BUKU jakumalisya ja Baibulo, jajikumanyika ni lina lyakuti Ciunukuko, jikupeleka cembeceyo kwa ŵandu wosope. Bukuji ŵalembile Yohane, nipo mwana sagamisi syakulocesya ya msogolo, yele kumbesi kwakwe yiciŵa kwanilicika kwa lisosa lya Yehofa.

Mu sagamisi syandanda, Yesu juŵajimwice ku ŵawe akujitogolela ni kujijongolela mipingo. Sagamisi syakuyicisya sikutulosya citengu caucimwene ca Mlungu kwinani, kwele yakupanganyikwa yausimu yikumlumba Mlungu.

Lisosa lya Mlungu palikwendelecela, Mwanangondolo, jwali Yesu Klistu akupocela buku ja yimatilo yakwana msano kwisa yiŵili. Ali amatukwile yimatilo mcece yandanda, pakuwoneka acalume ŵakwamba kuwanicisya ali akwesile pa mbunda. Jwandanda ali Yesu ali akwesile pa mbunda jeswela, soni ali awete cisindi cakulosya kuti ali Mwenye. Kaneko pakuwoneka acalume ali akwesile pa mbunda syamitundu jakulekanganalekangana, yayikulocesya ngondo, sala, ni milili. Yosopeyi yikutendekwa m’moŵa gambesi ga ukoto awuno wa yindu. Pambesi pa kumatukula kwa cimatilo camsano kwisa yiŵili, gomba kwa mapenga gakwana msano kwisa gaŵili gakwamba kuwanicisya kukuyicisya. Yeleyi yikulosya kulalicila kwa kwelusya kwa Mlungu. Yeleyi yikutendekasya kuti patendece milili jakuwanicisya jakwana msano kwisa jiŵili, jajili jakulosya ukali wa Mlungu.

Ucimwene wa Mlungu akuwutamilikasya kwinani, ni ukuŵa mpela mwanace jwamlume jwakupagwa kwene. Ngondo jikuwulika, soni Satana ni malayika gakwe gakusakala akwaponyela pasi ku cilambo capasi. Kaneko kukupikanika kugumila kwa maloŵe gakuti, “mkwete likungu cilambo capasi.” Satana akwete ukali mnope, ligongo akumanyilila kuti jigambile kumsigalila ndaŵi panandi.—Ciunukuko 12:12.

Yohane akum’wona Yesu kwinani alimkuwoneka mpela mwanangondolo, ali yimpepe ni ŵandu ŵakwana 144,000 ŵakwasagula kutyocela pacilambo capasi. Jemanjaji taciŵa acayimwene ni ‘kulamulilaga pampepe’ ni Yesu. Ni buku ja Ciunukuko jikulosya kuti mbali jaŵili ja mbeju jiciŵa ŵandu ŵakwana 144,000.—Ciunukuko 14:1; 20:6.

Ŵakulamulila ŵa cilambo capasi akusongana ku Halamagedo, jajili ‘ngondo ja pa lisiku lyalikulungwa lya Mlungu Jwamaciligose.’ Jemanjaji akutenda ngondo ni Yesu, jwakwesile pa mbunda, jwakulongolela ŵangondo ŵakwinani. Ŵakulamulila wosope ŵa pacilambo capasici akonanjikwa. Satana akumtaŵa, nipo Yesu ni ŵa 144,000 ŵala akulamulila cilambo capasi kwa “yaka 1,000.” Pambesi pa yaka 1,000 yeleyi, Satana akonanjikwa.—Ciunukuko 16:14; 20:4.

Ana Ulamusi wa Klistu wa yaka 1,000 yalumo ni acimjakwe ŵakulamulila nawo wucitenda cici kwa ŵandu ŵakupikanila? Yohane akulemba kuti, “[Yehofa] tacasyula misosi jawo m’meso mwawo. Ciwa ngasicipagwasoni, atamuno kulila malilo, kapena kulila kapena kuyiwona yipwetesi, yindu yandanda yili yipite.” (Ciunukuko 21:4) Sambano cilambo capasi cikuŵa paladaiso!

Buku ja Ciunukuko ni jajikumalisya utenga wa m’Baibulo. Kupitila mu Ucimwene wa Umasiya, lina lya Yehofa akuliswejesya, soni ulamusi wakwe wekulungwa ukuŵa wakuŵajilwa kwandaŵi jangamala!

—Nganiji jityocele m’buku ja Ciunukuko.