Aita ïa e teoteo aore ra ahaaha. Eita te taata haehaa e manaˈo e mea faufaa aˈe o ˈna ia vetahi ê. Ua ite te taata hara haehaa e e taotiaraa to ˈna.

E pinepine e ite-mau-hia te huru o te hoê taata ia noaa ia ˈna te tahi mana. E taata haehaa anei aore ra aita. Ia au i te reira, ua papai Robert Ingersoll: “E nehenehe te rahiraa o te taata e faaruru i te mau fifi. Ia hinaaro râ oe e ite eaha mau te huru o te hoê taata, a horoa ˈtu ïa i te mana.” Aita Mose i teoteo no te mea e mana to ˈna. I roto i tera tuhaa, e hiˈoraa maitai ïa o ˈna. No te aha?

A faaue ai Iehova ia Mose ia aratai ia Iseraela, e mana rahi ta ˈNa i horoa ˈtu. Aita râ Mose i teoteo aˈe. A hiˈo na i to ˈna haehaa a faatitiaifaro ai oia i te tahi fifi no nia i te tufaraa faufaa. (Numera 27:1-11) E ere taua tupuraa i te mea ohie, e riro hoi te reira ei hohoˈa no te mau ui i muri aˈe.

E nafea ïa Mose? E manaˈo anei o ˈna e ei aratai o Iseraela, e tia ia ˈna ia rave i te faaotiraa? E tiaturi anei oia i to ˈna aravihi, i tei tupu i roto i to ˈna oraraa aore ra i ta ˈna i taa no nia i te manaˈo o Iehova?

E na reira paha te taata teoteo, o Mose râ aita ïa. Te faatia maira te Bibilia: “Ua hopoi aˈera Mose i t[er]a parau na ratou ra i mua i te aro o Iehova.” (Numera 27:5) A feruri na! Noa ˈtu e ua aratai oia i te nunaa Iseraela fatata e 40 matahiti, ua tiaturi noâ Mose ia Iehova eiaha râ ia ˈna iho. Te papu maitai ra ia tatou e e taata haehaa mau Mose.

Ua manaˈo anei oia no ˈna anaˈe te tiaraa aore ra mana? Aita. Ua oaoa oia a farii ai Iehova ia riro mai te tahi atu mau Iseraela ei peropheta. (Numera 11:24-29) A parau ai to ˈna metua tane hoovai ia maiti i te tahi atu mau taata no te tauturu ia ˈna, ma te haehaa ua farii atu oia. (Exodo 18:13-24) I te pae hopea o to ˈna oraraa, noa ˈtu e te itoito noa ra to ˈna tino, ua ani Mose ia Iehova ia faatoroa i te tahi mono no ˈna. A maiti ai Iehova ia Iosua tei apî aˈe ia ˈna, ua turu maitai atu Mose ma te faaitoito i te nunaa ia pee i ta Iosua aratairaa i te Fenua tǎpǔhia. (Numera 27:15-18; Deuteronomi 31:3-6; 34:7) No Mose, e fanaˈoraa taa ê iho â ia aratai i to Iseraela i roto i te haamoriraa. Aita râ oia i haafaufaa i te tiaraa aore ra mana na mua ˈˈe i te maitai o vetahi ê.

Eiaha roa e faateitei ia tatou no te tahi tiaraa aore ra aravihi. A haamanaˈo: No te rave maitai i ta Iehova ohipa, mea faufaa aˈe to tatou haehaa i te aravihi. (Samuela 1, 15:17) Ei taata haehaa mau, e tutava tatou i te haapao i teie aˈoraa paari o te Bibilia: “E tiaturi ia Iehova ma to aau atoa ra; eiaha râ e tiaturi i to oe ihora haapao [aore ra ite].”—Maseli 3:5, 6.

Te haapii atoa maira te hiˈoraa o Mose e eiaha e haafaufaa rahi roa i to tatou tiaraa aore ra mana.

E faufaahia anei tatou i te haehaa o Mose? E! Mea ohie aˈe no te taata ia here mai ia faaite tatou i te haehaa mau. Te mea faufaa roa râ, ia auhia mai tatou e Iehova, o ˈna hoi te faaite i taua huru maitai ra. (Salamo 18:35) “E patoi . . . te Atua i tei teot[e]o, e horoa maira i te maitai no tei haehaa.” (Petero 1, 5:5) E ere anei tera te tahi tumu papu ia pee i te hiˈoraa o te haehaa o Mose?