GALI gapite moŵa ga Samusoni, Samuyele ŵaŵele jwakulocesya ni jwakwelusya mu Yisalayeli. Ayisalayeli ŵalimbicilaga kum’ŵenda Samuyeli kuti akusaka akole mundu jucaŵe mwenye jwawo mpela muyaŵelele ni mitundu jine. Atamose kuti yeleyi nganiyimsangalasya Yehofa, jwalakwe ŵamsalile Samuyele kuti apikanile yiŵaŵecetaga Ayisalayeliwo. Mlungu ŵasagwile mundu jwakulinandiya lina lyakwe Sauli kuti aŵe mwenye. Nambo kaneko Mwenye Sauli ŵaŵele jwakulikwesya, soni jwangapikanila. Yehofa ŵalesile kumnonyela mwenyeju, ni ŵamsalile Samuyele kuti asagule mcanda lina lyakwe Daudi kuti aŵe mwenye. Nambo yapite yaka yejinji Daudi mkanaŵe mwenye jwakulamulila.

Komboleka kuti Daudi paŵaliji mcanda ŵajawulaga kukwalola acakulugwe ŵaŵatumicilaga m’likuga lya asilikali ŵa Sauli. Asilikaliŵa ŵaliji mkogopa mmagongo jumo, juŵaliji msilikali jwamkulungwa mnope lina lyakwe Goliyati. Msilikaliju ŵagambaga kwacembulusya Ayisalayeli yimpepe ni Mlungu jwawo. Yeleyi yamsakalisye Daudi, ni ŵakundile kuti aputane najo ngondo mundu jwakulimbanganaju. Mcandaju ali agambile kujigala legeni ni maganga gakuŵalanjika, ŵajile kucingangana ni mmagongoju, juŵaliji jwamlewu ciŵandika mamita gatatu. Goliyati ŵatandite kumcembulusya Daudi, nambo Daudi ŵajanjile kuti jwalakwe ŵajigele yakuputila ngondo yambone kulekangana ni mundujo, ligongo Daudi ŵaputaga ngondojo mu lina lya Yehofa Mlungu! Daudi ŵamgwisisye Goliyati ni liganga limo ni kumkata mtwe wakwe ni upanga wa Goliyati pewo. Asilikali ŵa Afilisiti ŵatisile ligongo lya woga.

Pandanda Sauli ŵasangalele ni kulimba mtima kwa Daudi, ni ŵam’ŵisile mcandaju kuŵa jwakulongolela asilikali ŵakwe. Nambo pakuŵa Daudi yejinji yamjendelaga cenene, Sauli ŵatandite kum’ŵenga mnope. Ali mkusaka kum’wulaga, Daudi ŵatisile, soni kwa yaka yejinji ŵatamilaga kuuŵa. Nambope Daudi ŵajendelecele kulupicika kwa mwenyejo atamose kuti ŵasakaga kum’wulaga, ligongo ŵakumbucilaga kuti Yehofa Mlungu ni juŵamsagwile Sauli kuŵa mwenye. Pambesi pakwe Sauli ŵawile kungondo. Kaneko Daudi ŵaŵele mwenye mwakamulana ni yiŵaŵecete Yehofa.

Paŵaliji mwenye, Daudi ŵasacile mnope kuti ataŵe nyumba ja Yehofa. Nambo Yehofa ŵamsalile Daudi kuti jumo jwa ŵanace ŵakwe ni jucacitaŵa nyumbajo. Mwanace jwa Daudi jwakatesile yeleyi ŵaliji Solomoni. Nambo Mlungu ŵampele upile Daudi mwakulangana najo cilanga cambone cakuti: Mbagwilo sya mwiŵasa lyakwe, kulekangana ni maŵasa gane, siciŵelekaga ŵanace ŵajinji ŵacaciŵaga acayimwene. Soni pambesi pakwe siciŵeleka Mkulupusyo, kapena kuti Mbeju, jiŵajisasile mu Edeni. Jwalakwejo ŵaŵajilwe kuŵa Masiya, gopolela kuti “Jwesagulwe ni msimu,” kapena kuti jwesagulwe ni Mlungu. Yehofa ŵaŵecete kuti Masiyaju caciŵa Jwakulamulila boma, kapena kuti Ucimwene, wawucilamulila kwandaŵi jangamala.

Pakuyamicila mnope yeleyi, Daudi ŵasongenye yilingo yejinji mnope yakutaŵila, ni yisyano yambone, pakosecela kutaŵa nyumba ja Yehofa. Soni jwalakwe mwakulongolelegwa ni msimu weswela ŵalembile malumbo gejinji. Kumbesi kwa umi wakwe, Daudi ŵaŵecete kuti: “Msimu wa Yehofa ni wawambecetekasyaga, soni maloŵe gakwe galiji pa lulumi pangu.”—2 Samueli 23:2.

—Nganiji jityocele m’buku ja 1 ni 2 Samueli; 1 Mbiri; Yesaya 9:7; Matayo 21:9; Luka 1:32; Yohane 7:42.