ISOMO 43
Baibuli Ebazaaho ki Kunywa Amaarwa?
Omu nsi yoona, abantu baine entekereza ezirukwahukana obukirukuhika h’amaarwa. Abamu bagonza kutunga obwire bakanywera hamu n’abanywani baabo. Abandi bacwamu kutanywa amaarwa n’akake. Baitu nabwo abandi banywera kimu batamiira. Baibuli ebazaaho ki h’amaarwa?
1. Kibi kunywa amaarwa?
Baibuli tegamba ngu kibi kunywa amaarwa. Ekindi, Baibuli obw’eba n’ebazaaho ebisembo Ruhanga eby’atuhaire, ebazaaho “namarwa agasemeza omutima gwomuntu.” (Zabuli 104:14, 15) Abamu h’abaheereza ba Ruhanga abarukubazibwaho omu Baibuli abasaija n’abakazi bakanywa amaarwa.—1 Timoseo 5:23.
2. Buhabuzi ki Baibuli obw’eha abo abacwamu kunywa amaarwa?
Yahwe atanga kunywa amaarwa maingi n’obutamiizi. (Abagaratiya 5:21) Ekigambo kye kigamba ngu: “Otaikara hamu nabesesera amarwa.” (Enfumo 23:20) Nahabweki obuturacwamu kunywa amaarwa—abantu abandi n’obubarukuba batarukuturora—titusemeriire kunywa muno tukalemwa kutekereza kurungi, kulema orulimi n’engeso zaitu, rundi tukehikyaho akabi ha mibiri yaitu. Obuturaaba tutarukusobora kunywa amaarwa make agasemeriire, tusemeriire kugalekera kimu.
3. Nitusobora tuta kuteekamu ekitiinisa encwamu z’abandi obukirukuhika ha kunywa amaarwa?
Buli muntu asemeriire kwecweramu kunywa rundi kutanywa amaarwa. Omuntu kakuba acwamu kunywa amaarwa make, titusemeriire kumucwera omusango, kandi titusemeriire kusindikiriza omuntu kuganywa. (Abarumi 14:10) Nitusobora kucwamu kutanywa kakuba okunywa kwaitu kuba nikuleetera abantu abandi ebizibu. (Soma Abarumi 14:21.) Tituserra ‘ebyaitu byonka, baitu tuserra n’eby’abandi.’—Soma 1 Abakolinso 10:23, 24.
YEGA EBIRUKUKIRAHO
Wetegereze emisingi ya Baibuli ey’erakukonyera kucwamu kunywa, n’obwingi bw’amaarwa ag’oraanywa. Ekindi, manya kiki eky’osobora kukora obworaaba n’orwanisa ekizibu ky’okunywa amaarwa.
4. Cwamu obworaaba n’ogonza kunywa amaarwa rundi kutanywa
Yesu yaroraga ata kunywa amaarwa? Kumanya eky’okugarukamu, wetegereze ekyamahano eky’okubanza Yesu ekiyakozere. Musome Yohana 2:1-11, hanyuma mubazeeho ebikaguzo binu
-
Omu kyamahano kinu, nitwega ki ha mulingo Yesu aroramu amaarwa hamu n’abo abarukuganywa?
-
Nk’oku Yesu atarajumiriire abo abarukunywa amaarwa, Omukristaayo asemeriire kurora ata omuntu ow’acwiremu kunywa amaarwa?
Nobukiraaba ngu omukristaayo aine obugabe kunywa amaarwa, kinu tikirukumanyisa ngu buli kasumi kiraabaga ky’amagezi kunywa. Musome Enfumo 22:3, hanyuma mubazeeho omulingo enyikara zinu zisobora kukonyera omuntu kunywa rundi kutanywa:
-
Obworukuba n’ogenda kuvuga rundi kukozesa masini.
-
Obworukuba oine enda.
-
Kakuba dakitaali aba akugambiire kutanywa amaarwa.
-
Kakuba oba otasobora kwetanga obukirukuhika ha bwingi bw’amaarwa.
-
Kakuba ebiragiro by’ihanga ery’orumu biba bitarukukwikiriza.
-
Kakuba oba oli n’omuntu ayacwiremu kutanywa habwokuba tikyamwanguhiraga kwetanga obukirukuhika ha maarwa.
Osemeriire kuha abantu amaarwa ha mikoro y’okugaitwa rundi emikoro endi yoona? Kumanya ekirakukonyera kucwamu, Mutekeho VIDIYO.
