Ia au i te Bibilia, o te tiaturiraa aueue ore ïa i te mau mea i haapapuhia. No te taata i faatupu i te faaroo i te Atua, e tupu iho â ta ˈNa i fafau.

Ua ora Mose ia au i ta te Atua mau parau fafau. (Genese 22:15-18) E nehenehe o ˈna e fanaˈo i te hoê oraraa maitai i Aiphiti, aita râ oia i maiti i te reira. “Mea maitai ia ˈna te rave atoa i te pohe i te amuiraa i te taata no te Atua ra; ia rave i te navenave poto noa o te parau ino.” (Hebera 11:25) Ua faaoti noa anei o ˈna mai tera a tatarahapa ˈtu ai i muri aˈe? Aita, te na ô ra hoi te Bibilia e ua “itoito maite atura [Mose] i te hiˈoraa ˈtu i te Atua, i tei ore e itea ia hiˈo.” (Hebera 11:27) Aita Mose i tatarahapa noa ˈˈe i te mau faaotiraa ta ˈna i rave no to ˈna faaroo.

Ua tutava Mose i te haapuai i te faaroo o vetahi ê. A hiˈo na i tei tupu a manaˈo ai Iseraela e aita ta ratou e ravea. To muri hoi te nuu o Pharao e to mua ˈtu te miti Uteute. No to ratou riaria, pii hua aˈera to Iseraela ia Iehova e ia Mose. Ua nafea ihora oia?

Aita Mose i ite noa ˈˈe e e vahi te Atua i te miti Uteute ia ora mai te mau Iseraela. Ua tiaturi râ oia e e rave Iehova i te tahi mea no te paruru i to ˈNa nunaa. Ua hinaaro atoa Mose ia tiaturi atoa to ˈna mau hoa Iseraela i te reira. Te taiohia ra: “Ua parau atura Mose i taua mau taata ra, Eiaha outou e mǎtaˈu; e parahi noa, e hiˈo i te ora a Iehova, i ta ˈna e rave no outou i teie nei mahana.” (Exodo 14:13) Ua haapuai anei Mose i te faaroo o to ˈna mau hoa Iseraela? Oia mau. Eiaha noa no Mose, no te mau Iseraela taatoa râ, te na ô ra te Bibilia: “No te faaroo i tae ai ratou na raro i te miti uteute mai te mea e e fenua pâpâmǎrô.” (Hebera 11:29) E ere noa ïa Mose tei faufaahia i te faaroo, o te mau taata atoa râ te haapii i te faatupu i te faaroo ia Iehova.

E nehenehe tatou e pee ia Mose ma te ora ia au i ta te Atua mau parau fafau. Ei hiˈoraa, te fafau maira te Atua e e haapao oia i to tatou mau hinaaro i te pae materia ia tuu i ta ˈna haamoriraa na mua roa i roto i to tatou oraraa. (Mataio 6:33) E ere iho â i te mea ohie ia na reira, te haafaufaa rahi nei hoi te rahiraa o te taata i te mau taoˈa materia. Tei papu râ, ia tutava tatou i te faaohie i to tatou oraraa ma te haafaufaa na mua roa i ta tatou haamoriraa, e horoa mai Iehova i tei hinaarohia. Te haapapu maira oia: “E ore roa vau e taiva ia oe, e ore roa vau e faarue ia oe, e ore, e ore roa ˈtu.”—Hebera 13:5.

E tutava atoa anaˈe i te haapuai i te faaroo o vetahi ê. Ei hiˈoraa, na te mau metua te hopoia rahi e tauturu i ta ratou tamarii ia faatupu i te faaroo. A paari ai ratou, e mea tia ia ite te tamarii e te vai mau ra te Atua e ua horoa atoa mai oia i ta ˈna mau faaueraa no nia i te mea maitai e te mea ino. Ia papu atoa ia ratou e e maitai te oraraa ia haapaohia ta ˈna mau faaueraa. (Isaia 48:17, 18) Ia tauturu te mau metua i te tamarii ia faatupu i te faaroo i te Atua e “o oia te faautua [aore ra haamaitai] i te feia i imi papu ia ˈna,” ua horoa ïa ratou i te taoˈa faufaa i ta ratou tamarii.—Hebera 11:6.