ISOMO 44
Ebijaguzo Byona Bisemeza Yahwe?
Yahwe n’agonza twegondeze omu bwomeezi kandi obwire obumu tujaguze. Baitu ebijuguzo n’ebiro ebikuru byona bimusemeza? Nitusobora tuta kwoleka ngu nitugonza Yahwe obukirukuhika ha nsonga enu?
1. Habwaki ebijaguzo ebirukukira obwingi tibisemeza Yahwe?
Nikisobora kukuhuniiriza kumanya ngu ebijaguzo ebingi tibirukusigikirra ha byahandiikirwe kandi endugirro yabyo y’ekikafiiri. Ebijaguzo nk’ebi nibisobora kuba biine akakwate n’amadiini ag’ebisuba. Ekindi nibisobora n’okuba biine akakwate n’oburaguzi rundi nibisigikirra ha ntekereza ey’erukugamba ngu omwoyo tigufa. Ebijaguzo ebimu nibisigikirra ha kubandwa rundi kwikiririza omu migisa. (Isaya 65:11) Yahwe n’atererra abarukumuramya ati: “Muruge omulibo hagati . . . Kunu mutalikora ha kintu ekitasemeziibwe.”—2 Abakolinso 6:17. a
2. Yahwe ayehurra ata ha bijaguzo ebiteekamu abantu ekitiinisa ekitabasemeriire?
Yahwe n’atutererra kutagwa omu mutego ‘ogw’okwesiga abantu.’ (Soma Yeremiya 17:5.) Ebijaguzo ebimu bitamu ekitiinisa abebembezi rundi abaserikale. Abandi bajaguza obw’okurorraho bw’ihanga rundi ekiro ky’okwerema. (1 Yohana 5:21) Kandi ha bijaguzo ebindi, abantu bajaguza habw’ebitebe eby’obulemi rundi eby’abantu. Yahwe n’asobora kwehurra ata kakuba tuha omuntu rundi ebitebe, ekitiinisa ekitabisemeriire kukira muno ebirukukurakuraniza entekereza ey’erukuhakaniza ekigendererwa kye?
3. Kikorwa ki ekisobora kufoora ekijaguzo ekitarukwikirizibwa?
Baibuli ejumirra ‘okusomasoma amaarwa, obugenyi obutarumu kwetanga, n’obutamiizi.’ (1 Petero 4:3) Omu bijaguzo ebimu, abantu betwaza omu mulingo ogutarumu kwetanga kandi bejumbira omu bikorwa eby’obusiihani. Kusobora kwikara tuli banywani ba Yahwe, tusemeriire kwetantarra kimu engeso nk’ezi ezitasemiire.
YEGA EBIRUKUKIRAHO
Manya omulingo osobora kusemeza Yahwe obu n’okora encwamu ez’amagezi obukirukuhika ha biro bikuru n’ebijaguzo.
4. Yanga ebijaguzo ebitarukusemeza Yahwe
Musome Abefeso 5:10, hanyuma mubazeeho ebikaguzo binu:
-
Bintu ki ebikuru ebitusemeriire kutekerezaaho obuturukuba nitucwamu kujaguza rundi kutajaguza ekiro kikuru?
-
Biro ki ebikuru ebijaguzibwa omu kiikaro eky’orukwikaramu?
-
N’otekereza ebiro bikuru ebi nibisemeza Yahwe?
Ekyokurorraho, wakekaguzaaga Ruhanga eky’arukutekereza ha kujaguza amazaarwa? Baibuli tebazaaho omuheereza wa Yahwe wena ayajagwize amazaarwa, baitu ebazaaho abantu babiri abaagajagwize kandi abaali batarukumuheereza. Musome Okubanza 40:20-22 na Matayo 14:6-10. Hanyuma mubazeeho ebikaguzo binu:
-
Bintu ki ebirukusisana ebyabaire omu bijaguzo by’amazaarwa ganu?
-
Kusigikirra ha byahandiikirwe binu, n’otekereza Yahwe ayehurra ata ha kujaguza amazaarwa?
Ekindi, n’osobora kuba n’oyekaguza, ‘Yahwe nakwatwaho kakuba nyejumbira omu kujaguza amazaarwa rundi ekijaguzo ekindi kyona ekitarukusigikirra ha byahandiikirwe?’ Musome Okuruga 32:1-8. Hanyuma mutekeho VIDIYO, kandi mubazeeho ebikaguzo ebirukuhonderaho.
-
Habwaki tusemeriire kumanya kurungi ebintu ebirukusiimwa Yahwe?
-
Eki nitusobora kukikora tuta?
