TAUTURU NO TE UTUAFARE | NO TE TAUREAREA
E nafea ia farii i te aˈo?
TE FIFI
“Ia aˈohia oe, te faaite maira ïa te tahi taata e ua hape oe. Aita vau i ite hoê noa ˈˈe ia parau e ‘mea au na ˈu ia parauhia mai e ua hape au!’”—Amy, 17 matahiti. a
E ere paha i te mea ohie no oe ia farii i te aˈo a to oe na metua, te mau orometua e te tahi atu taata. E tauturuhia ïa oe e teie tumu parau.
TE TIA IA ITE
E aˈohia iho â te taata atoa.
“Te hapa nei hoi tatou atoa i te mau mea atoa e rave rahi.”—Iakobo 3:2.
“Eiaha e haama ia aˈohia oe no te mea ua hape oe.”—Jessica.
Ia aˈohia oe, e ere oe i te taata ino.
“O tei herehia e Iehova b ra, o ta ˈna ïa e aˈo mai, mai te metua e aˈo i te tamaiti ta ˈna e here ra.”—Maseli 3:12.
“E feruri au e e ere i te mea ohie no te taata ia aˈo mai. A na reira ˈi, te faaite maira ïa i to ratou here ia ˈu.”—Tamara.
E tauturu te aˈo ia riro ei taata maitai.
“E faaroo mai i te aˈo ia paari.”—Maseli 8:33.
“Mea faufaa te aˈo no te taui i to oe huru. Ia aˈo atu te taata, e ite oe i to ˈna manaˈo no oe, na reira atoa te mau peu au ore ta oe e rave ra ma te ore e haapao.”—Deanne.
TA OE E NEHENEHE E RAVE
Eiaha e haapao noa ia oe. A aˈohia ˈi, e riri paha oe. Ma te ore e haapao noa ia oe, a feruri na i te hoê taime e o oe te aˈo ra i te tahi atu taata, mai to oe taeae aore ra tuahine. Te ite ra anei oe e ua tano oia i te aˈo ia oe? I te taime oe e aˈohia ˈi, a feruri mai te taata e aˈo ra.—Aratairaa Bibilia: Koheleta 7:9.
“I te tahi taime, no te riri, e haamoe roa oe te hinaaro ra tei aˈo atu e tauturu ia riro ei taata maitai aˈe, eiaha râ e haamauiui ia oe.”—Theresa.
A faaite noa i te haehaa. Eiaha e vaiiho i te teoteo ia turai ia oe ia patoi i te aˈo. Eiaha atoa râ ia toaruaru a manaˈo ai e mea tia ia taui oe. Mea faufaa mau ïa te haehaa. A haamanaˈo, ia mauiui oe, e pinepine ua tano maitai te aˈoraa i horoahia ˈtu. Ma te ore e farii i te reira, aita oe e haafaufaa ra i tera ravea no te taui.—Aratairaa Bibilia: Maseli 16:18.
Ia mauiui oe, e pinepine ua tano maitai te aˈoraa i horoahia ˈtu
“Mea faufaa ia farii i te aˈo no te riro ei taata paari. Ia ore tatou e matau i te na reira e i te taui, o tatou iho â te ati i te pae hopea.”—Lena.
A faaite i te mauruuru. Noa ˈtu e e ere i te mea ohie ia farii, a faaite i to oe mauruuru i te taata i aˈo atu. Eita e ore e te hinaaro ra oia ia maitai e ia oaoa oe.—Aratairaa Bibilia: Salamo 141:5.
“Mea maitai aˈe ia haamauruuru, mea tano anaˈe iho â râ te aˈoraa. Noa ˈtu e eita oe e na reira, e nehenehe oe e faaite i te mauruuru no te mea ua haere mai oia e farerei ia oe.”—Carla.