Musome Abarumi 13:13 na 1 Abakolinso 10:31, 32. Hanyuma y’okusoma buli kyahandiikirwe, mubazeeho ekikaguzo kinu:
-
Kuteeka omu nkora omusingi gunu nikisobora kukukonyera kita kukora encwamu ey’erukusemeza Yahwe?
Buli Mukristaayo aine obugabe kucwamu kunywa amaarwa rundi kutanywa. N’obukiraaba ngu haroho obw’anywa amaarwa, baitu obwire obumu asobora kucwamu kutanywa
5. Cwamu obwingi bw’amaarwa ag’oraanywa
Kakuba ocwamu kunywa amaarwa, oijuke kinu: n’obukiraaba ngu Yahwe tarukujumirra kunywa amaarwa, ajumirra kunywa ekihinguraine. Habwaki? Musome Hoseya 4:11, 18, hanyuma mubazeeho ekikaguzo kinu:
-
Kiki ekisobora kubaho kakuba omuntu anywa ekihinguraine?
Nitusobora tuta kwetantara kunywa ekihinguraine? Tusemeriire kuba bebundaazi kandi tumanye nambere tusemeriire kugarukira. Musome Enfumo 11:2, hanyuma mubazeeho ekikaguzo kinu:
-
Habwaki kirungi kweteraho ekipimo ky’amaarwa ag’orukusobora kunywa?
6. Ekisobora kukukonyera kutanywa amaarwa ekihinguraine
Rora ekyakonyire omusaija omu kuleka kunywa amaarwa ekihinguraine. Tekaho VIDIYO, hanyuma mugarukemu ebikaguzo ebirukuhonderaho.
-
Omu vidiyo, amaarwa gaaleteraga Dmitry kwetwaza ata?
-
Akasobora kuleka kunywa aho naaho?
-
Akasobora ata kuleka kunywa amaarwa ekihinguraine?
Musome 1 Abakolinso 6:10, 11, hanyuma mubazeeho ebikaguzo binu:
-
Baibuli ebazaaho ki obutamiizi?
-
Kiki ekirukwoleka ngu n’omuntu arukunywa amaarwa ekihinguraine n’asobora kuhinduka?
Musome Matayo 5:30, hanyuma mubazeeho ekikaguzo kinu:
-
Ekyokurorraho eky’okutemaho omukono nikimanyisa ngu haroho ekitusemeriire kwefeereza kusobora kusemeza Yahwe. Kiki eky’osobora kukora kakuba oba n’otalibanizibwa ekizibu eky’okunywa amaarwa maingi? a
Musome 1 Abakolinso 15:33, hanyuma mubazeeho ekikaguzo kinu:
-
Kiki ekirarugamu kakuba onywana abantu abarukunywa amaarwa ekihinguraine?
OMUNTU N’ASOBORA KUKAGUZA: “Kibi kunywa amaarwa?”
-
N’osobora kugarukamu ota?
OYEGERE KI?
Yahwe akataho amaarwa nukwo tugegondezeemu, baitu atanga kuganywa ekihinguraine hamu n’obutamiizi.
Kweijukyamu
-
Baibuli ebazaaho ki amaarwa?
-
Kabi ki akali omu kunywa ekihinguraine?
-
Nitusobora tuta kuteekamu ekitiinisa encwamu z’abandi obukirukuhika ha kunywa amaarwa?
SERULIIRIZA
Ensingaanto nibasobora bata kukora encwamu enungi obukirukuhika ha kunywa amaarwa?
Manya ebintu eby’osobora kukora kusingura ekizibu ky’okunywa ekihinguraine.
“Ikaza Amaarwa omu Kiikaro Kyago” (Watchtower, eya Janwali 1, 2010)
Omukristaayo asemeriire kwimukya egilaasi omu mwanya atakanywire amaarwa?
“Ebikaguzo Kuruga omu Basomi Baitu” (Watchtower, eya Febwali 15, 2007)
Omu kicweka “Nanywaga Amaarwa Maingi,” rora omulingo omusaija yalekere kunywa amaarwa ekihinguraine.
“Baibuli Ehindura Obwomeezi” (Watchtower, eya Maayi 1, 2012)
a Abo abarukugumirwa muno kuleka amaarwa, nibasobora kwetaaga obukonyezi bw’abakugu. Badakitaali baingi bagamba ngu abo abakaba baine ekizibu ky’okunywa amaarwa ekihinguraine kirungi bagalekere kimu.
