Павел элчин Иегованың a дугайында: «Кандыг-даа аар-берге байдалга таварышканывыста, Бурган бисти аргалап чоруур» — деп чугаалаан (2 Коринфичилерге 1:3, 4). Шак ынчаар чуртталгавыска кандыг-даа хай-халап болурга, Бурган бисти аргалап, кижи бүрүзүнге дузалап шыдаар деп, Библия бүзүредип турар.

Бургандан аргалал алыр дизивиссе, бистиң талавыстан база базымнар херек. Бир эвес эмчиге барбас болзувусса, ол биске канчап дузалап шыдаар деп? Библияда: «Ийи кижи, дугуржуп албайн чыткаш, кады чорук кылыр деп бе?» — дээн (Амос 3:3). Ынчангаш Бурганның Сөзү: «Бурганче чоокшулаңар, Ол база силерже чоокшулап кээр» — деп кыйгырып турар (Иаков 4:8).

Бурган биске чоокшулаарын күзеп турар деп, кайыын билир бис? Бирээде, Ол боду биске дузалажыксап турарын чаңгыс удаа эвес бүзүреткен. ( Көзенекти көрүңер.) Ийиде, Бурганның аргалалын бодунга көрген улустуң үлегерлери бар.  Ол дээрге эрткен үеде херек кырында чурттап чораан улус биле амгы үениң кижилери-дир.

Бөгүн Бурганның дузазын дилеп чоруур улус дег, Давид хаан база хөй бергелерни ажып эрткен. Ол бир катап: «Мөргүл кылган үнүм дыңнап көрем» — деп Иеговадан дилээн. Бурган аңаа харыылаан бе? Ийе. «Ол меңээ дузалады-даа — чүрээм ол дээш өөрүп-байырлап тур» — деп, Давид чугаалаан (Ырлар 27:2, 8).

Кижилерни аргалаарынга Бурган Иисуска кол рольду берген. Ынчангаш Иисустуң черже келген чылдагааннарының бирээзи — «сеткил-чүрээ муңгараан улусту экирт[ири]» болгаш «качыгдаан бүгү улусту аргала[ары-дыр]» (Исайя 61:1, 2). Баш бурунгаар чугаалааны дег, Иисус «могап турупкан, аар чүък чүктээн улуска» тускай кичээнгейни салып турган (Матфей 11:28—30).

Иисус улустарны оожуктурарда, аңгы-аңгы аргаларны ажыглап чораан: мерген сүмелерни берип, буянны көргүзүп, а чамдыкта аарыглардан безин экиртип турган. Бир катап кежи аарыг кижи Иисуска чалынган: «Күзээр-ле болзуңарза, Силер мени арыглап каар силер». Иисус ону кээргээш: «Күзеп тур мен, арыгланы бер!» — деп харыылаан (Марк 1:40, 41). Оон кежи аарыг кижи эттине берген.

Иисус ам черде эвес болгаш, бисти хууда аргалап шыдавас-даа болза, ооң Адазы Иегова, «бисти аргалап, деткип чоруур Бурган», дуза хереглээн улуска дузалаарын уламчылап турар (2 Коринфичилерге 1:3). Бурганның бисти канчаар аргалап болурунуң дөрт аргазын көрээлиңер.

• Библияны таварыштыр. «А Бижилгелерде бистиң үевистиң мурнунда бижээн бүгү чүвени биске өөредиг кылдыр бижээн-дир. Бижилгелер дамчып кээр сорук кириишкинниң ачызында бис шыдамык бооп, идегеливис чидирбес ужурлуг бис» (Римчилерге 15:4).

• Бодунуң ыдыктыг сүлдезин таварыштыр. Иисустуң өлүмүнүң соонда христиан чыышка аргалал дыка херек турган. Бодунуң хөделдирикчи күжү, ыдыктыг сүлдезин таварыштыр Бурган христианнарны аргалаан деп Библиядан көскү (Ажыл-чорудулга 9:31). Бурган ыдыктыг сүлдези-биле кижи бүрүзүн кандыг-даа байдалда аргалап шыдаар.

• Мөргүл таварыштыр. Библияда: «Чүү-даа дээш, сагыш човаваңар» — дээн. Ында: «Дилег-човааңарны Бурганга ажыдып берип, мөргүңер... Ынчан улустуң угаап-билиптер шаандан ажа бээр Бурганның амыр-тайбыңы чүректериңер болгаш угаан-сарыылыңарны... кадагалаар» — деп бисти деткип турар (Филипчилерге 4:6, 7).

• Өске христианнарны таварыштыр. Чаңгыс үзел-бодалдыг, чоок өңнүктеривис биске ёзулуг аргалалды берип болур. Павел элчин кады бүзүрээн ха-дуңмазын олар аңаа берге үелерде улуг деткимче биле аргалалды берип турган деп чугаалаан (Колосчуларга 4:11; 1 Фессалоникчилерге 3:7).

«Бо бүгү чүве херек кырында амыдыралга канчаар болдунарыл?» — деп айтырар боор силер. Эгезинде чугаалажып турганывыс бергелерге таварышкан кижилерниң чижектерин көрээлиңер. Бурган бистиң үевисте база «Мен силерни, ие кижиниң чаш төлүн аргалааны дег, аргалаар мен» дээн, сагыш сеткилди чылдып чоруур, аазаашкынын күүседип турарынга ол улус ышкаш шынзыгар силер (Исайя 66:13).