Mga Asawa—Tahora Gud Niyo an Iyo mga Bana

“Mga asawa nga kababayin-an, magpasakop kamo ha iyo mga asawa.”—EFESO 5:22.

1. Kay ano nga an pagtahod ha bana agsob nga makuri buhaton?

HA DAMU nga katunaan kon may-ada nagpapakasal, an asawa nanunumpa, nagsasaad nga iya tatahuron gud an iya bana. Kondi nagigin makuri o masayon an pagtuman hito nga panumpa depende ha pagtrato han damu nga bana ha ira mga asawa. Kondi, an pag-asawa may-ada maopay nga tinikangan. An Dios kinuha hin usa nga gusok tikang kan Adan, an siyahan nga lalaki, ngan ginhimo an babaye. Hi Adan nagsinggit: “Ini yana tul-an han akon mga tul-an, ngan unod han akon unod.”—Genesis 2:19-23.

2. Ano an nahitatabo may kalabotan ha kababayin-an ngan ha pag-asawa ha bag-o la nga panahon?

² Bisan pa hiton maopay nga tinikangan, usa nga organisasyon nga tinatawag nga kagawasan han kababayin-an—usa nga pangalimbasog han kababayin-an nga makagawas ha pagkaulo han lalaki—an gintikangan temprano han dekada han 1960 ha Estados Unidos. Hito nga panahon, 1 nga asawa an nabaya ha ira pamilya ha kada 300 nga bana nga nagbubuhat hito. Ha kataposan han dekada han 1960, 3 na nga asawa an nabaya ha ira pamilya. Yana, an kababayin-an nagbubuyayaw, nainom, nagsisigarilyo, ngan imoral sugad han kalalakin-an. Mas malipayon ba an kababayin-an tungod hito? Diri. Ha pipira nga nasud, mga katunga han mga tawo nga nag-aasawa an nagdidiborsyo. Nagin mas maopay ba o mas maraot an kahimtang han pag-asawa tungod han pangalimbasog han pipira nga kababayin-an ha pagpauswag hito?—2 Timoteo 3:1-5.

3. Ano an nangunguna nga problema nga nakakaapekto ha pag-asawa?

³ Ano an nangunguna nga problema? Kasagaran, ito an problema nga naeksister na tikang nga hi Eva ginsulay han rebelde nga anghel, “an daan nga halas, nga ginngangaranan nga Yawa ngan Satanas.” (Pahayag 12:9; 1 Timoteo 2:13, 14) Ginpakaraot ni Satanas an igintututdo han Dios. Pananglitan, mahitungod han pag-asawa, baga hin ipinakita han Yawa nga istrikto ngan mapintas ito. An sayop nga impormasyon nga ginpapasarang niya pinaagi han media hini nga kalibotan—nga iya ginmamandoan—dinisenyo basi hunahunaon han mga tawo nga an mga instruksyon han Dios baga hin nagpapasulabi ngan kadaan na. (2 Korinto 4:3, 4) Kondi, kon aton usisahon nga waray dinadapigan an ginsisiring han Dios mahitungod han bahin han babaye ha pag-asawa, makikita naton nga maaramon ngan praktikal gud an Pulong han Dios.

Pahamangno ha mga Nag-aasawa

4, 5. (a) Kay ano nga an babaye sadang mag-ikmat kon naghuhunahuna hin pag-asawa? (b) Ano an sadang buhaton han babaye antes umuyon ha pag-asawa?

⁴ An Biblia nagpapahamangno nga hini nga kalibotan nga ginmamandoan han Yawa, bisan adton malampuson ha ira pag-asawa magkakaada “kagol-anan.” Salit bisan kon kahikayan han Dios an pag-asawa, an Biblia nagpapahamangno ha mga nag-aasawa. Usa nga giniyahan nga parasurat han Biblia an nagsiring mahitungod han babaye nga namatay an iya bana salit may kagawasan na ha pag-asawa utro: “Daku pa lugod an iya kalipayan kon hiya magpadayon na la hin sugad hini.” Iginrirekomenda liwat ni Jesus an pagin solo para hadton “makakahimo pagkarawat hini.” Kondi, kon karuyag han usa nga mag-asawa, sadang mag-asawa hiya “ha Ginoo” la, ha dedikado ngan bawtismado nga magsiringba ha Dios.—1 Korinto 7:28, 36-40; Mateo 19:10-12.

