«СИЛЕРНИҢ оода чаңгызыңар Англияга азы Францияга удур дайылдашпас болза, шуптуңарны өлүрүп кааптар бис!» — деп, нацист офицер хоругдаттырган Иегованың Херечилеринче ырланган. Оларның чанынга долузу-биле чепсегленген нацист солдаттар турган-даа болза, бистиң акыларывыс ооң кыжаныгларынга алыспаан. Кандыг кончуг эрес-дидим улус боор! Иегованың Херечилери дайыннарга киришпейн турар деп моон көскү. Бисти өлүрер деп кыжанза-даа, бо делегейде чөрүлдээлерниң кайы-даа талазын деткивес бис.

1. БУРГАННЫҢ ШУПТУ БАРААЛГАКЧЫЛАРЫ ЧАҢГЫС ЧОН ЧОРААН

Эрткен үеде Иегова Бодунуң бараалгакчыларын чаңгыс израиль чон кылдыр чыып алган. Ол израильчилерни «бүгү чоннар аразындан Мээң улуг үнелиг өнчү-хөреңгим» деп адаан (Хост. 19:5) Оон ыңай Бурган оларга аңгы девискээрни берген. Ынчангаш Иегова оларны өске чоннарга удур дайылдажыр кылдыр чоргузуптарга, олар кады бүзүрээн ха-дуңмазын өлүрбейн, оларга удур дайылдашпас турган a.

Амгы үеде Бурганның чону «янзы-бүрү дылдарлыг сөөк-язы, аймак» чоннардан тургустунган (Ажыд. 7:9). Бир эвес Иегованың бараалгакчылары дайынче баар болза, олар кады бүзүрээн ха-дуңмаларынга удур дайылдажып, безин  оларны өлүрер апаар. Ону бодаары безин коргунчуг-дур!

2. ИЕГОВА БОДУ ИЗРАИЛЬЧИЛЕРГЕ ДАЙЫЛДАЖЫРЫН АЙЫТКАН

Эрткен үеде израильчилер кажан база кандыг сорулга-биле дайылдажырын Иегова Боду шиитпирлеп турган. Чижээ, Бурган оларга ханаан чонну узуткаар даалга берген, чүге дээрге олар буктарга чүдүп, үй-балай самыырап, ажы-төлүн өргүлге эккеп турганнар. Иегова ону Аазаттынган черни багай салдардан камгалаар дээш, кылган (Лев. 18:24, 25). Израильди кожа дайынзырак чоннардан камгалазын дээш, Иегова чамдыкта оларга дайылдажырын чөпшээреп турган (2 Хаан. 5:17—25). Ынчалза-даа Иегова израильчилерге дайылдажыр азы дайылдашпас шиитпирни боттары хүлээр кылдыр, черле чөпшээревес турган. А кажан олар бодунуң туразы-биле дайылдажырга, уржуктары дыка коргунчуг турган (Сан. 14:41—45; 2 Чыл. 35:20—24).

Амгы үеде Иегова улусту дайыннарже чоргуспайн турар. Ынчаарга улус чүге дайылдажып турар? Олар Бурганның эвес, а боттарының сонуургалдарын камгалаар дээш, чаа девискээрлерни эжелээр дээш, экономиктиг азы политиктиг сорулгаларын чедип алыр дээш, дайылдажып турар. Оон аңгыда, Бурганның адындан дайылдажып тур бис дээр улус база бар. Олар «Бурганның дайзыннарын өлүрүп, бүзүреливисти камгалап турар бис» дижир. Ынчалза-даа Иегова удавас болур Армагеддон дээр дайынга алыс шын бараалгакчыларын камгалап, дайзыннарын Боду узуткап каар (Ажыд. 16:14, 16). Ол тулчуушкунга киржир Бурганның аг-шерии кижилерден эвес, а чүгле дээрниң төлээлеринден тургустунар (Ажыд. 19:11—15).

3. ИЗРАИЛЬЧИЛЕР ИЕГОВАГА БҮЗҮРЭЭР УЛУСКА ДЕГБЕС ТУРГАН

Эрткен үеде израиль аг-шериг Иегованың өлүмге шииткен улузун өлүрүп, а Аңаа бүзүрээр улусту өлүрбес турган. Ийи чижекти көрүптээлиңер. Иегова Иерихонну узуткаар кылдыр дужааган-даа болза, Раав быжыг бүзүрелдиг боорга, израильчилер ону база ооң чоок улузун өлүрбээн  (Иис. 2:9—16; 6:15, 16). Соонда Гаваон дээр бүдүн хоорай Бурганга хүндүткелдиг хамаарылгалыг болганы-биле өлүмден чайлай берген (Иис. 9:3—9, 17—19).

