Xoossaa Qaalaappe Tamaara

Kiristtaaneti Xammaqettiyoy Aybissee?

Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.

1. Kiristtaanetu xinqqatee qonccissiyoobay aybee?

Xinqqatee Xoossaara loˈˈo dabbotaa medhanau a oychiyoogaa. Yaatiyo gishshau, issi Kiristtaanee xammaqettana koshshiyoy naatettaana gidennan, Xoossaabaa tamaaridi, Yesuusi erissiyo ashkkara gidana danddayiyo wode. (Oos. 8:12; 1 PHe. 3:21) Nuuni Yesuusabaa tamaaridi i azaziyoobaa oosuwan peeshshiyo wode i erissiyo ashkkara gidoos.—Maatiyoosa 28:19, 20 nabbaba.

Yesuusi kiittidoogeetu wode, daroti Xoossaabaanne Yesuusabaa tamaaridi takkennan oosuwan peeshshidosona. Leemisuwau, issi bitanee Yesuusa hayqoy atotettaa ogiyaa dooyidoogaa erido wode, sohuwaara erissiyo ashkkara gidiis. Ha wodiyan, suure wozanay deˈiyo daroti Yesuusa kaallanau dooridosona.—Oosuwaa 8:26-31, 35-38 nabbaba.

2. Yesuusi xammaqettidoy aybissee?

Xammaqiya Yohaannisi Yesuusa Yorddaanoosa SHaafan xammaqido wode, Yesuusau layttay 30 heera. Yesuusa xinqqatee, i oottanaadan Xoossay koyiyoobaa polanau i kuuyidoogaa bessiyaaba. (Ibr. 10:7) Hegee asaa naatu nagaraa gishshau i ba shemppuwaa yarshshiyoogaa gujjees. Yesuusi ha saˈan deˈanau saluwaappe yaanaappe kasekka, ba Aawaa, Yihoowa ubbatoo siiqees, qassi ayyo azazettees.—Marqqoosa 1:9-11; Yohaannisa 8:29; 17:5 nabbaba.

  3. Issi Kiristtaanee xammaqettana koshshiyoy aybissee?

Nu hanotay Yesuusaagaappe dummatees, giishin nuuni nagarancha gididi yelettida. Gidikkokka, Yesuusi yarshsho gididi hayqqidoogee nuuni Xoossaara loˈˈo dabbotaa medhanaadan oottiis. (Roo. 5:10, 12; 12:1, 2) Nuuni tumuppe Xoossaa keetta asa gididi abaa gidana danddayoos. (2 Qor. 6:18) Nuuni he maataa demmana danddayiyoy ayba ogiyaanee? Nu deˈo layttan Yihoowayyo oottanau qaalaa geliyoogan, buzo woosan nu huuphiyaa ayyo geppoos. Hegaadan geppi simmidi, asaa sinttan xammaqettiyoogan nu huuphiyaa geppidoogaa bessoos.—Maatiyoosa 16:24; 1 PHeexiroosa 4:2 nabbaba.

4. Neeni xammaqettanau giigettana danddayiyo ogiyaa

Yihoowa Markkati Xoossaakko shiiqana koyiya oonanne Geeshsha Maxaafaa xannaˈissoosona. Geeshsha Maxaafaa xannaˈiyoogeenne Kiristtaanetuura shiiqiyoogee neeni Xoossaa keehippe siiqanaadaaninne a mintta ammanaadan oottees. Qassi neeyyo loˈˈo xeelaynne eeshshay deˈanaadankka maaddees. Siiqoy, ammanoynne Xoossaa ufayssiya hara eeshshati neeyyo deˈiyoogee merinau Yihoowayyo oottanau gelido qaalaa naagada deˈanau maaddees.—Yohaannisa 17:3; Ibraawe 10:24, 25 nabbaba.

Gujo qofaa demmanau, Yihoowa Markkati attamissido, ha maxaafaa shemppo 18 xeella. Tumuppe Geeshsha Maxaafay Tamaarissiyoy Aybee?