OCIPAMA 40
Tu Liyelisa Ndati Kovaso a Suku?
Sokolola ina umue ukuacisola o pongiya omõlaye oco a ende kosikola. Eye o kũlĩhĩsa nda omõla wa sukuiwa, nda ovowalo aye a sokiyiwa ciwa kuenda a yela. Poku ci linga, cecelela okuti o kuata uhayele kuenda o lekisa komanu vakuavo okuti, olonjali viaye vi kasi oku u tata ciwa. Cimuamue haico ci pita la Isietu ukuacisola Yehova una o yongola okuti, tu liyelisa ketimba kuenda kovituwa. Nda tu liyelisa, tu likuatisa etu muẽle kuenda tu eca esivayo kokuaye.
1. Tu liyelisa ndati ketimba?
Yehova o tu sapuila hati: “Vu sukila oku kola.” (1 Petulu 1:16) Oku kola, ku kuete elitokeko loku liyelisa ketimba kuenda kovituwa. Tu liyelisa ketimba poku lisukula oloneke viosi, oku sukula ovowalo etu, oku yelisa onjo yetu, ocendelo cetu kuenda oku vi ongotiya ciwa. Tu sukilavo oku kuatisa koku yelisa Onjango yetu Yusoma. Poku amamako oku liyelisa ketimba, tu ka nenela esivayo konduko ya Yehova.—2 Va Korindo 6:3, 4.
2. Oco tu liyelise, ovituwa vipi tu sukila oku yuvula?
Embimbiliya li lungula okuti “tu liyelisi kevĩho liosi lio ketimba kuenda vutima.” (2 Va Korindo 7:1) Eci ci lomboloka okuti, tu sukila oku yuvula ovina viosi vi kapa etimba ale ovisimĩlo vietu kohele. Ovisimĩlo vietu vi sukila oku sanjuisa Yehova, kuenje tu likolisilako oku yuvula ovisimĩlo ka via sungulukile. (Olosamo 104:34) Tu sukilavo oku likolisilako oku kuata upopi wa yela.—Tanga Va Kolosai 3:8.
Nye vali ci tu vĩhisa ketimba kuenda kovituwa? Kuli ovina vimue vi nyõla etimba lietu. Tu yuvula ovina ndeci, akaya, oku takĩla o noz-de-bétele ale amẽla a tukuiwa okuti koka kuenda olodroga vikuavo. Poku yuvula ovina viaco, tu kuata uhayele kuenda tu lekisa okuti, tua sumbila ombanjaile yomuenyo. Tu likolisilakovo oku liyelisa kovituwa ndeci oku yuvula oku litukusa kovimatamata viuyali kuenda koku tala omanu va kasi epolõla haivo va linga ukahonga. (Olosamo 119:37; Va Efeso 5:5) Ka ca lelukile oku yula ovituwa viaco, pole, Yehova o tu kuatisa oku vi yuvula.—Tanga Isaya 41:13.
LILONGISA ONDONGOSI
Kũlĩhĩsa ndomo oku liyelisa ketimba ku eca esivayo ku Yehova kuenda tala ndomo tu yula ovituwa via vĩha.
3. Oku liyelisa ketimba ku eca esivayo ku Yehova
Tu limbuka ndomo Yehova a tenda oku liyelisa poku konomuisa ovihandeleko a ecele ku va Isareli vo kosimbu. Tanga Etundilo 19:10 kuenda 30:17-19, noke konomuisa apulilo a kuãimo:
-
Ovinimbu evi, vi situlula nye catiamẽla konjila ndomo Yehova a tenda oku liyelisa ketimba?
-
Ovituwa vipi viwa vi ka ku kuatisa oku amamako oku liyelisa ketimba?
Oku liyelisa ketimba ku sukila alikolisilo kuenda otembo. Pole, tu pondola oku ci linga kuosi tu sangiwa, ci kaile okuti tulohuasi ale tulohukũi. Tala OVIDEO, noke konomuisa epulilo li kuãimo.
-
Poku yelisa loku ongotiya ciwa ovina vietu, ceca ndati esivayo kupange wetu woku kunda?
4. Siapo ovituwa vĩvi
Jehovah can help us to conquer any bad habit
Nda wa siata oku sipa ale oku nyua olodroga, wa kũlĩha ndomo ca tĩla oku siapo ocituwa caco. Nye ci ku kuatisa? Kũlĩhĩsa ndomo ocituwa caco ci ku nyõla. Tanga Mateo 22:37-39, kuenje kũlĩhĩsi: Akaya ale olodroga vi nyõla ndati . . .
-
ukamba womunu la Yehova?
-
epata liomunu waco kuenda omanu vakuavo?
Linga esokiyo limue oco o siepo ocituwa cĩvi. a Tala OVIDEO.
