Ɔsɛnkafo 1:1-18
1 Dawid ba, ɔsɛnkafo*+ a odii hene wɔ Yerusalem no,+ ne nsɛm ni.
2 “Ahuhude mu ahuhude!”* Ɔsɛnkafo no na waka,“Ahuhude mu ahuhude! Ade nyinaa yɛ ahuhude!”+
3 Dɛn na onipa nya fi n’adwumaden nyinaa mu,Adwuma a obiri ne mogya ani yɛ wɔ wiase nyinaa no?+
4 Awo ntoatoaso kɔ, na awo ntoatoaso ba,Na asaase de, ɛwɔ hɔ* daa.+
5 Owia pue,* na owia kɔtɔ;Afei ɛde mmirika san kɔ baabi a epue fii no, na ɛsan pue bio.+
6 Mframa kɔ anaafo, na etwa ne ho kɔ atifi;Etwa ne ho frɛdɛfrɛdɛ; mframa kɔ so ara twa ne ho.
7 Nsubɔnten* nyinaa tene kogu po mu, nanso ɛpo nyɛ ma da.+
Baabi a nsubɔnten no fi ba no, ɛhɔ ara na ɛsan kɔ, na asan afi hɔ aba bio.+
8 Ade nyinaa yɛ ɔbrɛ nko ara;Obiara ntumi nka ho asɛm mpo.
Ani hwɛ ade a, ɛmmee,Na aso nso tie asɛm a, ɛnyɛ ma.
9 Nea aba pɛn no, ɛno ara na ɛbɛsan aba,Na nea wɔayɛ pɛn no, ɛno ara na wɔbɛsan ayɛ bio;Ade foforo biara nni wiase.+
10 Ɛdɛn paa na ɛwɔ hɔ a obi betumi aka sɛ, “Hwɛ, ade yi yɛ ade foforo”?
Ɛwɔ hɔ fi teteete;Ɛwɔ hɔ dedaadaw ansa na yɛreba.
11 Obiara nkae tetefo;Na nkyirimma nso, obiara renkae wɔn,Wɔn a wobedi wɔn akyi aba nso renkae wɔn.+
12 Me ɔsɛnkafo no, midii Israel so hene wɔ Yerusalem.+
13 Mede sii m’ani so sɛ biribiara a wɔyɛ wɔ ɔsoro ase,+ kyerɛ sɛ, adwumahunu a Onyankopɔn de ama nnipa a egye wɔn adwene no, mede nyansa+ besua ho ade na mahwehwɛ mu.
14 Na mihuu nnwuma a wɔyɛ wɔ wiase nyinaa,Na hwɛ! ade nyinaa yɛ ahuhude, na ɛyɛ ɔbrɛgu.*+
15 Nea akyea no, wɔrentumi nteɛ no,Na nea enni hɔ nso, wɔrentumi nkan mma ɛnyɛ yiye.
16 Ɛnna mekae wɔ me komam sɛ: “Hwɛ! Mahu nyansa pii asen wɔn a wodii me kan wɔ Yerusalem nyinaa,+ na me koma anya nyansa ne nimdeɛ pii.”+
17 Mede me koma hwehwɛɛ nyansa ne adammɔ* ne nkwaseasɛm.+ Na eyi nso yɛ ahuhude, na ɛyɛ ɔbrɛgu.*
18 Efisɛ nyansa bebrebe de ahometew bebree na ɛba.
Ɛno nti, obiara a ɔma ne nimdeɛ dɔɔso no, ɔma ne yaw nso dɔɔso.+
Ase Hɔ Nsɛm
^ Nt., “ɔnoboaboafo.” Anaa “nea ɔboaboa asafo ano.”
^ Anaa “Ade a mfaso biara nni so.”
^ Nt., “egyina hɔ.”
^ Anaa “hyerɛn.”
^ Anaa “Awɔw bere mu nsubɔnten.”
^ Anaa “ɛte sɛ nea obi pɛ sɛ ɔkyere mframa.”
^ Anaa “nkwaseasɛm a ɛboro so.”
^ Anaa “ɛte sɛ nea obi pɛ sɛ ɔkyere mframa.”
