Югыйсә македо́ниялеләр минем белән бергә килеп, сезнең әзер булмаганыгызны күрсәләр, без дә, сез дә, үзегезгә күрсәтелгән ышанычыбыз аркасында оятка калырбыз.
5 Шуңа күрә, кардәшләр сезгә алдан ук барып, үзегез вәгъдә иткән юмарт бүләгегезне җыйсыннар өчен, аларны шулай эшләргә дәртләндерергә булдым. Моны, бүләгегез көчләп алынган булсын өчен түгел, ә юмарт бирелгән булсын өчен эшләдем.
6 Өстәп тагын шуны әйтим: саран чәчүче саран уңыш урыр, ә юмарт чәчүче юмарт уңыш урыр.+
7 Һәркем теләр-теләмәс яки мәҗбүриләп түгел,+ ә йөрәгендә карар иткәнчә бирсен, чөнки Аллаһы шатланып бирүчене ярата.+
8 Аллаһы сезгә шулай ук үзенең бар юмарт игелеген мул итеп бирә ала. Шулай итеп сездә һәрвакыт бар кирәклесе булачак, һәм сезгә һәртөрле игелекле эшне башкарыр өчен дә кирәклесе мул биреләчәк.+
9 (Болай дип язылган бит: «Ул юмарт өләшә, ярлыларга булыша. Аның тәкъвалыгы мәңгелек».+
10 Чәчүчегә мул итеп орлык һәм ашарга икмәк Бирүче сезгә чәчәр өчен орлык бирер, аны мул итеп китереп торыр һәм сезгә күп тәкъвалык җимешләре җыярга булышыр.)
11 Сез дә һәрнәрсәдә юмарт булсын өчен, Аллаһы сезне мул итеп фатихалый. Бу юмартлык безнең тырышлыкларыбыз ярдәмендә кешеләрне Аллаһыга рәхмәтләр укырга этәрә,
12 чөнки башкалар хакына башкарган хезмәтегез аша изгеләр дә кирәклесе белән мул тәэмин ителә,+ Аллаһыга рәхмәт сүзләре дә күп итеп явып тора.
13 Алар Аллаһыны данлый, чөнки ярдәм итү хезмәтегез сез бар кеше алдында игълан итә торган Мәсих турындагы яхшы хәбәргә үзегезнең күндәм булуыгызны исбат итә. Алар, сез үзләренә һәм башкаларга өләшкән иганәләргә юмарт булганга, Аллаһыны мактыйлар.+
14 Алар Аллаһының сезгә күрсәтелгән гаҗәеп юмарт игелеге аркасында сезгә тартылалар, сезнең турында ялварып дога кылалар.
15 Аллаһыга әйтеп бетергесез юмарт бүләге өчен рәхмәт яусын.