⁵ An hinungdan nga an babaye an labi na nga sadang mag-ikmat kon hin-o an iya pangangasaw-on amo an pahamangno han Biblia: “An babaye nga inasaw-an, ilarom han gahum han Kasugoanan  ha iya asawa nga buhi pa hiya.” ‘Mahigagawas la hiya ha Kasugoanan han asawa’ kon namatay na an iya bana o nagbuhat hin imoralidad ngan nagdiborsyo an mag-asawa. (Roma 7:2, 3) An pagkaruyag ha siyahan nga pagkita bangin igo na para ha makaruruyag nga romantiko nga paghigugmaay, kondi diri ito igo nga basihan para ha malipayon nga pag-asawa. Salit, an solo nga babaye kinahanglan magpakiana ha iya kalugaringon, ‘Disidido ba ako sumulod ha kahikayan diin magigin ilarom ako ha balaud hini nga lalaki?’ An paghunahuna hini nga pakiana sadang himoon antes mag-asawa, diri katapos.

6. Ano nga desisyon an ginhihimo han kadam-an nga kababayin-an yana, ngan kay ano nga importante hinduro ito?

⁶ Ha damu nga lugar yana, an babaye makakapili kon kakarawaton ba o diri an tanyag hin pag-asawa. Kondi, an paghimo hin maaramon nga desisyon bangin amo an pinakamakuri nga mahihimo han babaye, tungod kay bangin ginhihingyap gud niya nga magkaada hin duok nga kaupod ngan gugma nga posible la ha pag-asawa. Usa nga parasurat an nagsiring: “Kon mas karuyag naton buhaton an usa ka butang—pag-asawa man o pagsagka ha bukid—mas posible nga magdidesisyon kita nga waray basihan ngan pamamatian la naton an impormasyon nga karuyag naton hibatian.” An diri makatadunganon nga desisyon han nasagka ha bukid mahimo makamatay ha iya; an diri-maaramon nga pagpili han magigin asawa makakadaot liwat.

7. Ano nga maaramon nga sagdon an iginhahatag mahitungod ha pamiling hin bana o asawa?

⁷ Sadang hunahunaon hin seryoso han babaye kon ano an mahimo mahiupod ha pagin sakop ha balaud han lalaki nga nagtatanyag ha iya hin pag-asawa. Mga tuig na an naglabay, usa nga daraga nga taga-India an mapainubsanon nga nagsiring: “An aton mga kag-anak mas edaran ngan mas maaramon, ngan diri hira masayon malimbongan sugad ha aton. . . . Masayon gud la ako magsayop.” Importante an bulig nga maihahatag han mga kag-anak ngan iba pa. Usa nga maaramon nga magsaragdon an maiha na nga nagdadasig ha mga batan-on nga kilalahon anay an mga kag-anak han ira magigin asawa ngan obserbahan hin maopay an iya pakig-upod ha iya mga kag-anak ngan ha iba nga mga membro han pamilya.

Kon Paonan-o Nagpasakop hi Jesus

8, 9. (a) Paonan-o gintagad ni Jesus an iya pagpasakop ha Dios? (b) Ano an mahimo magin kapulsanan han pagpasakop?

⁸ Bisan kon bangin makuri an pagpasakop, mahimo ito tagdon han kababayin-an sugad nga dungganon, sugad la han ginbuhat ni Jesus. Bisan kon an iya pagpasakop ha Dios nag-upod han pag-antos, upod na an kamatayon ha pasakitan nga kahoy, malipayon hiya ha pagpasakop ha Dios. (Lukas 22:41-44; Hebreo 5:7, 8; 12:3) Mahimo subaron han kababayin-an hi Jesus, kay an Biblia nasiring: “An ulo han babaye amo an lalaki; ngan an ulo ni Kristo amo an Dios.” (1 Korinto 11:3) Kondi, makatirigamnan nga diri la ha panahon nga nag-aasawa an kababayin-an nagigin sakop hira han pagkaulo han kalalakin-an.

⁹ An Biblia nagsasaysay nga an kababayin-an,  inasaw-an man o solo, sadang magpasakop ha pagkaulo han kalalakin-an nga kwalipikado ha espirituwal nga nagmamangno ha Kristiano nga kongregasyon. (1 Timoteo 2:12, 13; Hebreo 13:17) Kon ginsusunod han kababayin-an an sugo han Dios ha pagbuhat hito, ipinapakita nira an susbaranan para ha mga anghel ha kahikayan han organisasyon han Dios. (1 Korinto 11:8-10) Dugang pa, an mas edaran nga kababayin-an nga inasaw-an, pinaagi han ira maopay nga susbaranan ngan mapulsanon nga mga suhestyon, nagtututdo ha mas batan-on nga kababayin-an nga “magpasakop ha ira mga asawa.”—Tito 2:3-5.

