E HITU matahiti to Susan, ua haamata oia i te uiui no nia i te Atua a tapeahia ˈi to ˈna hoa Al e iva matahiti i te fare maˈi. Ua roohia o ˈna i te maˈi o te haafifi i te mau uaua uira o te tino parauhia polio. Ua tuuhia o ˈna i roto i te tahi afata auri ia nehenehe to ˈna mahaha ia pâmu i to ˈna aho. Ua papai Susan i to ˈna aamu i roto i te vea The New York Times i matara i te 6 no Tenuare 2013.

I to ˈna haereraa e hiˈo ia Al i te fare maˈi, ua ani Susan i to ˈna mama: “No te aha te Atua e na ô ai i nia i te hoê tamaiti?”

Na ô atu te mama: “Ua parau te perepitero e tumu te Atua i na ô ai, no te ite râ eaha te reira, aita vau i ite.”

E piti matahiti i muri aˈe, i 1954, ua hamani Jonas Salk te raau patia arai i te maˈi polio. Ua parau to Susan mama, peneiaˈe na te Atua i aratai i ta ˈna mau maimiraa.

Pahono atura Susan: “Ahiri te Atua i aratai i te mau taote ehia aˈenei matahiti, eita Al e tuuhia i roto i te hoê afata auri no te mahaha.”

No ta ˈna i ite i to ˈna tamariiraa, teie ta Susan mau parau hopea: “E vau noa matahiti i muri aˈe, ua pohe [Al] e ua faaea roa vau i te tiaturi te vai ra te Atua i tera taime.”

Mai ia Susan, e rave rahi tei mauiui aore ra tei ite ia vetahi ê ia faaruru i te ati. Aita i noaa ia ratou te mau pahonoraa papu i te mau uiraa no nia i te Atua. Ua faaea vetahi i te tiaturi te vai nei o ˈNa. Area te tahi atu, eita e parau roa aita e Atua, e manaˈo feaa râ to ratou no nia ia ˈNa.

E ere râ te auraa aita e haapaoraa ta teie mau taata na mua ˈˈe. E pinepine hoi, na te reira i turai atu ia manaˈo mai tera. No ratou, aita i tia i te mau haapaoraa ia pahono i te mau uiraa faufaa mau o te oraraa. Te mea maere râ, hoê â uiraa ta ratou e ta te feia e parau ra e tiaturi i te Atua. E hiˈo anaˈe e toru uiraa ta te mau taata e rave rahi e hinaaro e ui i te Atua e te mau pahonoraa a te Bibilia.

No te aha tera uiraa?

E rave rahi te manaˈo, ‘Eita te hoê Atua î i te here e vaiiho ia tupu te ati.’

A FERURI NA: Mea huru ê e peneiaˈe, mea ino no tatou te peu a te tahi nunaa taata. E hape paha to tatou manaˈo i te hoê ohipa ta ratou e rave. No te tahi nunaa taata, mea maitai ia hiˈo noa ia vetahi ê no te haapapu e taata haavare ore oe. Area no te tahi atu, e tapao no te faatura ore ïa. E ere te auraa, mea ino teie nunaa taata. E titauhia râ ia haamatau atu â ia ratou.

E tano atoa tera hiˈoraa no te Atua. E rave rahi te tiaturi aita e Atua no te mau ati e itehia nei. No te tahi atu râ, te vai mau nei oia no te mea ua taa ia ratou i te tumu i vaiiho ai te Atua ia tupu te ati.

TA TE BIBILIA E PARAU RA: Mea taa ê roa te mau manaˈo e haerea o te Atua i to tatou. (Isaia 55:8, 9) No reira, i te haamataraa, mea huru ê paha ta ˈna mau haaraa, oia atoa te tumu e ore ai oia e ohipa oioi.

Aita râ te Bibilia e ani mai ra ia farii i te mau parau huru ê mai teie: “Eita e nehenehe e ite mea nafea te Atua ia ohipa.” Te faaitoito mai ra râ ia haapii atu â no nia i te Atua e te faataa ra no te aha e afea oia e ohipa ˈi. a Ia au atoa te Bibilia, e nehenehe tatou e haafatata ˈtu ia ˈNa.—Iakobo 4:8.