Tanga Va Filipoi 4:13, noke konomuisa epulilo li kuãimo:
-
Oku likutilila oloneke viosi, oku lilongisa Embimbiliya loku endaenda kolohongele viekongelo, ceca ndati ongusu komunu oco a siepo ocituwa cĩvi?
5. Yula ovisimĩlo kuenda ovilinga via vĩha
Tanga Va Kolosai 3:5, noke konomuisa apulilo a kuãimo:
-
Tu kũlĩha ndati okuti oku tala omanu va kasi epolõla haivo va linga ukahonga, oku tumisa asapulo ale alitalatu wumbondo kuenda oku litukusa kovimatamata viuyali, ovina viaco via vĩha kovaso a Yehova?
-
Kocisimĩlo cove, ca sunguluka hẽ Yehova oku lavoka okuti tu liyelisa kovituwa? Momo lie?
Kũlĩhĩsa ndomo o yula ovisimĩlo via vĩha. Tala OVIDEO.
Yesu wa tukula ocindekaise cimue oco a lekise eci tu sukila oku linga oco tuamameko oku liyelisa kovituwa. Tanga Mateo 5:29, 30, noke konomuisa epulilo li kuãimo:
-
Ndaño Yesu ka popele okuti tu sukila oku liupa muẽle ocimatamata cimue vetimba, eye wa lekisa okuti, te tu linga ocina cimue. Ocina cipi omunu a sukila oku linga oco a yuvule ovisimĩlo via vĩha? b
Nda o kasi oku likolisilako oco o yule ovisimĩlo via vĩha, Yehova wa kapako alikolisilo ove. Tanga Olosamo 103:13, 14, noke konomuisa epulilo li kuãimo:
-
Nda o kasi oku liyaka locituwa cimue ca vĩha, ocisonehua eci ci ku vetiya ndati oku amamako oku likolisilako?
Ku ka liwekepo!
Ci leluka oku sima ndoco, ‘omo okuti nda lueya, ndi liwekapo.’ Pole, sokolola kocindekaise eci: Nda umue ukuakuyoloka o lilondoka kuenje o kupuka, ka ci lomboloka okuti eye wa pumba omapalo yoku yoloka citava okuti, o fetika oku yoloka vali. Cimuamue haico, nda wa wila vali vocituwa cĩvi o kasi oku liyaka laco, ka ci lomboloka okuti wa pumba uyaki waco. Pole, sokolola kalikolisilo wa linga ale. Oku lueya vali cimue tu kasi oku liyaka laco, ci panga onepa koku siapo ocituwa caco. Ku ka liwekepo! Lekuatiso lia Yehova, o pondola oku yula ocituwa cĩvi.
OMANU VAMUE VA POPIA VATI: “Ca ndika ale. Si tẽla oku liwekapo.”
-
Ocisonehua cipi nda wa lekisa komunu una okuti, lekuatiso lia Yehova o pondola oku siapo ocituwa cĩvi?
NYE WA LILONGISA?
Tu sanjuisa Yehova poku amamako oku yelisa etimba, ovisimĩlo kuenda ovituwa vietu.
Oku Pitulula
-
Momo lie ci kuetele esilivilo oku liyelisa?
-
O liyelisa ndati ketimba?
-
O pondola oku amamako ndati oku kuata ovisimĩlo kuenda ovituwa via yela?
OCO O KŨLĨHE OVINA VIKUAVO
Ovina vipi via leluka o pondola oku linga oco etimba liove li yele ndaño okuti wuhukũi?
Limbuka ananga a pondola oku ku kuatisa oku liwekapo oku sipa.
“Ndomo o Liwekapo Oku Sipa” (Omasuli!, ya Kupemba 2010)
Kũlĩhĩsa onima yi tunda koku tala omanu va kasi epolõla haivo va linga ukahonga.
“Ovina Viumbondo—Via Sunguluka Ale vi Panga Lãvi?” (Utala Wondavululi 1 Wenyenye 2013)
Kũlĩha ndomo ulume umue a liwekapo oku tala omanu va kasi epolõla haivo va linga ukahonga.
“Noke Lioku Likolisilako Calua, Kaliye Nda ci Yula” (Utala Wondavululi No. 4 2016)
a Ocipama losapi, “Ndomo o Liwekapo Oku Sipa,” ponepa Oco o Kũlĩhe Ovina Vikuavo, ci lombolola ananga o sukila oku eca, oco o siepo ovituwa viaco vĩvi.
b Oco o kuatisiwe oku yula ocituwa coku litukusa kovimatamata viuyali, tanga ocipama “Ndi Yula Ndati Ocituwa Coku Litukusa Kovimatamata Viuyali?” velivulu Amalẽhe va Pula—Atambululo a Kuatisa, Elivulu 1, ocipama 25.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
