Kon Kay Ano nga Maglikay ha Pagin Sobra?

HI Jehova an hingpit nga ehemplo han pagin timbang. “An iya buhat hingpit,” ngan an iya hustisya diri gud maraugdaog, tungod kay pirme ito inuupdan hin kalooy. (Deuteronomio 32:4) An iya gugma basado gud ha prinsipyo, tungod kay nagios hiya uyon han iya hingpit nga mga balaud. (Salmo 89:14; 103:13, 14) An aton siyahan nga mga kag-anak ginlarang nga timbang ha ngatanan nga bahin. Waray hira tendensya ha bisan ano nga pagin sobra. Kondi, an ira pakasala nagresulta hin “kasurusnan”—pagkadiri-hingpit—nga nakawara hito nga pagkatimbang.—Deuteronomio 32:5.

Ha pag-ilustrar: Nakasakay ka na ba hin awto o bisikleta nga may bukol an ruyda? Waray ruhaduha nga an dalagan hito mag-uuntol-untol ngan diri talwas. Ito nga ruyda kinahanglan aydon antes maguba o ma-flat. Ha pariho nga paagi, an aton diri hingpit nga personalidad may tendensya nga magburubag-o. Kon pababay-an naton nga dumaku an “mga bukol,” an aton biyahe ha kinabuhi magigin mabatsi, delikado pa ngani.

Usahay an aton mag-opay nga kalidad, an aton mga hiyas, mahimo magin sobra. Pananglitan, bisan kon an Mosaiko nga balaud nag-oobligar ha mga Israelita nga butangan hin borlas an sidsid han ira bado, an mga Pariseo ha panahon ni Jesus, tungod kay naruruyag nga magin iba gud ha publiko, ‘nagpadaku han ira mga sidsid.’ An ira motibo amo an pagin mas baraan pagkit-on kay ha iba.—Mateo 23:5; Numero 15:38-40.

Yana an iba nangangalimbasog ha pagkuha hin atensyon ha bisan ano nga paagi, bisan kon malain na ito pagkit-on han iba. Bangin ha pagkamatuod, desperado nga paagi ini ha pagsiring: “Kitaa gad ako! Tawo man liwat ako!” Kondi an pagin sobra ha pamado, disposisyon, ngan buhat diri magtatagbaw han totoo nga mga panginahanglan han usa nga Kristiano.

Timbang nga Pagtagad ha Trabaho

Hin-o man kita ngan diin man kita naukoy, an maopay nga buruhaton usa nga nakakabulig basi magin mapulsanon an aton kinabuhi. Ginlarang kita basi matagbaw ha sugad nga buruhaton. (Genesis 2:15) Salit, ginkukondenar han Biblia an pagin hubya. Hi apostol Pablo prangka nga nagsiring: “Kon hin-o an diri magbuhat, diri man hiya kumaon.” (2 Tesalonika 3:10) Oo, an kahubya ha trabaho mahimo magresulta diri la hin kapobrehan ngan pagkadiri-kontento kondi pati han kasina han Dios.

Ha luyo nga bahin, damu an nagigin sobra kamatrabahoon, boluntaryo nga nagpapauripon ha ira trabaho. Nabaya ha ira balay temprano ha aga ngan gab-i na hinduro nga nauli, bangin mangatadungan hira nga para ito ha kaopayan han ira pamilya. Kondi, ha pagkamatuod an ira pamilya an nag-aantos ha sugad nga pagtrinabaho. Usa nga asawa nga an bana agsob mag-overtime, nagsiring: “Malilipay ako bisan waray an ngatanan nga butang hinin magarbo nga balay basta makaupod la namon han amon mga anak an akon bana.” Adton naruruyag ha pagtrabaho hin sobra sadang maghunahuna hin seryoso ha eksperyensya ni Hadi Salomon: “Dida hito ako nagtan-aw ha ngatanan nga buruhaton nga ginbuhat han akon mga kamot, ngan ha buruhaton nga akon ginkabudlayan pagbuhat, ngan, kitaa,  an ngatanan parayaw ngan panalinguha ha hangin.”—Eklesiastes 2:11.

Oo, may kalabotan ha trabaho, kinahanglan likyan naton an pagin sobra kamatrabahoon o pagin hubya. Mahimo kita magin maduruto nga magburuhat, samtang ginhuhunahuna nga an pagin uripon ha trabaho magwawara han aton kalipay ngan bangin damu pa.—Eklesiastes 4:5, 6.

