Akkay, Xoossaa Kawotettay Kiristtaanetu wozanan deˈiyaaba gidenna. a Geeshsha Maxaafay ‘saluwaa kawotettaa’ giidi yootiyoogan, he kawotettay deˈiyo sohuwaa qonccissees. (Maatiyoosa 4:17) He Kawotettay saluwan haariya tumuppe deˈiya ayso gidiyoogaa Geeshsha Maxaafay waati qonccissiyaakko akeeka.

•   Xoossaa Kawotettan haariyaageeti, haarettiyaageetinne higgeti deˈoosona, qassi Xoossaa shenee saluwaaninne saˈan hananaadan oottiyo maataykka deˈees.—Maatiyoosa 6:10; Ajjuutaa 5:10.

•   Xoossaa Kawottettay saˈan deˈiya ‘asa ubbaa, kawotettata ubbaanne dumma dumma qaalan haasayiya zareta ubbaa’ haarana. (Daaneela 7:13, 14) He Kawotettan haariyaageetuyyo maataa immidaagee Xoossaa.—Mazamure 2:4-6; Isiyaasa 9:7.

•   Yesuusi, bana kaalliya ammanettidaageeti banaara issippe ‘araatatun uttanaagaa’ yootiis.—Luqaasa 22:28, 30.

•   Xoossaa Kawotettawu morkketi deˈoosona; he Kawotettay eta ubbaa xayssana.—Mazamure 2:1, 2, 8, 9; 110:1, 2; 1 Qoronttoosa 15:25, 26.

 Xoossaa Kawotettay, asay Xoossawu azazettiyo wode eta wozanan deˈiyaaba giidi issooti issooti qoppikkonne, Geeshsha Maxaafay hegaadan tamaarissenna. SHin, Geeshsha Maxaafay ‘Kawotettaa qaalay’ woy ‘kawotettaa wonggeliyaa mishiraachchoy’ nu wozanaa denttettana danddayiyoogaanne yaatana koshshiyoogaa yootees.—Maatiyoosa 13:19; 24:14.

“Xoossaa kawotettai intte giddon de7ees” giyoogee woygiyoogee?

 Amarida asay Luqaasa 17:21n Kawotettaabaa issi issi Geeshsha Maxaafaa birshshettati yootiyoogaa nabbabiyo wode akeekanawu metootoosona. Leemisuwawu, King Jemis Verzhin “Xoossaa kawotettay intte giddon deˈees” yaagees. Nuuni ha xiqisiyaa suure akeekanawu yuushuwan deˈiya qofaa eranawu bessees.

 Yesuusi bana ixxiyaanne guyyeppe A worida haymaanootiyaa kaalettiya Parisaawetuyyo hegaa yootiis. (Maatiyoosa 12:14; Luqaasa 17:20) Kawotettay muumida eta wozanan deˈees giidi qoppiyoogee maaree? Yesuusi eta, “Intteyyo garssa baggaara lo77o milatiya iitatettainne makkalai kumi utiiis” yaagiis.—Maatiyoosa 23:27, 28.

 Yesuusi yootido Luqaasa 17:21n deˈiya qofaa hara birshshettati suure qonccissoosona: “Xoossaa Kawotettay hagan inttenaara deˈees.” (Geddi oottidi xaafiday nuna; Kontemperari Inglish Verzhin) “Xoossaa Kawotettay inttenaara issippe deˈees.” (Ooratta Alamiyaa Birshshettaa, tohossa qofaa) Xoossay sunttido Kawoy Yesuusi eta sinttan eqqido gishshawu, saluwaa Kawotettay ‘Parisaawetuura’ woy ‘etaara issippe’ deˈees.—Luqaasa 1:32, 33.