TE RAHI oioi noa ˈtura te taata e roohia i te maˈi omaha tihota na te ao nei. E piti hohoˈa maˈi omaha tihota. E haamata te omaha tihota faito 1 i te tamariiraa e e au ra e aita e ravea ta te mau taote no te faaore i te reira. Fatata 90 i nia i te hanere o te feia maˈimaˈi tei roohia i te omaha tihota faito 2 e tera te hiˈopoahia i roto i teie tumu parau.

Na mua ˈˈe, ua itehia o te mau taata paari noa te roohia i te maˈi omaha tihota faito 2. I teie nei râ, ua roo-atoa-hia te mau tamarii i tera maˈi. No te feia îite, e nehenehe te taata e arai i te maˈi omaha tihota faito 2. E tauturu atu paha maa hiˈopoaraa o teie maˈi haavarevare ia oe. a

E omaha tihota to te tahi taata ua rahi roa anaˈe te faito o te tihota i roto i to ˈna toto. No tera maˈi, eita te tihota e faataehia mai te tanoraa mau i roto i te mau taoˈa tahi ora no te faaitoito i to tatou tino. E ino te mau mero faufaa roa o te tino, e fifi te tereraa o te toto e e pinepine e nehenehe te manimani avae aore ra te avae iho e tâpûhia. E ino atoa te mata e te mau mape. E pohe te rahiraa o te feia e omaha tihota to ratou a tupu taue ai te tahi maˈi i roto i te roro aore ra te mafatu.

Ia poria roa te tahi taata, e nehenehe oia e roohia i te maˈi omaha tihota faito 2. No te feia îite, e ino atu â te ea o tei roohia i te maˈi omaha tihota ua rahi anaˈe te meˈi i roto i te opu. Mea atâta roa ˈtu â, e meˈi anaˈe to roto i te rama e te upaa, e fifi hoi te faanahoraa o te faafaito i te tihota i roto i te toto. Eaha te rave ia ore oe e roohia i tera maˈi?

1. A hiˈopoa i te faito tihota i roto i to oe toto. E pinepine na mua ˈˈe oe e roohia ˈi i te maˈi omaha tihota faito 2, e ohipa tei tupu i roto i to tino. E au tei nia rii te faito tihota i roto i to oe toto i te tanoraa mau. Mea atâta na tupuraa e piti. Noa ˈtu e haapao maitai tei roohia i te maˈi omaha tihota faito 2 i to ˈna ea, eita ta ˈna e nehenehe e faaore i te reira. No te feia râ tei nia rii te faito tihota, e nehenehe ratou e faaiti i te reira ia au i te tanoraa mau. Aita e tapao e aita atoa paha vetahi i roto i tera tupuraa i manaˈo ua rahi rii te faito tihota i roto i to ratou toto. Ia au i te tahi hiˈopoaraa, 316 mirioni taata na te ao tei roto i tera tupuraa, aita râ te rahiraa o ratou i ite. I Marite noa, 90 taata i nia i te hanere tei ore i ite tei nia rii te faito tihota i roto i to ratou toto.

Mai te peu e ua rahi rii te faito tihota i roto i to oe toto, e nehenehe oe e roohia i te maˈi omaha tihota faito 2. Aita i maoro aˈenei, ua ite-atoa-hia e nehenehe te upoo o te feia i roto i tera tupuraa e ino roa. Mea poria anei oe? E fetii atoa anei to oe tei roohia i te maˈi omaha tihota aore ra aita oe e faaetaeta ra i to tino? Ua rahi rii ê na paha te faito tihota i roto i to oe toto. No te papu râ, a haere e hiˈopoa ia oe.

2. A haapao maitai i ta oe maa. Ia nehenehe e ia tano, e maitaihia paha oe i te haapao i to muri nei mau manaˈo: A tarani i ta oe maa. A inu i te pape, te ti aore ra te taofe, eiaha râ te inu monamona e pihaa. Eiaha atoa e amu i te maa tuhituhi e a faatano noa ia amu oe i te faraoa, te raiti e te tahi atu tapiri. A amu i te iˈo aita i rahi te meˈi i nia iho, te iˈa, te aratita e te pipi.

3. A faaetaeta noa i to tino. Ia na reira oe, e iti te faito tihota i roto i to oe toto e e tano noa atoa to oe kilo. Te faaitoito ra te tahi taata îite ia mono maa taime ta oe e faataa ra no te mataitai i te afata teata no te faaetaeta i to tino.

Eita oe e nehenehe e taui i to oe mau tapao tupuna, to oe râ huru oraraa, oia ïa! Ma te tutava i te haapao i to ea, o oe iho â te maitaihia!