No te aha tera uiraa?

E manaˈo vetahi, ‘Ahiri mea au ore na te Atua i te taata haavarevare, eita ratou e itehia i rotopu i te feia e haamori ia ˈna.’

A FERURI NA: A hiˈo na i te tamaiti o te patoi i te aratairaa maitai a to ˈna metua tane e te faarue i te fare no te hoê oraraa haapaoraa ore. Noa ˈtu aita te metua e farii ra, e vaiiho oia i ta ˈna tamaiti ia haere. E tiamâraa hoi to ˈna ia maiti. Mea tano anei ia parau te feia e farerei atu i te tamaiti, mea ino to ˈna papa aore ra aita to ˈna e metua tane? Eita! Ia itehia te feia haavarevare i roto i te haapaoraa, e haapapuraa noa te reira ua vaiiho te Atua ia maiti i te oraraa ta ratou i hinaaro.

TA TE BIBILIA E PARAU RA: Mea au ore na te Atua te feia haavarevare. (Ieremia 7:29-31; 32:35) E vaiiho râ o ˈna i te taata ia faaohipa i to ratou tiamâraa ia maiti. E rave rahi taata tiaturi i te Atua o tei faaoti i te haapao i te mau haapiiraa a te taata. Ua maiti atoa i te ora mai ta ratou e hinaaro.—Mataio 15:7-9.

Eita râ e itehia tera huru haavarevare i roto i te haapaoraa ta te Atua e farii ra. b Ua na ô Iesu: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) Ia riro tera here ei mea “haavare ore.” (Roma 12:9) Aita te rahiraa o te mau haapaoraa i haapao i tera faaueraa. I 1994 i Rwanda, ahuru tausani taata tei haapohehia e te feia o ta ratou iho haapaoraa no te mea noa, no te tahi atu opu ratou. Area te mau Ite no Iehova, aita i na reira. E rave rahi hoi tei paruru i to ratou mau hoa Kerisetiano e te tahi atu mau taata noa ˈtu e haapohehia ratou. Te haapapu ra te reira mea haavare ore te feia o tera haapaoraa.

No te aha tera uiraa?

E uiui paha vetahi, ‘No te aha te taata e ora noa ˈi 80 aore ra 90 matahiti a pohe atu ai? Eaha te faufaaraa o te hoê oraraa poto mai tera?’

A FERURI NA: E farii e rave rahi taata o te ore e tiaturi i te Atua mea faahiahia e maere mau te hamaniraa e te nahonaho o te mau mea atoa e vai nei. Ua ite ratou mea faaineine-maitai-hia to tatou fenua, te tahi atu mau paraneta e te avaˈe. Te farii atoa ra mea tano maitai te mau ture o te natura no te aratai i te ao nui. Ahiri e hauti-rii-hia aˈe te reira, eita roa hoê mea e nehenehe e ora aore ra e tupu i nia i te fenua.

TA TE BIBILIA E PARAU RA: Te manaˈo ra te rahiraa, aita e Atua no te mea e oraraa poto to te taata. Te haapapu ra râ te mau mea atoa i roto i te ao, te vai ra hoê Atua poiete. (Roma 1:20) E tumu o ˈna i hamani ai i te mau mea atoa. Ua opua oia ia ora te taata e a muri noa ˈtu i nia i te fenua e aita te reira i taui.—Salamo 37:11, 29; Isaia 55:11.

E ite tatou te vai mau ra te Atua e e huru maitatai to ˈna na roto i te mau mea ta ˈna i hamani. E ere râ tera te ravea ta ˈNa i maiti no te faaite i ta ˈna opuaraa. E titauhia ia faataa mai oia i te reira, oia atoa no te aha tatou i hamanihia ˈi. E tera ta ˈna i rave ma te haapapai i te mau parau ohie ia taa i roto i te Bibilia. c Te faaitoito atu ra te mau Ite no Iehova ia hiˈopoa i te mau pahonoraa e vai ra i roto.