Амгы үеде дайылдажып турар чурттар Бурганга бүзүрээр-даа, бүзүревес-даа улусту хамаан чок кыра шаап турар. Колдуунда ындыг дайыннарга бөдүүн чон амы-тынындан чарлып турар.

4. ИЗРАИЛЬЧИЛЕР ДАЙЫЛДАЖЫП ТУРГАШ, БУРГАННЫҢ АЙТЫЫШКЫННАРЫНДАН СЫРЫЙ ТУТТУНУП ТУРГАН

Эрткен үеде дайыннарны чорударда, Иегова израильчилерден айтыышкыннарын сагыырын негеп турган. Чижээ, чамдык таварылгаларда хоорайны эжелээриниң мурнунда, израильчилер баштай «тайбыңны» саналдаар ужурлуг чораан (Ы. х. к. 20:10). Оон ыңай израильчи дайынчылар турлаанга арыг-силигни сагып, бедик мөзү-шынарлыг алдынар ужурлуг турганнар (Ы. х. к. 23:9—14). Кожа чоннар эжелеп алган хоорайының херээжен улузун күштеп-чазарлаар турган. Ынчалза-даа Иегова Бодунуң чонунга ону кылырын хоруп каан. Оон артык, бир эвес израильчи кижи туттурган херээжен кижини кадай кылдыр алыксап турган болза, ол чүгле бир ай эрткенде аңаа өгленип ап болур турган (Ы. х. к. 21:10—13).

Амгы үеде чоннарның хөй кезии дайын чорударынга хамаарыштыр дүрүмнерни сагыырын аазап, делегей чергелиг керээлерни чарып ап турар. Ол керээлерниң сорулгазы — бөдүүн чонну камгалаары, ол хирезинде ону бо-ла хажыдып турарлар.

5. БУРГАН ЧОНУ ДЭЭШ БОДУ ДАЙЫЛДАЖЫП ТУРГАН

Эрткен үеде Иегова израильчилер тиилеп алзын дээш, хуулгаазыннарны ажыглап турган. Чижээ, Иегова Иерихонну эжелеп алырынга чонунга канчаар дузалаан? Иегованың айытканы ёзугаар, израиль чон дыка ыыткыр алгыржып эгелээрге, хоорайның ханазы буступ кээп дүшкен. Шак ынчаар олар белени-биле хоорайны тиилеп алган (Иис. 6:20). А аморей чонну канчаар тиилеп алганыл? «Дээрги-Чаяакчы дээрден оларже улуг даштар октап эгелээн. […] Израильчилерниң хылыжындан өлген кижилерге бодаарга, даштыг долуга соктуруп өлгеннерниң саны дыка хөй болган» (Иис. 10:6—11).

АЛЫС ШЫН ХРИСТИАННАР — ТАЙБЫҢ НЕПТЕРЕДИКЧИЛЕРИ

Амгы үеде бистиң байдалывыс бурунгу үеде израильчилерниң байдалындан ушчок ылгалып турар деп көрдүвүс. Ынчалза-даа дайыннарга киришпейн турар чылдагаанывыс чүгле ол эвес-тир, оон өске чылдагааннар база бар. Чижээ, сөөлгү хүннерде Бурганның оруктары-биле чоруурунга өөренип турар улус «моон соңгаар дайын чорударынга өөренмес» деп Библияда баш бурунгаар бижип каан (Иса. 2:2—4). Ындыг болганда, олар канчап дайыннарга киржир чүвел? Оон аңгыда, Христос өөреникчилеринге мынча дээн: «Силер бо делегейге хамаарышпас силер» (Ин. 15:19). Ынчангаш олар бо делегейниң чөрүлдээлеринге кымның-даа талазын эжелевейн турар.

Солун чүүл, Иисус өөреникчилерин кичээндирип, хомудалга, килеңге азы көөр хөөн чорукка чедирип болур бодалдардан ойталаңар деп турган (Мф. 5:21, 22). Оон артык, ооң өөреникчилери тайбың нептередикчилери бооп, дайзыннарынга ынак боор ужурлуг турганнар (Мф. 5:9, 44).

Ону херек кырында канчаар ажыглап болур? Бистиң кайывыс-даа дайыннарга киржир хөңнү чок. Ынчалза-даа чыышта акы-угбаларның кайы-бирээзинден бужурганып турар бис бе? Ийе болза, шак ындыг минниишкиннерден доп-дораан адырлып алыр дээш кызаалыңар! (Иак. 4:1, 11).

Чоннар аразында чөрүлдээлерге кайы-бир таланы эжелээриниң орнунга, бис акы-угбаларның аразында амыр-тайбыңны нептередип, ынакшылды илередип турар бис (Ин. 13:34, 35). Иегова шупту дайыннарны кезээ-мөңгеде узуткаваан шаанда, нейтралитетти сагыыр дээш, шупту күжениишкиннерни үндүрээлиңер (Ыд. ыр. 45:10).