Өске улустарга бодаарга, Иисус черге төрүттүнериниң мурнунда-ла, көзүлбес мага-боттуг дээрге чурттап чораан (Иоанн 8:23). Ол Бурганның бирги чаяалгазы болгаш, арткан бүгү чүүлдү чаяарынга киржип турган. Иисусту чүгле Иегова Боду чааскаан чаяаган. Ынчангаш ону Бурганның «эр чаңгыс Оглу» деп адаан (Иоанн 1:14). Иисус Бурганның Төлээзи болганда, ону «Сөс» деп база адаан. (Номчуптуңар: Чугаалар 8:22, 23, 30; Колосчуларга 1:15, 16.)

 Бурган Оглунуң амы-тынын дээрден ашакка барбаан арыг иудей кыс Марияның иштинче көжүрүпкен. Ол чүүл Иисустуң чер кырында төрээн адазы чок турганын көргүскен (Лука 1:29—34). Иисустуң черге келген чылдагааны: 1) Бурганның дугайында алыс шынны өөредир дээш, 2) берге үелерде безин Бурганның күзел-соруун канчаар күүседириниң чижээн көргүзер дээш, 3) бодунуң тергиин амы-тынын «төлевир кылдыр» бээр дээш. (Номчуптуңар: Матфей 20:28.)

 Төлевир дээрге өлүм айыылынче кирген кижини хостаарының өртээ-дир (Хосталыышкын 21:29, 30). Кижилерниң кырып, өлүрүн Бурган күзевээн. Ону кайыын билир бис? Бир эвес бачыт үүлгедиптер болза, өлүп каарын Бурган бир дугаар кижи Ада́мга баш удур чугаалаан. Ынчаарга, Ада́м бачыт үүлгетпээн болза, ол кажан-даа өлбес ийик (Эге дөс 2:16, 17; 5:5). Библиядан алырга, делегейже бачыт Ада́мны таварыштыр «кирип келген». Ол бодунуң шупту ажы-төлүнге бачыт дамчыткан, а бачыттың шииткели — өлүм. Ада́мдан салгап алган өлүмден хосталып алыр дизивиссе, биске төлевир херек. (Номчуптуңар: Римчилерге 5:12; 6:23.)

  Бисти өлүмден хостаар төлевирни кым берип шыдаарыл? Кижи өлүмү-биле чүгле бодунуң бачыттары дээш төлээр. Чаңгыс-даа тергиин эвес кижи өске улустуң бачыттарын дуглап шыдавас. (Номчуптуңар: Ырлар 48:8—10.)

 Биске бодаарга Иисус тергиин турган. Ынчангаш бодунуң бачыттары дээш өлген херээ чок турган, чүге дизе ол кажан-даа бачыт кылбаан болгай. Иисус өске улустуң бачыттары дээш өлген. Бис дээш амы-тынын бээр кылдыр Бодунуң Оглун черже чорутканы-биле, Бурган кижи төрелгетенинге өндүр улуг ынакшылын көргүскен. Ачазын дыңнап, бистиң бачыттарывысты дуглап, амы-тынын бергени-биле Иисус биске база ынакшылын көргүскен. (Номчуптуңар: Иоанн 3:16; Римчилерге 5:18, 19.)

 «Иисус чүү дээш өлген?» деп видеороликти көрүңер.

 Иисус черге чурттап тургаш, аарыг улусту эмнеп, өлген улусту диргизип база берге байдалда улуска дузалажып турган. Ынчалдыр Иисус келир үеде Бурганга дыңнангыр улуска чүнү кылыптарын көргүскен (Матфей 15:30, 31; Иоанн 5:28). Кажан Иисус өлүп каарга, Бурган ону көзүлбес хуу бот кылдыр диргизипкен (1 Пётр 3:18). Ооң соонда Иисус Бурганның оң талазынга олуруп алгаш, аңаа бүгү черни башкарар хаан эргени бээрин манап эгелээн (Еврейлерге 10:12, 13). Амгы үеде Иисус дээрде хааннап олурар, а ооң эдерикчилери бүгү черде буянныг медээни тарадып турар. (Номчуптуңар: Даниил 7:13, 14; Матфей 24:14.)

 Удавас Иисус хаан эргезин ажыглааш, хилинчек-човалаңны соксадып, черни каржы улустан арыглаар. Иисуска бүзүрээр болгаш аңаа дыңнангыр шупту улус черге дываажаңга чурттаар. (Номчуптуңар: Ырлар 36:9—11.)