10. Paonan-o ipinakita ni Jesus an susbaranan han pagpasakop?

¹⁰ Maaram hi Jesus han bili han angayan nga pagpasakop. Ha usa nga higayon, iya ginsugo hi apostol Pedro nga magbayad hin buhis ha tawhanon nga mga awtoridad para ha ira nga duha, gintagan pa ngani hi Pedro hin kwarta para ha buhis. Ha urhi, hi Pedro nagsurat: “Magmatinumanon kamo ha ngatanan nga balaud han tawo tungod han Ginoo.” (1 Pedro 2:13; Mateo 17:24-27) Mahitungod han gimaopayi nga susbaranan ni Jesus han pagpasakop, aton mababasa: “Gin-ula niya an iya kalugaringon, nga nagpariho hin dagway han uripon, kay ginhimo nga ladawan han mga tawo; ngan nga sugad na hiya ha bayhon han tawo, nagpaubos hiya ha iya ngahaw, nga nagmasinugtanon tubtob ha kamatayon.”—Filipos 2:5-8.

11. Kay ano nga gindasig ni Pedro an mga asawa nga magpasakop bisan ha mga bana nga diri-tumuroo?

¹¹ Han gindadasig ni Pedro an mga Kristiano nga magpasakop bisan ha magpintas, waray-hustisya nga mga awtoridad hini nga kalibotan, hiya nagsaysay: “Kay tungod hini mga gintawag kamo: kay hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pagpitad.” (1 Pedro 2:21) Katapos ihulagway an duro nga pag-antos ni Jesus ngan an iya mapinasakupon nga pag-ilob, gindasig ni Pedro an mga asawa han diri-tumuroo nga mga bana: “Sugad man, mga kaasaw-an nga kababayin-an, magpasakop kamo ha iyo mga kaasaw-an nga kalalakin-an; nga, basi, kon may-ada iba nga diri masinugtanon ha pulong, pagdad-on unta hira ha waray pulong, pinaagi han mga batasan han ira mga kaasaw-an; nga hikit-an nira an iyo mauray nga gawi nga may kahadlok.”—1 Pedro 3:1, 2.

12. Ano an mga kapulsanan han pagin mapinasakupon ni Jesus?

¹² An pagpasakop bisan pa han pagtamay ngan pag-abuso mahimo tagdon sugad nga ebidensya han kaluyahan. Kondi, diri sugad hito an pagtagad ni Jesus. “Han pagpakaalohi ha iya,” nagsurat hi Pedro, “waray hiya bulos hin pagpakaalo; han iya pag-antos, waray hiya magtarhog.” (1 Pedro 2:23) An iba nga nakakita kan Jesus nga nag-antos nagin mga tumuroo, upod na an usa nga kawatan nga sapit niya ha kahoy ngan an opisyal han kasundalohan nga nagkikita ha pagpatay. (Mateo 27:38-44, 54; Markos 15:39; Lukas 23:39-43) Ha sugad man nga paagi, ipinakita ni Pedro nga an iba nga diri-tumuroo nga mga bana—bisan adton abusado—magigin mga Kristiano katapos makita an mapinasakupon nga paggawi han ira mga asawa. Nakikita naton an ebidensya nga nahitatabo ini yana.

Kon Paonan-o Maaaghat han mga Asawa an Ira mga Bana nga Magin Tumuroo

13, 14. Paonan-o nagigin mapulsanon an pagpasakop ha diri-tumuroo nga mga bana?

¹³ An mga asawa nga nagin mga tumuroo nakaaghat ha ira mga bana nga magin tumuroo liwat tungod han ira sugad-Kristo nga paggawi. Ha bag-o la nga distrito nga kombensyon han mga Saksi ni Jehova, usa nga bana an nagsiring mahitungod han iya Kristiano nga asawa: “Maraot an akon pagtrato ha iya. Kondi matinalahuron gud hiya ha akon. Waray gud niya ako pagminosa. Waray niya ipirit ha akon an iya mga tinotoohan. Mahigugmaon nga nagmangno hiya ha akon. Kon natambong hiya ha asembleya, maduruto hiya ha pag-andam han akon pagkaon temprano pa ngan tinatapos niya an iya trabaho ha balay. An iya disposisyon nagtikang makaaghat ha akon nga magin interesado ha Biblia. Salit yana, usa na ako nga Saksi ni Jehova!” Oo, nadaog hiya “ha waray pulong” tungod han paggawi han iya asawa.

