•  An baton han Biblia

•  Paonan-o magkakaanak an usa nga birhen?

•  Ano an katuyoan han panganak han usa nga birhen?

•  Nagpabilin ba nga birhen hi Maria?

•  An katawo ba ni Jesus ha usa nga birhen amo an “Imaculada Concepcion”?

•  Ano an aton dapat magin panhunahuna kan Maria?

 An Biblia nasiring nga hi Maria, nga nanay ni Jesus, may espesyal nga pribilehiyo nga manganak kan Jesus samtang birhen pa hiya. Igintagna han Biblia ini nga milagro ha libro han Isaias ngan iginrekord an katumanan ha mga Ebanghelyo nira Mateo ngan Lucas.

 Ha usa nga tagna parte ha katawo han Mesias, hi Isaias nagtagna: “Kitaa! An batan-on nga babaye magbuburod ngan mag-aanak hin lalaki.” (Isaias 7:14) Pinaagi ha paggiya han Dios, iginkonektar han parasurat han Ebanghelyo nga hi Mateo an tagna ni Isaias ha pagburod ni Maria kan Jesus. Katapos isumat ni Mateo nga milagroso nga nagburod hi Maria, hiya nagdugang: “Ha pagkamatuod, ini ngatanan nahitabo basi matuman an ginyakan ni Jehova pinaagi han iya propeta, nga nasiring: ‘Kitaa! An birhen a magbuburod ngan mag-aanak hin lalaki, ngan ngangaranan nira hiya hin Immanuel,’ nga nangangahulogan, kon ihuhubad, ‘Kaupod Naton an Dios.’”—Mateo 1:22, 23.

 Iginrekord liwat han parasurat han Ebanghelyo nga hi Lucas an milagroso nga pagburod ni Maria. Nagsurat hiya nga ginsugo han Dios an anghel nga hi Gabriel “ngadto ha usa nga birhen nga karaslon na ha usa nga lalaki nga an ngaran hi Jose nga tikang ha panimalay ni David, ngan an ngaran han birhen amo hi Maria.” (Lucas 1:26, 27) Hi Maria mismo nagsiring nga birhen hiya. Katapos mabatian nga magigin nanay hiya ni Jesus, an Mesias, nagpakiana hiya: “Paonan-o ini mahitatabo nga waray pa man ako makighilawas hin lalaki?”—Lucas 1:34.

 Nagburod hi Maria tungod han baraan nga espiritu, an aktibo nga pwersa han Dios. (Mateo 1:18) Ginsidngan hi Maria: “An baraan nga espiritu makada ha imo, ngan an gahum han Gihitaasi maglalambong ha imo. Ngan tungod hito, an bata nga matatawo tatawagon nga baraan, Anak han Dios.” b (Lucas 1:35) Milagroso nga ginbalhin han Dios an kinabuhi han iya Anak ha tagoangkan ni Maria ngan tungod hito nagburod hiya.

 Ginpahinabo han Dios nga igburod hi Jesus han usa nga birhen basi magkaada hiya perpekto nga lawas ngan para matalwas an katawohan tikang ha sala ngan kamatayon. (Juan 3:16; Hebreo 10:5) Ginbalhin han Dios an kinabuhi ni Jesus ha tagoangkan ni Maria. Katapos, ginpanalipdan han baraan nga espiritu han Dios an napuporma nga bata basi diri ito makapanunod han bisan ano nga pagkadiri-perpekto.—Lucas 1:35.

 Sugad nga resulta, natawo hi Jesus sugad nga perpekto nga tawo pariho kan Adan antes hiya makasala. An Biblia nasiring parte kan Jesus: “Waray hiya nabuhat nga sala.” (1 Pedro 2:22) Sugad nga perpekto nga tawo, maihahatag ni Jesus an lukat basi matalwas an katawohan tikang ha sala ngan kamatayon.—1 Corinto 15:21, 22; 1 Timoteo 2:5, 6.

 Waray itutdo ha Biblia nga nagpabilin nga birhen hi Maria ha bug-os niya nga kinabuhi. Lugod ginpapakita hito nga hi Maria nagkaada iba nga anak.—Mateo 12:46; Marcos 6:3; Lucas 2:7; Juan 7:5.

 Diri. Sumala ha New Catholic Encyclopedia, an katutdoan parte ha Imaculada Concepcion “amo an pagtoo nga an Birhen Maria waray makapanunod han ORIHINAL NGA SALA tikang ha tinikangan han iya kinabuhi, karuyag sidngon tikang han iginburod hiya. An ngatanan nga katawohan nakapanunod han sala . . . Pero hi Maria, pinaagi hin espesyal nga GRASYA, waray maapektohi han orihinal nga sala.” c

 Ha kabaliktaran, waray itutdo ha Biblia nga hi Maria waray makapanunod han orihinal nga sala. (Salmo 51:5; Roma 5:12) Ngani hi Maria mismo an nagpamatuod nga makasasala hiya han iginhalad niya an halad han pagpara han sala nga gin-oobligar han Mosaiko nga Balaud ha mga nanay. (Levitico 12:2-8; Lucas 2:21-24) An New Catholic Encyclopedia nagsiring nga “An Imaculada Concepcion waray direkta nga itutdo ha Kasuratan . . . Katutdoan [ito] nga ginhimo han Singbahan.”

 Hi Maria nagpakita hin maopay nga ehemplo hin pagtoo, pagkamasinugtanon, pagkamapainubsanon, ngan daku nga gugma ha Dios. Usa hiya han magtinumanon nga dapat naton subaron.—Hebreo 6:12.

 Pero bisan pa han iya naiiba nga papel sugad nga nanay ni Jesus, waray itutdo ha Biblia nga kinahanglan naton hiya singbahon o mag-ampo ha iya. Waray maghatag hi Jesus hin espesyal nga pagpasidungog ha iya nanay, o ginsidngan an iya mga sumurunod nga himoon ito. Ngani, labot la han mga Ebanghelyo ngan usa nga pag-unabi ha libro han Mga Buhat, waray na unabiha hi Maria han nahibibilin nga 22 nga libro ha gintatawag nga Bag-o nga Tugon.—Buhat 1:14.

 Waray makikita nga ebidensya ha Biblia nga hi Maria nakakarawat hin espesyal nga atensyon—o ginsingba—han siyahan-siglo nga mga Kristiano. Lugod gintututdo han Biblia nga an Dios la an dapat singbahon han mga Kristiano.—Mateo 4:10.