YOOSOMA 24

Malaika taani ni ampaka heeni?

PLAY

Yehova ontthuna weera hiyo nisuwele voohima sa emusi awe ya wiirimu. Emusi eyo, enhela mpuwa malaika yaawo eneeriwa ‘anamwene a Muluku’. (Yobi 38:7) Eheeni Biblya onhimaawe voohima sa malaika? Neereke awo annaakhavihera atthu? Neereke malaika ootheene ampakela empari emusi ya Muluku?

1. Malaika taani?

Yehova aapanke Malaika ahinaakuve opaka elapo ya vathi. Moolikana ni Yehova, malaika khaanooneya ni ankhala wiirimu. (Aheberi 1:14) Sookhala miloko sintxipale sa malaika. Nenne nri nlaika nokhalano muteko aya. (Apokalise 5:11) Awo ‘ampaka yootthuna ya Yehova, yiiwelelaka masu awe’. (Nsalmu 103:20) Khalayi Yehova annavarela muteko malaika weera elaleye mitthenka sawe, ni waakhavihera atthu awe vaavo yaakhalaaya veerisani. Emoha-moharu olelo va, malaika annaakhavihera makristu eekhaikhai yaale enlaleya mitthenka sooreera, weera yaaphwanye atthu antthuna ooxuttera voohima sa Muluku.

2. Satana ni mademooniyu awe taani?

Malaika makina khayaavirelenle okhala oororomeleya wa Yehova. Nlaika noopatxera namurukunuwela Muluku Yehova ‘Oneeriwa Diabo ni Satana namootha a elapo yothene’. (Apokalise 12:9) Satana aatthuna olamula nipuro na Muluku. Tiyeeyo yaamweerinhe omoototha Adamu ni Heva, mpaka otakansera malaika makina ompitukuwela Muluku. Malaika awo ompitukuwela Muluku eneeriwa mademoniyu. Yehova oowoomola mademoniyu awo wiirimu ni vano olelo va, awo ari elapo ya vathi. Nto awo anootoloxiwa.—Mmusome Apokalise 12:9, 12.

3. Satana ni mademoniyu aneerera hayi oniwoka?

Satana ni mademoniyu annaawoka atthu, evarihelaka muteko ihako. Mukhalelo owo ori ntoko weerera wuuluma ni alipa ookhwa. Eyo ti yoonanara. Mwa ntakihero, ennaakoha anamiruku, anamunepani, weerera othaliha itthu sa muhoolo ni wakoha anahako. Atthu akina annawaasa mameediku yaawo anvarihana ni onammunepani. Satana tho, onnaaroromeliha atthu weera anoowera wuuluma nalipa ookhwa. Mene Yehova oneera: “Muhikohe minepa sikhwiye nari anahako.” (Onamakeya 19:31) Owo onnanivaha miruku iyo weera nihiwokiwe ni Satana ni mademoniyu awe. Awo amwittani a Muluku ni annahakalala yanoonaka nihaawaka.

WEERA MUXUTTERE SINTXIPALE

Muxuttere itthu sooreera malaika ampakaaya. Opaka onammunepani tiwoowoopiha. Vano etthu heeni nneeraahu nipake weera niisepe miraakho sa Satana ni mademoniyu awe?

4. Malaika annaakhavihera atthu ooxuttera voohima sa Yehova

Malaika khanooneya yaalaleeraka atthu. Opwaha mwa yeeyo, awo annakhavihera arumeyi a Muluku waaphwanya atthu antthuna ooxuttera mitthenka sooreera voohima sa Yehova. Mmusome Apokalise 14:6, 7, avinyaka mutthekule ni ipontu sinttharelana:

Mwaha wa heeni nintthunaahu okhaviheriwa ni malaika naalaleeraka?
Khamunoona weera tiwooreera osuwela weera malaika animookhaviherani waaphwanya atthu antthuna oomuxuttera Biblya? Mwaha wa heeni munoonelaanyu hiiho?

5. Muhipakeke itthu sinvarihana ni onammunepani

Satana ni mademoniyu amwittani a Yehova. Awo-tho, amwittani ahu. Mmusome Luka 9:38-42, avinyaka mutthekule ni epontu enttharelana:

Mademoniyu enaapakela eheeni atthu?

Khanintthuna weera mademoniyu enanarihe ekumi ahu yoomunepani. Mmusome Olaleya 18:10-12, avinyaka mutthekule ni ipontu sinttharelana:

Mukhalelo moota heeni mademoniyu aneereraaya oniwoka weera yuulume ni hiyo? Itthu heeni sinvarihana ni onamunepani sikhanle muttetthe munkhalaanyu?
Neereke Yehova okhalano erazawu vaavo onnakhoottihaawe onammunepani? Mwaha wa heeni?

Moone EVIIDIYU, avinyaka mutthekule ni ipontu sinttharelana.

EVIIDIYU: “Mmutthawe Satana” (5:02)

Nviidiyuni, hiyo nihoona weera apitti Paulo anwariha mwanawe ekhulula mmoononi. Khamunoona weera etthu ele yaari yoowoopiha? Mwaha wa heeni?
Ti heeni apitti Paulo aatthuneyaawe opaka weera atthawe onammunepani?

Makristu eekhaikhai, ovinya khalayi, awo anniittana onammunepani. Musome Miteko 19:19 ni 1 Akorinto 10:21, avinyaka mutthekule ni epontu enttharelana:

Mwaha wa heeni oraaya wootthuneya onyaanya etthu eri poothe envarihana ni onnamunepani?

6. Nwere owina ekhotto ya Satana ni mademoniyu awe

Mademoniyu enlamuleliwa ni Satana. Mene malaika oororomeleya, anlamuleliwa ni nlaika ntokweene, Mikayeli nsina nikina na Yesu. Owera heeni Mikayeli okhalannaawe? Mmusome Apokalise 12:7-9, avinyaka mutthekule ni ipontu sinttharelana:

Taani orinono oweraxa: Mikayeli ni malaikaawe naari Satana ni mademoniyu awe?
Neereke weera, atthareli a Yesu annatthuneya omoova Satana ni mademoniyu awe?

Nyuwo munoowina owana ekhotto ya Satana ni mademoniyu awe. Mmusome Yakobe 4:7, avinyaka mutthekule ni epontu enttharelana:

Nyuwo munkela wiisaakiha hayi ni ekhotto ya Satana ni mademoniyu awe?

ATTHU AKINA ANEERA: “Khoiyono etthu yoonanara oweetta axooku ntoko videogame naari woona ifilme sinvarihana ni onammunepani. Anoona weera otthekula paahi.”