¹⁴ Sugad han pinabug-atan ni Pedro, diri an ginsisiring han asawa kondi an iya ginbubuhat  an mas epektibo ha pagkaada hin positibo nga mga resulta. Ipinakita ini han usa nga asawa nga nahibaro han mga kamatuoran han Biblia ngan determinado nga tumambong ha Kristiano nga mga katirok. “Agnes, kon gumawas ka hiton nga purtahan, ayaw na pagbalik!” nagsinggit an iya bana. Waray hiya gumawas “hiton nga purtahan” kondi, lugod, ha lain nga purtahan. Ha sunod nga gab-i han katirok, an bana nagtarhog: “Waray na ako dinhi pagbalik mo.” Aw, binaya hiya—hin tulo ka adlaw. Han binalik hiya, may pagkabuotan nga nagpakiana an asawa: “Karuyag mo ba kumaon?” Hi Agnes waray gud magluya bisan gutiay ha iya debosyon kan Jehova. Ha kamaihaan an iya bana nag-aram ha Biblia, igindedikar an iya kinabuhi ha Dios, ngan ha urhi nag-alagad sugad nga paramangno nga damu an responsabilidad.

15. Ano nga “pagrayandayan” an iginrirekomenda para ha Kristiano nga mga asawa?

¹⁵ Hi apostol Pedro nagrekomenda hin usa nga butang nga ipinakita han mga asawa nga gin-unabi na, an “pagrayandayan,” kondi diri pinaagi han paghatag hin sobra nga atensyon ha “pagsalapid ha buhok” o “pagsul-ot hin panapton.” Lugod, hi Pedro nagsiring: “[An iyo pagrayandayan] maasya unta an tinago nga tawo ha kasingkasing, ha panapton nga waray pagkadunot han maaghop ngan mabuot nga espiritu, nga amo an mahal gud ha atubangan han Dios.” Ini nga espiritu ipinapakita ha tono han tingog ngan ha paagi nga makaruruyag imbes nga nangangayat o namimirit. Hito nga paagi ipinapakita han Kristiano nga asawa an iya hilarom nga pagtahod ha iya bana.—1 Pedro 3:3, 4.

Mga Susbaranan nga Sadang Sundon

16. Ha ano nga mga paagi maopay nga susbaranan hi Sara para ha Kristiano nga mga asawa?

¹⁶ Hi Pedro nagsurat: “Hadton una nga panahon nga an mga baraan nga kababayin-an, nga nagsarig ha Dios, rinayandayanan ha ira ngahaw, nga nagpasakop ha ira mga kaasaw-an.” (1 Pedro 3:5) Nasabtan han sugad nga kababayin-an nga an pagpalipay kan Jehova pinaagi han pagsunod ha iya sagdon ha kataposan magriresulta hin kalipay han pamilya ngan han balos nga kinabuhi nga waray kataposan. Gin-unabi ni Pedro hi Sara, an mahusay nga asawa ni Abraham, nga “nagsugot kan Abraham, nga nagtawag ha iya nga ginoo.” Sinuportahan ni Sara an iya mahadlukon-ha-Dios nga bana, nga igintoka han Dios nga mag-alagad ha hirayo nga tuna. Iya ginbayaan an mahimyang nga pagkinabuhi ngan iginbutang pa ngani ha peligro an iya kinabuhi. (Genesis 12:1, 10-13) Iginrekomenda ni Pedro hi Sara tungod han iya maisugon nga susbaranan, nasiring: “Mga anak kamo niya kon kamo magbuhat hin maopay, ngan diri kamo mahadlok hin bisan ano nga kahadlokan.”—1 Pedro 3:6.

17. Kay ano nga bangin nahunahuna ni Pedro hi Abigail sugad nga susbaranan para ha Kristiano nga mga asawa?

¹⁷ Hi Abigail usa pa nga waray-kahadlok nga babaye nga sinarig ha Dios, ngan bangin hiya liwat an nahunahuna ni Pedro. “May maopay nga  sarabotan” hiya, kondi an iya bana nga hi Nabal “bastos ngan maraot ha iya mga binuhatan.” Han nagdumiri hi Nabal ha pagbulig kan David ngan ha iya kalalakin-an, nag-andam hira nga patayon hi Nabal ngan an bug-os niya nga panimalay. Kondi hi Abigail ginios dayon basi maluwas an iya panimalay. Nagkarga hiya hin damu nga pagkaon ha mga asno ngan gintapo hi David ngan an iya kalalakin-an nga tiarabot. Han nakita niya hi David, hinaw-as hiya ha asno, hinapa ha iya tiilan, ngan nanginyupo ha iya nga maghunahuna anay hin maopay antes gumios. Nabantad gud hi David. “Bulahan hi Jehova, an Dios han Israel, nga nagpadara ha imo hini nga adlaw pakigkita ha akon,” siring niya, “ngan bulahan an imo sarabotan.”—1 Samuel 25:2-33.

