Kon karuyag mo makilala gud an usa, makakabulig kon mahibaroan mo kon ano an iya mga nabuhat ngan kon ano an mga kakurian nga iya nalamposan. Ha pariho nga paagi, kon karuyag mo makilala gud an Dios, kinahanglan mo mahibaroan kon ano an iya mga nabuhat. Kon bubuhaton mo ito, mahipapausa ka ha paghibaro nga nagpapahimulos ka han iya mga ginbuhat ha naglabay ngan may kalabotan ito han imo tidaraon.

Hi Jehova nga Dios an Harangdon nga Maglalarang, ngan “an iya diri-nakikita nga mga kalidad . . . klaro nga nakikita tikang pa ha paghimoa han kalibotan, kay nasasabtan ito pinaagi han mga butang nga ginhimo.” (Roma 1:20) “Iya ginhimo an tuna pinaagi han iya gahum, hiya an nagtukud han kalibutan pinaagi han iya kinaadman, ngan pinaagi han iya sarabutan iya ginbitad an mga langit.” (Jeremias 10:12) Dugang pa, an pagkaurusahon han mga linarang nagpapakita han interes han Dios ha aton.

Tagda kon paonan-o ginhimo ni Jehova nga espesyal hinduro an aton kinabuhi pinaagi ha paglarang ha aton ha “iya kalugaringon nga ladawan.” (Genesis 1:27) Nangangahulogan ini nga gintugotan kita niya nga masubad an iya diri matupngan nga mga kalidad bisan ha gutiay la nga paagi. Ginlarang niya kita nga may espirituwal nga kapasidad, o abilidad ha pagsabot han iya panhunahuna ngan mga suruklan. Samtang nangangalimbasog kita nga magkinabuhi uyon hini, mas nagkakaada kita daku nga kalipay ngan kapulsanan ha kinabuhi. Labaw pa hito, gintagan kita niya hin higayon nga magin duok ha iya.

Kon nakikita naton an mga linarang han Dios, naaabat naton kon ano an iya inaabat ha aton. Hi apostol Pablo nagsiring nga an Dios “pirme . . . nagpapakita hin pamatuod han mag-opay nga iya ginbubuhat pinaagi ha paghatag ha [aton] hin uran tikang ha langit ngan hin mga panahon han abunda nga pamunga, gintatagan [kita] hin damu nga pagkaon ngan ginpupuno an [aton] kasingkasing hin kalipay.” (Buhat  14:17) An Dios hura nga nagtatagana hin labaw kay han aton ginkikinahanglan basi kita mabuhi ngan malipay. Ini ngatanan gutiay la kon itanding han karuyag niya ihatag ha aton.

Ginlarang ni Jehova an tuna basi mag-ukoy an mga tawo dida hito ha waray kataposan. An Biblia nasiring: “An tuna iya ihinatag ha mga anak han mga tawo,” ngan “nagtukud hini ngan nagbuhat hini nga diri bayaan, nga naghitsura hini ha pagkaurukyan.” (Salmos 115:16; Isaias 45:18) Hin-o an maukoy ngan mationan-o kaiha? “An mga magtadung makakapanonod han tuna, ngan maukoy hira dida hin waray katapusan.”​—Salmos 37:29.

Salit ginlarang ni Jehova an siyahan nga lalaki ngan babaye, hira Adan ngan Eva, ngan ginpaukoy ha paraiso nga tuna basi “paghawanan ngan pagbantayan” ito. (Genesis 2:8, 15) Gintagan hira han Dios hin duha nga makalilipay nga toka: “Magmabungaon kamo ngan magdamo ngan pun-on niyo an tuna, ngan pagtagiyaha niyo ito.” (Genesis 1:28) Salit hira Adan ngan Eva may paglaom nga mabuhi ha waray kataposan. Makasurubo, ginpili nira nga magtalapas ha Dios ngan tungod hito nawara an ira paglaom nga magin usa han mga “magtadung” nga “makakapanonod han tuna.” Kondi sugad han aton mahibabaroan, waray magbag-o an katuyoan han Dios para ha aton o ha tuna bisan pa han ira ginbuhat. Kondi, tagdon anay naton an usa pa nga ginbuhat han Dios.

An Biblia gintatawag liwat nga Pulong han Dios. Kay ano nga igintagana ito ni Jehova ha aton? Siyahan basi mahibaro kita mahitungod ha iya. (Proberbios 2:1-5) Oo, diri ginbabaton han Biblia an ngatanan naton nga pakiana mahitungod ha Dios​—waray libro nga makakagbuhat hito. (Eklesiastes 3:11) Kondi an ngatanan nga aada ha Biblia mabulig ha aton nga makilala hiya. Nakikilala naton hiya pinaagi han iya pagtagad ha katawohan. Nahibabaroan naton kon ano nga klase hin mga tawo an iya naruruyagan ngan diri naruruyagan. (Salmos 15:1-5) Nahibabaroan naton an iya panhunahuna ha pagsingba, moralidad, ngan materyal nga butang. Ngan naghahatag ito ha aton han pinakamatin-aw nga paghulagway han iya personalidad pinaagi han mga pulong ngan buhat han iya Anak nga hi Jesu-Kristo.​—Juan 14:9.

