Ne lauiloa a Smita, * se fafine ko 35 ana tausaga i Dhaka, Bangladesh, e pelā me se tino alofa kae atafai. Ne iloa ne tino tou fafine e pelā me se avaga galue malosi kae fiafia telā ne fia fesoasoani atu faeloa ki nisi tino ke iloa ne latou a mea ne tauloto ne ia e uiga ki te Atua. Ko oko eiloa i te ‵poi o ana kāiga mo taugasoa i te taimi ne maua fakapoi ei ne Smita se masaki telā ne mate tou fafine i ei kae seki kātoa te vaiaso!

A James mo tena avaga, se tauavaga, kolā ko taki 30 tupu lā tausaga, ne tai ‵pau eiloa te lā tulaga mo Smita. I te tau mafanafana e tasi, ne olo atu lāua o āsi ki lā taugasoa i te West Coast o te Iunaite Sitete. Ne seki toe ‵foki atu eiloa ki te lā fale i Niu Ioki. I te taimi ne olo ei lāua, ne aofia i se fakalavelave tupu fakafuasei i te fe‵pakiga o motoka, telā ne fakafanoanoa malosi ‵ki eiloa ki lā kāiga mo taugasoa i te galuega.

Ko se toe ‵tau o kilo ‵mao atu koe ke lavea atu me ko malaku eiloa a mea ma‵sei mo logo‵maega i aso nei. E tamate ne taua a tino ‵lei mo tino ma‵sei, penā foki loa mo sotia. E logo‵mae a tino ‵lei i amioga solitulafono mo fakasauaga. E oko atu a fakalavelave ‵tupu fakafuasei mo masaki kolā e ‵mate ei a tino, faitalia me e pefea te matua io me ko te tulaga o se tino i te olaga. E fakaseai atu ne mea ‵tupu a fa‵kai e aunoa mo te mafaufau faka‵lei. Ko salalau malosi atu a te fakailoga tino mo faifaiga sē fakamaoni. Kāti ne logo‵mae foki koe i mea konā.

Se mea masani ke fesili ifo penei:

• Kaia e ‵tupu ei a mea ma‵sei ki tino ‵lei?

• E mata, e ‵tau o ‵losi atu ki te Atua mō mea penā?

• E mata, e ‵tupu fakafuasei a fakalavelave, io me ne māfua mai i tino?

• E mata, ko te Karma, telā ko te ikuga o faifaiga a se tino i se olaga mua, telā e māfua mai i ei a logo‵maega o te tino?

• Kafai e isi se Atua malosi katoatoa, kaia e se puipui ei ne ia a tino mai i mea fakalogo‵mae?

• E mata, ka mafai o saoloto te olaga mai i amioga matagā mo logo‵maega?

Ke tali aka a fesili konā, e ‵tau o iloa ne tatou a te tali ki fesili fakavae konei e lua: Kaia e ‵tupu ei a mea ma‵sei, kae ne a mea ka fai ne te Atua ki ei?