YOOSOMA 17
Omutthu wa Yesu warino mukhalelo wa moota heeni?
Vaavo ninxutteraahu itthu Yesu aahimmaawe ni aapankaawe emaara aaraawe elapo ya vathi, ninnoonelela mikhalelo sawe. Eyo ennanaattameliha wa yoowo ni wa a Tiithaawe Yehova. Mikhalelo heeni seiya? Ni moota heeni nneeraahu nimutakihe Yesu mweekumini mwahu?
1. Moota heeni Yesu onlikanaawe naatithawe Yehova?
Ahinaakuveene owa elapo ya vathi owo Yesu aakhala wiirimu ni aTiithawe mwa iyaakha sintxipale ni aaxuttera itthu sintxi ni a Tiithawe. Mwa yeeyo, owo oolatta mikhalelo sa Yehova ntoko wuupuwela ni woonela itthu. (Mmusome Yohani 5:19.) Mweekhaikhai, Yesu onnitakiha mikhalelo sa aTithawe nave khonthe enraawe: “Ole okònne miyo, òwòna Atithi.” (Yohani 14:9) Vaavo munilipiheraanyu oxuttera mikhalelo sa Yesu, ori ntoko oxuttera mikhalelo sa Yehova. Mwa ntakihero, woona moota Yesu aapwatthaawe atthu eyo enoonihera weera Yehova onnatepa onipwattha.
2. Yesu oonihenre hayi weera annamusivela Yehova?
Yesu enre: “Mene wera elapo esuwele wi kinnàtthuna Atithi ni tho wi, ntoko Atithi akilamunlaya, siso kinnapanka.” (Yohani 14:31) Emaara Yesu aaraawe elapo ya vathi, aahoonihera weera annaasivela Atithawe. Vaavo aawiiwelelaawe mwa sootheene, nnaamweera opaka eyo waareene woovila. Opwaha mwa yeeyo, Yesu wannaamusivela vantxipale wuuluma sa Atithawe ni waakhavihera atthu akina okhala nthamwene a Muluku.—Yohani 14:23.
3. Yesu oonihenre hayi weera annaasivela atthu?
Biblya oneera weera Yesu ‘annahakalala ni anamwane a mutthu.’ (Miruku 8:31, enoota) Yesu annaareerela murima atthu ootheene; owo khaathanla atthu. Opwaha mwa yeeyo, owo masu awe yaari oolipiha ni aari oowaakhavihera atthu. Miiriira owo aapakaawe khasoonihera paahi weera owo aakhalano owera, mene soonihera weera owo annaamorela ikharari atthu. (Marko 1:40-42) Masu awe yannaalipiha atthu ni waavaha yooweherera ootheene yaale yaatthuna omwiiwa. Yesu aari oolikaneene weera ahaawe ni aakhwele atthu mwaha wooweera onnaasivela. Mene owo annaasivela yaale paahi yiiwelela iye sooxuttiha sawe.—Mmusome Yohani 15:13, 14.
WEERA MUXUTTERE SINTXIPALE
Musuwele mikhalelo sintxipale sa Yesu. Moone tho moota woowoonihera nsivelo ni ovaha ntoko yoowo.
4. Yesu onnaasivela Atithawe
Ntakihero na Yesu nnoonihera weera moota nneeraahu nimusiveleke Muluku. Mmusome Luka 6:12 ni Yohani 15:10; 17:26. Mwasoma soolepa iya, avinyaka mutthekule ni epontu enttharelana:
-
Ninkela omutakiha hayi Yesu ni woonihera weera ninnamusivela Yehova?
Yesu annaasivela Atithawe a wiirimu ni annuulumano veeli-veeli munivekeloni
5. Yesu annaapwattha atthu yaatthuna okhaviheriwa
Yesu annaapwattha atthu wiipwaha mwaneene awe. Owo annayeeha ehuhu awe ni ikuru sawe weera aakhavihere atthu naamwi emaara ekina akhulumunweene. Mmusome Marko 6:30-44, ni avinyaka mutthekule ni ipontu sinttharelana:
-
Moota heeni Yesu oonihenraawe weera annapwattha atthu?—Nwehe iversu 31, 34, 41 ni 42.
-
Mwaha wa heeni Yesu waamusivelaaya waakhavihera atthu?—Nwehe eversu 34.
-
Nohoona weera Yesu onnatakiha mikhalelo sa Atithawe. Eyo ennixuttiha eheeni voohima sa Yehova?
-
Moota heeni nneeraahu ntakihe waapwattha wawe Yesu atthu?
6. Yesu toovaha
Nnaamweera Yesu ahaakhalanneene itthu sintxipale, owo annaavaha itthu aakhalannaawe atthu akina. Owo onnaxuttiha weera nipakeke emoha-moharu. Musome Miteko 20:35, avinyaka mutthekule ni epontu enttharelana:
-
Moovarihana ni masu a Yesu, eheeni eneera eniphwanyihe ohakalala?
Moone EVIIDIYU, avinyaka mutthekule ni epontu enttharelana:
-
Naamwi nihikhanleno itthu sintxipale, hiyo ninkela waavaha hayi akina?
Nyuwo mwaasuwela?
Biblya onnaxuttiha weera ninvekeleke Yehova mwa nsina na Yesu kristu. (Mmusome Yohani 16:23, 24.) Napaka haawo, nnoonihera weera ninnihela mwiitti ele Yesu opankaawe wa hiyo weera nikhale nthamwene a Yehova.
ATTHU AKINA ANEERA: “Muluku khampwatthela mahooxo aatthu.”
-
Nooxuttera weera Yesu annitakiha mikhalelo sa Atithawe. Vano, mwaha wa heeni itthu Yesu opankaawe onooniheraawe weera onnanipwattha?
NYAHA SOOTTHUNEYA
Yesu onnamusivela Yehova ni atthu, nave mwaha wooweera owo olantte mikhalelo sa Atithawe. Tivaavonto, vaavo nyuwo muniilipihera anyu omusuwela nnene Yesu, onlikana ni omusuwela nnene Yehova.
Wuuluula
-
Ninkela omusivela hayi Yehova nimutakihaka Yesu?
-
Ninkela waasivela hayi atthu akina nimutakihaka Yesu?
-
Mikhalelo heeni sa Yesu soosivenlenixa?
WEERA MUSUWELE ITTHU SINTXIPALE
Moone mikhalelo mikina sa Yesu nintthuneyaahu otakiha.
“Weera mmutakihe Yesu moone eliivuru . . .” (Yesu—ti Ephiro, Ekeekhai ni Ekumi, epaaxina 317)
Muxutture mwaha wa heeni ontthuneyaawe weera nivekeleke munsina na Yesu.
“Mwaha wa heeni nintthuneyaahu ovekela mwa nsina na Yesu?” (A Sentinela, 1.º a Fevereiro a 2008)
Neereke Biblya onnathaliha moota yaaraaya ekhove ya Yesu?
Yaari moota heeni ekhove ya Yesu?
“Nttittimiho ni ekhitto voohima sa okosoopa wa Muluku” (A Sentinela, 1.º a Setembro a 2012)