Dugang pa, igintagana ni Jehova an Biblia basi mahibaro kita kon paonan-o magkakaada malipayon ngan mapulsanon nga kinabuhi. Pinaagi han Biblia, iginsusumat ni Jehova kon paonan-o kita magkakaada malipayon nga pamilya, kon paonan-o magigin kontento, ngan kon paonan-o malalamposan an mga kabaraka. Ngan sugad la han igsasaysay han sunod nga artikulo, an Biblia nagbabaton han pinakaimportante nga mga pakiana sugad han: Kay ano nga duro an pag-antos? Ano an mahitatabo ha tidaraon? Iginsasaysay liwat hini kon ano an ginbuhat han Dios basi masiguro nga matutuman an iya orihinal nga katuyoan.

Waray gud makakatupong ha Biblia. Oo, an Dios gud la an puydi magin awtor han sugad nga libro. Iginsurat ito ha sulod hin sobra 1,600 ka tuig hin mga 40 nga kalalakin-an. Bisan pa hito, natipigan an nangunguna nga tema han Biblia tungod kay an Dios an tinuod nga Awtor hito. (2 Timoteo 3:16) Diri pariho han iba nga kadaan nga mga sinurat, waray magbag-o an mensahe hito bisan ha paglabay han panahon, sugad han napamatud-an pinaagi han yinukot nga kadaan nga manuskrito han Biblia. Dugang pa, nalamposan han Biblia an mga pangalimbasog nga ig-undang an paghubad, pagpanaltag, ngan pagbasa hito. Yana, ito an pinakadamu nga iginpapanaltag ngan iginhuhubad nga libro ha bug-os nga kalibotan. An pag-eksister han Biblia ebidensya nga “an polong han aton Dios matindog ha kagihaponan.”​—Isaias 40:8.

Usa pa han ginhimo han Dios amo an iya espesyal nga tagana nga maggagarantiya nga matutuman an iya katuyoan. Sugad han gin-unabi na, katuyoan han Dios nga an mga tawo mabuhi ha waray kataposan. Kondi han gintalapas ni Adan hi Jehova ngan nakasala, nawara niya an higayon nga mabuhi ha waray kataposan, diri la para ha iya kalugaringon kondi pati ha iya magigin mga anak. “Pinaagi han usa nga tawo an sala sinulod ha kalibotan ngan an kamatayon pinaagi han sala, tungod hito an kamatayon inabot ha ngatanan nga tawo kay hira ngatanan nakasala.” (Roma 5:12) Tungod han pagtalapas ni Adan, baga hin diri matutuman an katuyoan han Dios. Ano an ginbuhat ni Jehova?

An ginbuhat ni Jehova uyon han iya mga kalidad. Tungod han iya hustisya, iya gintagad hira Adan ngan  Eva nga amo an may baratunon ha ira ginbuhat, kondi mahigugmaon nga nagtagana hiya hin bulig para ha ira magigin mga anak. Ngan tungod han iya kinaadman, nagdesisyon hiya kon paonan-o susulbaron an sitwasyon, ngan nagpahibaro dayon hiya hin solusyon. (Genesis 3:15) An katalwasan tikang ha sala ngan kamatayon igtatagana han Anak han Dios nga hi Jesu-Kristo. Ano an nahiuupod hito?

Basi malukat an katawohan tikang ha epekto han pagrebelde ni Adan, iginpadara ni Jehova hi Jesus ha tuna basi tutdoan an mga tawo han dalan han kinabuhi ngan basi “maghalad han iya kalag sugad nga lukat para ha damu nga tawo.” * (Mateo 20:28; Juan 14:6) Maitatagana ni Jesus an lukat tungod kay perpekto hiya pariho kan Adan. Kondi diri pariho kan Adan, nagpabilin hi Jesus nga masinugtanon tubtob ha kamatayon. Tungod kay hi Jesus diri takos mamatay, ginbanhaw hiya ni Jehova ngadto ha langit. Mabubuhat na ni Jesus an waray mabuhat ni Adan​—an paghatag ha masinugtanon nga mga tawo han paglaom nga mabuhi ha waray kataposan. “Kay sugad la nga pinaagi han pagkadiri-masinugtanon han usa nga tawo, damu an nagin makasasala, sugad man pinaagi han pagkamasinugtanon han usa nga tawo, damu an magigin matadong.” (Roma 5:19) Pinaagi han halad-lukat ni Jesus, tutumanon han Dios an iya saad nga an tawo mabubuhi ha waray kataposan ha tuna.

Damu an aton nahibaroan mahitungod kan Jehova ha paagi han iya pagtadong han sitwasyon tungod han pagin diri masinugtanon ni Adan. Hinbaroan naton nga waray makakapugong kan Jehova ha pagtapos han iya gintikangan na; an iya pulong matutuman gud. (Isaias 55:11) Naaabat liwat naton an pagkahilarom han gugma ni Jehova para ha aton. “An gugma han Dios iginpahayag ha aton hini nga paagi, han ginpakanhi han Dios ha kalibotan an iya bugtong nga Anak basi makarawat naton an kinabuhi pinaagi ha iya. Iginpahayag ini nga gugma, diri tungod kay ginhigugma naton an Dios, kondi tungod kay ginhigugma kita niya ngan ginpakanhi an iya Anak sugad nga halad ha pagpahiuli para ha aton mga sala.”​—1 Juan 4:9, 10.

‘Waray pugngi [han Dios] nga mag-antos an iya Anak kondi igintubyan lugod hiya ha kamatayon para ha aton ngatanan,’ salit makakasiguro kita nga “malipayon nga ihahatag liwat [han Dios] ha aton an iba pa nga butang” nga iya iginsaad. (Roma 8:32) Ano an iginsaad han Dios nga iya pagbubuhaton para ha aton? Alayon ipadayon an pagbasa.