Omulingo tusobora kumanya ekijaguzo obukiraaba nikisemeza Ruhanga
-
Nikisigikirra ha nyegesa ezitali omu byahandiikirwe? Kusobora kutunga eky’okugarukamu, lengaho kumanya endugirro yakyo.
-
Nikiha ekitiinisa abantu, ebitebe rundi obwokurorraho bw’ihanga? Ekirukukirayo obukuru tutamu Yahwe ekitiinisa kandi nuwe twesiga ngu naija kumaraho ebizibu byona omu nsi.
-
Emigenzo n’emikoro y’ekijaguzo eki n’ehakaniza endengo za Baibuli? Tusemeriire kwikara tuli becumi omu ngeso.
5. Konyera abandi kutekamu enyikiriza zaawe ekitiinisa
Nikisobora kuguma kwanga kakuba abandi bakusindikiriza kwejumbira omu bijaguzo ebitarukusemeza Yahwe. Basoborre encwamu yaawe omu mulingo ogw’embabazi kandi ogw’amagezi. Kusobora kumanya omulingo orakikoramu, mutekeho VIDIYO.
Musome Matayo 7:12, hanyuma mubazeeho ebikaguzo binu:
-
Kusigikirra ha rukarra runu, osemeriire kugambira abanyabuzaale baawe abatali Bakaiso ba Yahwe ngu tibasemeriire kujaguza ekiro kikuru?
-
N’osobora kukora ki kwoleka ab’omuka yaawe ngu n’obw’oraaba otarukujaguza nabo, n’obagonza kandi n’obafaaho?
6. Yahwe n’agonza tusemererwe
Yahwe n’agonza twegonze n’abomu maka gaitu hamu n’abanywani baitu. Musome Omugambizi 8:15, hanyuma mubazeeho ekikaguzo kinu:
-
Orukarra runu nirwoleka ruta ngu Yahwe n’agonza tusemererwe?
Yahwe n’agonza abantu be basemererwe kandi begondeze hamu. Mutekeho VIDIYO murole omulingo kinu kyeyoleka ha nsorrokano enkooto ez’ensi yoona.
Musome Abagaratiya 6:10, hanyuma mubazeeho ebikaguzo binu:
-
Mali nikitwetaagisa kujaguza ebiro bikuru kusobora ‘kukorra abandi ebirungi’?
-
Kugaba kwa mulingo ki okusobora kukuleetera okusemererwa—kugaba habw’ebiro bikuru rundi kugaba kuruga ha mutima?
-
Obwire obumu Abakaiso ba Yahwe batekaniriza abaana baabo ekintu eky’embaganiza kandi babagabira n’ebisembo obubaba batarukubinihira. Obworaaba oine abaana, bintu ki eby’embaganiza eby’osobora kubakorra?
ABANTU ABAMU BAGAMBA: “Endugirro y’ekiro kikuru tikiri kikuru. Ekikuru nukwo kumara obwire n’abanyabuzaale n’abanywani.”
-
Iwe n’otekereza ki?
OYEGERE KI?
Yahwe n’agonza tusemererwe hamu n’abanyabuzaale baitu n’abanywani. Baitu n’agonza twetantale ebijaguzo ebitarukumusemeza.
Kweijukyamu
-
Bikaguzo ki ebitusobora kwekaguza kumanya ekijaguzo obukiraaba nikisemeza Yahwe?
-
Nitusobora tuta kukonyera abanyabuzaale n’abanywani baitu kwetegereza encwamu zaitu obukirukuhika ha biro bikuru?
-
N’okimanya ota ngu Yahwe n’agonza tusemererwe kandi twegonze?
SERULIIRIZA
Manya ebiro bikuru ebimu Abakristaayo ab’amananu ebibatajaguza.
“Habwaki Abakaiso ba Yahwe Batajaguza Ebiro Bikuru Ebimu?” (Ekicweka kinu kiri ha mukura)
Manya ensonga habwaki nitwikiriza ngu kujaguza amazaarwa tikirukusemeza Ruhanga.
“Habwaki Abakaiso ba Yahwe Batajaguza Amazaarwa?” (Ekicweka kinu kiri ha mukura)
Rora nk’oku omusigazi yayetwaize omu mulingo ogw’amagezi obuyasekereziibwe ha isomero habw’okutajaguza Krisimansi.
Obukaikuru n’obukaikuru bw’Abakristaayo bacwiremu kutajaguza Krisimansi. Nibehurra bata ha ncwamu yabo?
“Bakazoora Ekintu Ekirukukirayo” (Watchtower, eya Desemba 1, 2012)
a Rora Ebyongirweho 5 kumanya kiki eky’osobora kukora abantu abandi obubarukuba nibejumbira omu kijaguzo.