18. Kon nasusulay han pagkaruyag han iba nga lalaki, an mga asawa sadang mamalandong han ano nga susbaranan, ngan kay ano?

¹⁸ Usa pa nga maopay nga susbaranan para ha mga asawa amo an batan-on nga Sulamita nga nagpabilin nga maunungon ha ordinaryo nga magbarantay han mga karnero nga ginsaaran na nga hiya an mapapangasawa. An iya gugma ha iya nagpabilin nga marig-on bisan kon nagpakita hin pagkaruyag ha iya an bahandianon nga hadi. Tungod kay napagios ha pagpahayag han iya mga pagbati para ha batan-on nga magbarantay, hiya nagsiring: “Ibutang ako sugad nga timre ha imo kasingkasing, sugad nga timre ha imo butkon: kay an gugma makusog sugad han kamatayon . . . An damu nga katubigan diri makakasubo han gugma, diri man an mga lunop makakalumos hini.” (Kanta ni Salomon 8:6, 7) Hinaot magin determinasyon liwat han ngatanan nga kababayin-an nga nauyon ha pag-asawa nga magpabilin nga maunungon ha ira mga bana ngan tahuron gud hira.

Dugang nga Sagdon han Dios

19, 20. (a) Kay ano nga an mga asawa sadang magpasakop ha ira mga bana? (b) Ano nga maopay nga susbaranan an iginhatag para ha mga asawa?

¹⁹ Ha kataposan, tagda an konteksto han aton tema nga teksto: “Mga asawa nga kababayin-an, magpasakop kamo ha iyo mga asawa.” (Efeso 5:22) Kay ano nga kinahanglanon an sugad nga pagpasakop? “Tungod kay,” an sunod nga bersikulo nagpapadayon, “an asawa nga lalaki amo an ulo han asawa nga babaye, sugad man nga hi Kristo amo iton ulo han singbahan.” Salit an mga asawa ginsasagda: “Sugad nga iton singbahan sakop ni Kristo, sugad man an mga asawa nga babaye magpasakop ha ngatanan nga mga bagay ha ira asawa nga lalaki.”—Efeso 5:23, 24, 33.

²⁰ Basi makasunod hini nga sugo, kinahanglan pag-adman han mga asawa ngan sundon an susbaranan han kongregasyon han dinihogan nga mga sumurunod ni Kristo. Alayon basaha an 2 Korinto 11:23-28 ngan hibaroi kon ano an gin-ilob han usa nga membro han kongregasyon, hi apostol Pablo, ha pagin matinumanon ha iya Ulo, hi Jesu-Kristo. Pariho kan Pablo, an mga asawa sugad man an ngatanan ha kongregasyon kinahanglan magpabilin nga maunungon nga nagpapasakop kan Jesus. Ipinapakita ini han mga asawa pinaagi han ira pagpasakop ha ira mga bana.

21. Ano an makakadasig ha mga asawa nga padayon nga magpasakop ha ira mga bana?

²¹ Bisan kon damu nga asawa yana an bangin nadiri ha pagpasakop, tatagdon han maaramon nga babaye an mga kapulsanan hito. Pananglitan, ha kahimtang han usa nga bana nga diri-tumuroo, an pagpasakop han asawa ha iya pagkaulo ha ngatanan nga butang nga diri nagtatalapas ha mga balaud o prinsipyo han Dios mahimo gud magresulta ha urusahon nga balos nga ‘maluwas niya an iya bana.’ (1 Korinto 7:13, 16) Dugang pa, magigin kontento hiya ha paghibaro nga inuuyonan ni Jehova nga Dios an iya buhat ngan hura nga babalosan hiya tungod ha pagsubad ha susbaranan han Iya hinigugma nga Anak.

Nahinunumdoman Mo Ba?

• Kay ano nga bangin makuri para ha asawa an pagtahod ha iya bana?

• Kay ano nga seryoso hinduro an pagkarawat han tanyag hin pag-asawa?

• Ha ano nga paagi usa nga susbaranan hi Jesus para ha mga asawa, ngan ano nga mga kapulsanan an mahimo magin resulta han pagsunod ha iya susbaranan?

[Mga Pakiana]

[Retrato ha pahina 19]

Kay ano nga seryoso hinduro an pagdesisyon kon kakarawaton ba an tanyag hin pag-asawa?

[Retrato ha pahina 21]

Ano an mahibabaroan han mga asawa tikang ha susbaranan han kababayin-an ha Biblia sugad kan Abigail?