Сиз Муқәддәс китапни убданирақ чүшиниш үчүн қандақту бир мавзуни тәтқиқ қилишни халиғанму? Мүмкин сизни Муқәддәс китапниң нәқ бир айити қизиқтуридиғанду? Яки болмиса сиз Муқәддәс китаптики қандақту бир адәм, шәһәр яки нәрсә һәққидә көпирәк мәлумат алғуңиз келидиғанду? Бәлким, сиз шәхсий қийинчилиғиңизни һәл қилиш үчүн Муқәддәс китаптин мәслиһәт тапқуңиз келидиғанду? У чағда Ибадәт өйиниң китапханисиға кириң.

У йәрдә тәтқиқ қилишқа ярдәм беридиған көплигән қураллар бар. Еһтимал, сиздә Йәһва гувачилириниң Муқәддәс китапқа асасланған әдәбиятлириниң һәммиси йоқтур. Амма улар Ибадәт өйиниң китапханисида болуши мүмкин, чүнки у дайим толуқлинип туриду. У йәрдә әдәбиятлиримиздин башқа Муқәддәс китапниң түрлүк тәрҗимилири, луғәтләр вә башқа пайдилиқ мәлумат беридиған әдәбиятлар бар. Учришиштин бурун яки кейин сиз шу китапханидин бемалал пайдилиналайсиз. Әгәр шу йәрдә компьютер болса, у чағда униңға Күзитиш мунариниң электронлуқ китапханиси (Watchtower Library) орнитилған болуши мүмкин. Ушбу программа өз ичигә әдәбиятлиримизниң көпинчисини алиду вә сиз издәш функцияси арқилиқ керәклик бир мавзу, сөз яки айәтни асан тапалайсиз.

«Һаятимиз вә хизмитимиз» учришишида оқуғучиларға арналған тапшуруқларни тәйярлаватқанлар үчүн пайдилиқ. Тапшуруққа тәйярлиқ қилғанда, Ибадәт өйидики китапханидин қоллиналайсиз. Униң үчүн «Һаятимиз вә хизмитимиз» учришишиниң назарәтчиси җавапкәр. У китапханида йеңи әдәбиятларниң болушини вә уларниң рәтлинип турушини назарәт қилиду. Бу бурадәр яки сиз билән Муқәддәс китапни тәтқиқ қиливатқан киши сизгә керәк болған мәлуматни қандақ тепишқа болидиғанлиғини көрситип бериду. Шундақла китапханидики әдәбиятларни Ибадәт өйидин елип чиқишқа яки уларға йезип, сизишқа болмайдиғанлиғини әстә тутқан дурус. Әдәбиятларни аяп пайдилиниш керәк.

Муқәддәс китапта ейтилғандәк, Худа һәққидә билим елиш үчүн, уни «йошурун гөһәрни издигәндәк» издәш керәк (Пәнд-нәсиһәтләр 2:1—5). Ибадәт өйидики китапхана сизгә шундақ тәтқиқ қилишқа ярдәм берәләйду.

• Ибадәт өйиниң китапханисида тәтқиқ қилишқа ярдәм беридиған қандақ қураллар бар?

• Китапханидин қандақ пайдилиниш керәклигини сизгә ким көрситип берәләйду?