Likayi an Sobra nga Pagtagad ha Kalipayan

An Biblia nagtagna mahitungod han aton panahon: “An mga tawo magmamahigugmaon . . . ha kalipayan labi kay ha paghigugma ha Dios.” (2 Timoteo 3:2, 4) An pagtinguha ha kalipayan nagin usa han pinakaepektibo nga paagi ni Satanas ha pagdani ha mga tawo pahirayo ha Dios. Popular na an sobra nga pagpahalibway ngan kaliawan, sugad han mga isport nga peligroso. Padayon nga nagtitikadamu an sugad nga mga kaliawan, pati na an nagbubuhat hito. Kay ano nga nagigin sobra kapopular ito? Damu nga tawo, nga diri tagbaw ha ira adlaw-adlaw nga kinabuhi, namimiling hin mas nagtitikaduro nga kalipay. Kondi basi maipadayon an sugad nga sobra nga kalipay, ginkikinahanglan an nagtitikaduro nga peligro. Ginlilikyan han totoo nga mga Kristiano an peligroso nga mga isport tungod han ira pagtahod ha regalo nga kinabuhi ngan ha Naghatag hito.—Salmo 36:9.

Han ginlarang han Dios an siyahan nga mag-asawa, diin niya ginpaukoy hira? Ha hardin han Eden, nga ha orihinal nga yinaknan, nangangahulogan hin ‘Kalipay.’ (Genesis 2:8) Matin-aw nga an makaruruyag ngan makalilipay nga kinabuhi bahin han katuyoan ni Jehova para ha tawo.

Gintagan kita ni Jesus hin hingpit nga susbaranan han timbang nga panhunahuna ha kalipay. Debotado gud hiya ha pagtuman han kaburut-on ni Jehova, ngan waray gud hiya umundang ha pagkinabuhi uyon ha mga balaud ngan prinsipyo han Dios. May-ada hiya panahon para hadton nanginginahanglan, bisan kon kapoy hiya. (Mateo 14:13, 14) Oo, kinarawat hi Jesus hin mga imbitasyon ha pangaon ngan may-ada liwat hiya panahon ha pagpahuway ngan pagparepresko. Syempre, maaram hiya nga ginpapakaraot hiya han pipira han iya kaaway tungod ha pagbuhat hini. Mahitungod ha iya, hira nagsiring: “Kitaa, an hakog ngan parainom.” (Lukas 7:34; 10:38; 11:37) Kondi diri natoo hi Jesus nga an totoo nga debosyon nakakawara han ngatanan nga kalipayan ha kinabuhi.

Matin-aw nga maaramon para ha aton nga likyan an bisan ano nga sobra may kalabotan ha kaliawan. An pag-una han kalipayan ngan kaliawan ha aton kinabuhi diri gud makakahatag hin totoo nga kalipay. Magriresulta ito nga balewarayon naton an mas importante nga mga butang, upod na an aton relasyon ha Dios. Ha gihapon, diri naton sadang likawan an aton kalugaringon han ngatanan nga kalipay o magin kritiko ha iba nga nalilipay ha ira kinabuhi ha timbang nga paagi.—Eklesiastes 2:24; 3:1-4.

Magkaada Kalipay Pinaagi ha Pagkaada Timbang nga Kinabuhi

Hi disipulo Jakobo nagsurat: “Ha damu nga mga butang kita ngatanan nanhipakdol.” (Jakobo 3:2) Bangin makita naton nga totoo ini samtang nangangalimbasog kita nga maglikay ha pagin sobra. Ano an makakabulig ha aton nga magpabilin nga timbang? Bueno, kinahanglan naton kilalahon an aton kalugaringon nga kusog ngan kaluyahan. Diri masayon ito. Mahimo nga diri kita umabat nga nagtitikasobra na kita. Kon amo, maaramon nga magpabilin kita nga duok ha hamtong nga mga Kristiano ngan mamati ha timbang nga sagdon. (Galasia 6:1) Bangin mangaro kita hin sagdon tikang ha masasarigan nga sangkay o eksperyensyado nga tigurang ha kongregasyon. Upod han Kasuratan mismo, an sugad nga sagdon nga iginbasar ha Biblia mahimo magin “espiho” para ha aton basi hibaroan kon timbang gud ba kita ha pagkita ni Jehova.—Jakobo 1:22-25.

Mapasalamaton gud kita nga diri kita kinahanglan magkinabuhi ha diri malikyan nga pagin sobra. Pinaagi han padayon nga pangalimbasog ngan bulig ni Jehova, mahimo kita magin timbang ngan salit magin malipayon. Tungod hito an aton relasyon ha aton Kristiano nga kabugtoan mahimo mag-uswag, ngan mahimo kita magin mas maopay pa ngani nga ehemplo para ha aton ginsasangyawan. Labaw ha ngatanan, masusubad naton hin mas maopay an aton timbang ngan mahigugmaon nga Dios, hi Jehova.—Efeso 5:1.

[Ginkuhaan han Retrato ha pahina 28]

©Greg Epperson/age fotostock